បន្ទាប់ពីលេចធ្លាយរូបភាពស្និទ្ធស្នាលរវាងតារាចម្រៀង នីកូ និង សុខ ពិសី នៅក្នុងកម្មវិធីប្រគំតន្រ្តីកាលពីកន្លងមកនេះស្រាប់តែមានមតិមួយចំនួនចោទប្រកាន់ថាតារាចម្រៀងស្រីរូបនេះក្បត់ចិត្ត កាក់។ ដើម្បីជម្រះមន្ទិលនិងការចោទប្រកាន់ទាំងឡាយ នីកូ ចេញមកបញ្ជាក់ភាពស្អាតស្អំការពារកិត្តិយស សុខ ពិសី។
នៅយប់ថ្ងៃទី១៨ ខែកុម្ភៈ លោក នីកូ ចេញមកបង្ហោះសំណេរថា «ពួកយើងជាដៃគូចម្រៀងជាមួយគ្នាហើយសម្តែងបែបហ្នឹងក៏មិនតិចដងដែរកាលពីមុន ហើយ show លត់ជង្គង់ វាជាstory line របស់វគ្គ wonderland ដែលតួប្រុសត្រូវតាមរកព្រះនាងដ៏ស្រស់ស្អាត ក្នុង wonderland ដោយមុននឹងបានជួបព្រះនាង តួប្រុសត្រូវជួប អ្នកកាន់សោទ្វារ cute cute ទាំងពី រ៉ូលីន និង ផេនខេក បន្ទាប់មកក៏បានជួបនឹងdevil មកដាក់ស្នេហ៍ដែលចូលរួមដោយហ្វីយ៉ាតា បន្ទាប់មកក៏ជួបក្មេងស្រីកម្ជិល hooin ម្នាក់ទៀតទើបរកព្រះនាងឃើញ។ ជាមូលហេតុអ្នកមិនបានចូលរួមខនសឺត solo របស់ខ្ញុំឆ្ងល់ថាហេតុអី មានតួស្រីច្រើនម្ល៉េះ…»។
តារាចម្រៀង នីកូ បញ្ជាក់ថាលោកបានអញ្ជើញ សុខ ពិសី ដោយផ្ទាល់បើទោះជា សុខ ពិសី រវល់ជាប់កម្មវិធីស្ទើររាល់ថ្ងៃគាត់នៅតែឆ្លៀតមក ហើយថ្ងៃនោះគាត់ក៏ឈឺថែមទៀត តែគាត់នៅតែសម្តែងបានយ៉ាងល្អ។ នីកូ បន្ថែមថាតារាចម្រៀង សុខ ពិសី គ្រាន់តែឮថាថវិកាលក់សំបុត្រ នឹងត្រូវបរិច្ចាគ 100% ទៅកាន់កងទ័ពនិងបងប្អូនភៀសសឹក សុខ ពិសី បានឆ្លើយយល់ព្រមភ្លាមដោយស្ម័គចិត្តទាំងស្រុងសម្រាប់ការសម្តែងមួយនេះ។
នីកូ សង្កត់ធ្ងន់ថា កំឡុងពេលធ្វើការជាមួយគ្នាអ្នកទាំងពីរប្រៀបបានទៅនឹងបងប្អូន មិត្តភក្កិ និងអ្នកគាំទ្រទៅវិញទៅមក។
គួរឱ្យដឹងថា ការចេញមកបញ្ជាក់របស់ នីកូ ចំពោះតារាចម្រៀង សុខ ពិសី ធ្វើឡើងក្រោយពីមានមតិវែកញែកពីសហគមន៍អនឡាញដោយចោទប្រកាន់ថា សុខ ពិសី មានចិត្តមិនស្មោះត្រង់ ក្បត់ ប្រូកាក់។ ជាមួយនឹងការបកស្រាយរបស់ នីកូ កញ្ញា សុខ ពិសី ក៏បានចេញបកស្រាយថាឱ្យនាងក្បត់ចិត្ត កាក់ យ៉ាងដូចម្តេចបើនាងមិនត្រូវជាអ្វីនឹង កាក់ ផង។ តារាស្រីរូបនេះបានទទួលស្គាល់ថា កាក់ មានចិត្តស្រលាញ់ប៉ុន្តែមិនមែនមានន័យថា ឱ្យតែអ្នកណាស្រលាញ់នាង នាងត្រូវស្រលាញ់គេវិញនោះទេ៕
