តារាសម្តែងជើងចាស់ដ៏មានឈ្មោះបោះសំឡេងលោក ទេព រិនដារ៉ូ បានបញ្ជាក់ជូនសាធារណជនថាលោកធ្លាប់មានភរិយានៅក្នុង១៩៨៧ និងមានកូនស្រីម្នាក់ជាចំណងដៃ។ ទោះយ៉ាងណាជីវិតគូរបស់លោកមានរយៈពេលត្រឹមតែ១ឆ្នាំប៉ុណ្ណោះខណៈបច្ចុប្បន្ននេះលោកពុំមានភរិយានោះទេដោយសារតែគិតរឿងនេះជាធំ។ ដ្បិតពេលនេះលោក ទេព រិនដារ៉ូ ពុំមានភរិយាប៉ុន្តែពេលនេះគឺលោកមានគូស្នេហ៍នៅស្រុកក្រៅ។
អស់រយៈពេលជាច្រើនឆ្នាំមកហើយដែលទស្សនិកជនពុំបានឃើញលោក ទេព រិនដារ៉ូ បង្ហាញដៃគូរបស់ខ្លួននោះទេ ខណៈរឿងនេះក៏បង្កឱ្យមានការសង្ស័យក្នុងចំណោមទស្សនិកជនក៏ដូចជាចង់ដឹងថាតារាសម្តែងរូបនេះធ្លាប់មានភរិយាដែរឬអត់?។ មានសំណួរជាច្រើនពាក់ព័ន្ធនឹងបញ្ហានេះ នាយព្រែក បានស្រាយចម្ងល់របស់មហាជនតែម្តង។
តាមរយៈវីដេអូដែល នាយព្រែក បង្ហោះនៅយប់ថ្ងៃទី១១ ខែកុម្ភៈ លោក ទេព រិនដារ៉ូ បានបញ្ជាក់ថាសព្វថ្ងៃនេះលោកពុំមានភរិយានោះទេ ប៉ុន្តែលោកធ្លាប់មានភរិយាតាំងពីមុនចូលសម្តែងមកម្ល៉េះពោលគឺនៅឆ្នាំ១៩៨៧។ មិនត្រឹមតែមានភរិយាប៉ុណ្ណោះទេប៉ុន្តែលោក ទេព រិនដារ៉ូ ក៏មានកូនស្រីម្នាក់ជាចំណងដៃផងដែរ តែចំណងស្នេហានោះបានត្រឹមតែ១ឆ្នាំប៉ុណ្ណោះ។ ចំពោះមូលហេតុដែលលោក ទេព រិនដារ៉ូ មិនយកភរិយាទៀតតារាសម្តែងរូបនេះបានបញ្ជាក់ថាលោកគិតគ្រួសារជាធំពីព្រោះលោកជាមេគ្រួសារ។
ចំណុចនេះលោក ទេព រិនដារ៉ូ បានបញ្ជាក់ថាលោកត្រូវរ៉ាប់រងចិញ្ចឹមម្តាយ ប្អូន និងក្មួយៗ ហើយប្រសិនជាមានគ្រួសារលោកគិតថាត្រូវបែងចែកមិនមានសិទ្ធិ១០០ភាគរយ ដែលបន្ទុកនោះធ្វើឱ្យលោកពិបាក។ ជាមួយគ្នានេះលោកក៏បានលាតត្រដាងថាចាប់តាំងពីបែកភរិយាមុនមកពុំមែនលោកមិនធ្លាប់សាកល្បងចាប់ផ្តើមជីវិតគូម្តងទៀតនោះទេប៉ុន្តែមិនអាចទៅរួច។
ទាក់ទិននឹងការចាប់ផ្តើមជាមួយដៃគូថ្មីដែលមិនអាចរលូនទៅមុខបានលោក ទេព រិនដារ៉ូ បានបញ្ជាក់ថាដោយសារលោកជាអ្នកសិល្បៈ ដូច្នេះការទំនាក់ទំនងពុំដូចមនុស្សធម្មតា នៅពេលថតសម្តែងមានកាយវិការសិទ្ធិស្នាលធ្វើឱ្យដៃគូប្រចណ្ឌ។ មិនលាក់បាំងពីទស្សនិកជនដ្បិតពេលនេះលោក ទេព រិនដារ៉ូ ពុំមានភរិយាប៉ុន្តែពេលនេះគឺលោកមានគូស្នេហ៍នៅស្រុកក្រៅ៕
