អនាគត Rami ជាមួយ BABYMONSTER កំពុងបង្កឱ្យអ្នកគាំទ្រមានការព្រួយបារម្ភ

អស់រយៈពេល៩ខែមកហើយចាប់តាំងពីខែឧសភា ឆ្នាំ២០២៥ ដែល Rami មិនបានចូលរួមជាមួយនឹង BABYMONSTER ដើម្បីផ្តោតលើការថែសុខភាពរបស់ខ្លួន។ អ្នកគាំទ្រនៅតែបន្តទាមទារឱ្យ YG Entertainment បញ្ជាក់ពីស្ថានភាពរបស់សមាជិករូបនេះនិងរង់ចាំព័ត៌មានថ្មីៗខណៈការអាប់ដេតមួយពី YG បានធ្វើឱ្យអនាគតរបស់ Rami កាន់តែមិនប្រាកដប្រជា។

នៅថ្ងៃទី៨ ខែកុម្ភៈ ផលិតកម្ម YG បានបង្ហោះព័ត៌មានអំពីការសម្ដែងសម្រាប់ក្រុមចម្រៀងប្រុសថ្មីមួយ។ វីដេអូផ្សព្វផ្សាយសម្រាប់កម្មវិធីនេះបង្ហាញពីសិល្បករក្រោមការគ្រប់គ្រងរបស់ YG ទាំងអតីតកាល និងបច្ចុប្បន្ន។ នៅក្នុងឈុតឆាកដែលពាក់ព័ន្ធនឹង BABYMONSTER សមាជិកបច្ចុប្បន្នចំនួន៦នាក់ដោយគ្មាន Rami ត្រូវបានរួមបញ្ចូល ខណៈពេលដែលនៅក្នុងការចងក្រងឈុតឆាកវាយតម្លៃអ្នកហ្វឹកហាត់រូបភាពរបស់ Rami នៅតែមាន។

រឿងនេះបាននាំឱ្យទស្សនិកជនមួយចំនួនសង្ស័យលើផែនការរបស់ YG សម្រាប់ Rami និងអនាគតរបស់ក្រុមចម្រៀងនេះ។

ភាពស្ងៀមស្ងាត់របស់ YG បានបង្កឱ្យមានការខឹងសម្បារក្នុងចំណោមអ្នកគាំទ្រ។ នៅលើប្រព័ន្ធផ្សព្វផ្សាយសង្គម និងវេទិកា អ្នកគាំទ្របានទាមទារឱ្យ YG និយាយចេញមក និងបញ្ជាក់ឱ្យច្បាស់អំពីស្ថានភាពរបស់ Rami។
បច្ចុប្បន្ន YG កំពុងរៀបចំហ្វឹកហាត់ និងបង្ហាញខ្លួនក្រុមថ្មីៗដូច្នេះការវិនិយោគនិងការយកចិត្តទុកដាក់ដែលផ្តល់ទៅឱ្យ BABYMONSTER នឹងថយចុះជាមិនខាន។

អ្នកគាំទ្រជាច្រើនមានការព្រួយបារម្ភថា Idol រូបនេះប្រហែលជាបានចាកចេញពីក្រុមដោយស្ងាត់ៗ ព្រោះ YG ហាក់ដូចជាមិនបានធ្វើសកម្មភាពណាមួយដើម្បីប្រកាសពីការវិលត្រឡប់មកវិញរបស់ Rami នោះទេ៕