ទីបំផុតកម្មវិធីដែលតារារ៉េប Awich បានមកថតតារារ៉េប វណ្ណដា និងគ្រួសារនៅឯខេត្តព្រះសីហនុបានចាក់ផ្សាយជាផ្លូវការហើយនៅលើកញ្ចក់ទូរទស្សន៍ជប៉ុន។ ក្នុងឯកសារដែលជប៉ុនបានចុះផ្សាយគឺបង្ហាញពីការប្រគំតន្រ្តីរបស់ វណ្ណដា នៅពហុកីឡដ្ឋានអូឡាំពិក វប្បធម៌ខ្មែរ និងស្នាមខ្មៅពីអតីតកាលនៃរបបខ្មែរក្រហម។
ទស្សនិកជនម្នាក់មានឈ្មោះថា Sem Na Vy បានបង្ហាញកាលពីយប់ថ្ងៃទី៩ ខែកុម្ភៈ ដោយបញ្ជាក់ថាទូរទស្សន៍ TBS ដ៏ធំរបស់ជប៉ុនបានចាក់ផ្សាយពីតារារ៉េប វណ្ណដា តារាហ៊ីបហបដ៏មានទេពកោសល្យរបស់ប្រទេសកម្ពុជា។ វីដេអូនោះ គេបានឃើញតារារ៉េបជប៉ុន Awich បាននិយាយក្នុងកម្មវិធីពីតារារ៉េប វណ្ណដា ដោយបានរួមបញ្ជូលបទចម្រៀង «អាមុំបងអើយ» និងទិដ្ឋភាពរបស់ទស្សនិកជនដែលចូលរួមយ៉ាងច្រើនកុះករនៅឯពហុកីឡដ្ឋានអូឡាំពិកក្នុងការប្រគំតន្រ្តីរបស់ វណ្ណដា កាលពីកន្លងមកនេះ។ 
លើសពីនេះ ក្រុមការងារកម្មវិធីរួមទាំង Awich ផ្ទាល់ក៏បានចុះទៅដល់ស្រុកកំណើតរបស់ វណ្ណដា ផ្ទាល់នៅឯខេត្តព្រះសីហនុ និងបានសម្ភាសជាមួយនឹងឪពុករបស់ វណ្ណដា ផងដែរ។ ទូរទស្សន៍ TBS ក៏បានផ្សព្វផ្សាយពីប្រាសាទអង្គរវត្តរបស់ប្រទេសកម្ពុជា បង្ហាញពីរបាំនៃវប្បធម៌ខ្មែរ រួមទាំងរំលេចពីរបបខ្មែរក្រហមដូចគ្នា។
គួរបញ្ជាក់ផងដែរថា Awich ជាតារារ៉េបជប៉ុនដ៏ល្បីម្នាក់ប្រចាំប្រទេសហើយបានសហការជាមួយនឹង វណ្ណដា កាលពីកន្លងមកនេះតាមរយៈបទចម្រៀង «៦ Years In The Game» កាលពីឆ្នាំ២០២៣ «ASIAN STATE OF MIND» ឆ្នាំ២០២៥ ខណៈរូបនាងក៏បានមកចូលរួមធ្វើជាតារាកិត្តិយសក្នុងការប្រគំតន្រ្តីរបស់ វណ្ណដា ផងដែរ៕
