វីដេអូមួយរបស់ ពេជ្រ វត្តីសារ៉ាវឌ្ឍី នៅឯកោះបាលីមានអ្នកមើលដល់ទៅជាង២០លានដង

អ្នកគាំទ្រមានការភ្ញាក់ផ្អើលនិងស្ងើចសរសើរមិនតិចនោះទេចំពោះប្រជាប្រិយភាពរបស់ ពេជ្រ វត្តីសារ៉ាវឌ្ឍី បន្ទាប់ពីឃើញវីដេអូរបស់នាងបង្ហោះបានទាក់ទាញអ្នកទស្សនារាប់លានដងក្នុងរយៈពេលខ្លី។ ចំនួនតួលេខដ៏ច្រើនសន្ធឹកសន្ធាប់រហូតដល់ទៅជាង២០លានបានបំបែកកំណត់ត្រាចាស់របស់នាងខណៈ ពេជ្រ វត្តីសារ៉ាវឌ្ឍី បានបង្ហាញពីជម្រៅចិត្តនេះឡើងមក។

នៅថ្ងៃទី៥ កុម្ភៈ ពេជ្រ វត្តីសារ៉ាវឌ្ឍី បានបង្ហោះវីដេអូមួយនៅលើកោះបាលី ប្រទេសឥណ្ឌូនេស៊ី ដោយបានទាក់ទាញចំណាប់អារម្មណ៍យ៉ាងខ្លាំងពីភ្ញៀវទេសចរនៅទីនោះ។ លើសពីនេះទៅទៀតបន្ទាប់ពីវីដេអូនេះបានបង្ហោះចេញនៅលើបណ្តាញសង្គមបវរកញ្ញារូបនេះបានទាក់ទាញចិត្តទស្សនិកជនយ៉ាងច្រើន។ នៅលើហ្វេកប៊ុកវីដេអូមួយនេះរបស់ ពេជ្រ វត្តីសារ៉ាវឌ្ឍី បានឈានដល់ទៅ២០លានដងក្នុងរយៈពេលមិនដល់ពីរថ្ងៃផង ខណៈគិតត្រឹមថ្ងៃទី៧ កុម្ភៈ តួលេខនៃចំនួនអ្នកទស្សនានៅបន្តកើនឡើងឥតឈប់ឈររហូតដល់ទៅជាង២០លានដងហើយ។

តួលេខយ៉ាងច្រើនសន្ធឹកសន្ធាប់នៅក្នុងវីដេអូនេះបានធ្វើឱ្យអ្នកគាំទ្រចូលរួមអបអរសាទរ ពេជ្រ វត្តីសារ៉ាវឌ្ឍី ផងដែរខណៈនេះក៏ក្លាយជាវីដេអូមួយរបស់នាងដែលមានអ្នកទស្សនាច្រើនបំផុតបន្ទាប់ពីវីដេអូបង្ហាញម៉ូតដើរនៅតំបន់ប្រាសាទអង្គរវត្តដែលមានការទស្សនាចំនួន១៧លាន។

រំភើបចិត្តនឹងការគាំទ្ររបស់ទស្សនិកជន ពេជ្រ វត្តីសារ៉ាវឌ្ឍី បានបង្ហោះ Story ដោយនិយាយថា នាងមិនដែលនឹកស្មានវីដេអូនេះនឹងទៅដល់អ្នកទស្សនារាប់លាននាក់ក្នុងរយៈពេលដ៏ខ្លីបែបនេះទេ។នាងពិតជាដឹងគុណ និងកោតសរសើរយ៉ាងជ្រាលជ្រៅចំពោះការគាំទ្ររបស់ទស្សនិកជន។ ពេជ្រ វត្តីសារ៉ាវឌ្ឍី ក៏មិនភ្លេចពោលពាក្យអរគុណសម្រាប់ការជួយពិភពលោកឱ្យមើលឃើញពីកន្លែងដែលនាងមកពីប្រទេសដែលមានចិត្តបរិសុទ្ធ និងវប្បធម៌ដ៏សម្បូរបែប៕