តារាចម្រៀង ម៉េង កែវពេជ្ជតា បានសរសើរតារាចម្រៀង សុគន្ធ និសា ថាច្រៀងពីរោះណាស់មានសម្លេងស្រទន់គួរឱ្យស្រលាញ់។ ការសរសើរនេះគឺបន្ទាប់ពីតារាចម្រៀងទាំងពីរដួងមានឱកាសបកស្រាយចម្រៀងជាមួយគ្នានៅលើឆាកតន្រ្តីក្នុងកម្មវិធីឡើងភូមិគ្រឹះថ្មីនិងខួបអាពាហ៍ពិពាហ៍។
រយៈពេលចុងក្រោយនេះមានកម្មវិធីជាច្រើនបានជំរុញឱ្យតារាចម្រៀង ម៉េង កែវពេជ្ជតា មានឱកាសបកស្រាយជាមួយនឹងតារាចម្រៀងជើងចាស់ដូចជាលោកជំទាវ ហ៊ឹម ស៊ីវន លោក ណូយ វ៉ាន់ណេត ហើយពេលកន្លងមកក៏ធ្លាប់មានឱកាសចាប់ដៃគូចាស់ជាមួយនឹងឧកញ៉ា ព្រាប សុវត្ថិ។ មិនត្រឹមតែសិល្បករជំនាន់មុនប៉ុន្តែតារាចម្រៀង ម៉េង កែវពេជ្ជតា និងតារាចម្រៀងជំនាន់ក្រោយមួយចំនួនមានឱកាសសហការគ្នាជាក់ស្តែងដូចជា ព្រីន អាយរីស ជាដើម។
ថ្មីៗនេះអ្នកនាង ម៉េង កែវពេជ្ជតា ក៏បានពោលសរសើរតារាចម្រៀង សុគន្ធ និសា បន្ទាប់ពីអ្នកទាំងពីរមានឱកាសចូលរួមកម្មវិធីតែម្តង។ បើតាមតារាចម្រៀង ម៉េង កែវពេជ្ជតា រូបអ្នកនាងនិងតារាចម្រៀង សុគន្ធ និសា គឺបានជួបគ្នាជាញឹកញាប់តាមកម្មវិធីប៉ុន្តែពេលនេះទើបមានឱកាសបកស្រាយជាមួយគ្នាតាមរយៈបទ «ស្នេហ៍ប្រុសង៉ក់ងរ»។ តារាចម្រៀងជើងចាស់ដ៏ល្បីល្បាញនេះបញ្ជាក់ថា បទល្បីនេះជាស្នាដៃនិពន្ធទំនុកច្រៀងនិងសំនៀងដើមដោយរូបអ្នកនាងផ្ទាល់ស្ថិតក្នុងផលិតកម្ម ឆ្លងដែន»។
អ្វីដែលកាន់តែគួរឱ្យចាប់អារម្មណ៍ដ្បិតថាតារាចម្រៀង ម៉េង កែវពេជ្ជតា មានទឹកដមសំឡេងពីរោះរណ្តំក្តីប៉ុន្តែរៀមច្បងបានសរសើរមកកាន់តារាចម្រៀង សុគន្ធ និសា ថាច្រៀងពីរោះមានសម្លេងស្រទន់គួរឱ្យស្រលាញ់៕
