កំណត់ពន្ធ២០០% លើផលិតផលស្រា ក្រោយបារាំងខកខានចូលរួមជាសមាជិកក្រុមប្រឹក្សាសន្តិភាព

ប្រធានាធិបតីអាមេរិក លោក Donald Trump បានប្រកាសដាក់ពន្ធលើស្រា Wine និងស្រាសាំប៉ាញនាំចូលពីប្រទេសបារាំង រហូតដល់២០០% ដើម្បីបង្ខំឱ្យប្រធានាធិបតីបារាំង លោក Emmanuel Macron យល់ព្រមចូលរួមជាសមាជិកក្រុមប្រឹក្សាសន្តិភាព (Board of Peace) ដែលបង្កើតឡើងដោយលោក Trump ដើម្បីដោះស្រាយបញ្ហាជម្លោះនៅទូទាំងពិភពលោក ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២០ ខែមករា ឆ្នាំ២០២៦ ។

លោកប្រធានាធិបតី Trump បាននិយាយមកកាន់អ្នកសារព័ត៌មាន បន្ទាប់ពីអ្នកសារព័ត៌មានសួរពីប្រធានាធិបតីបារាំងមិនចាប់អារម្មណ៍ចូលរួមក្នុងក្រុមប្រឹក្សាសន្តិភាព (Board of Peace) ដោយលោក Trump បញ្ជាក់ថា គ្មានអ្នកណាម្នាក់ត្រូវការលោក Emmanuel Macron ទេ ពីព្រោះប្រធានាធិបតីបារាំងរូបនេះជិតធ្លាក់ពីតំណែងហើយ ។ លោកថា ៖ «ខ្ញុំនឹងដាក់ពន្ធស្រា Wine និងស្រាសាំប៉ាញបារាំង ស្មើនឹង២០០% បន្ទាប់មក ប្រធានាធិបតីបារាំងនឹងចូលរួមក្នុងក្រុមប្រឹក្សាសន្តិភាពដោយខ្លួនឯង ប៉ុន្តែប្រធានាធិបតីបារាំងមិនចាច់ចូលរួមក៏បានដែរ» ។

តាមប្រភពជិតស្និទ្ធជាមួយប្រធានាធិបតីបារាំង បាននិយាយកាលពីថ្ងៃទី១៩ ខែមករា រដ្ឋាភិបាលបារាំងត្រៀមខ្លួនបដិសេធនឹងការអញ្ជើញឱ្យចូលរូមជាសមាជិកក្រុមប្រឹក្សាសន្តិភាពដែលផ្តួចផ្តើមឡើងដោយប្រធានាធិបតីអាមេរិកនាពេលនេះ ។

កាលពីខែកញ្ញា ឆ្នាំ២០២៥ លោកប្រធានាធិបតី Trump បានបង្កើតក្រុមប្រឹក្សាសន្តិភាពដើម្បីបញ្ចប់សង្គ្រាមនៅតំបន់កាហ្សា ប៉ុន្តែខ្លឹមសារលម្អិតក្នុងលិខិតអញ្ជើញដែលផ្ញើទៅកាន់មេដឹកនាំនៅទូទាំងពិភពលោក បែរជាបញ្ជាក់ថា ក្រុមប្រឹក្សានេះនឹងបញ្ចប់សង្គ្រាមទាំងអស់លើពិភពលោក ។ ក្រៅពីនេះ លិខិតដែលរដ្ឋាភិបាលអាមេរិកផ្ញើទៅកាន់ប្រទេសចំនួន៦០ បានបញ្ជាក់ពីលក្ខខណ្ហសំខាន់ថា សមាជិកក្រុមប្រឹក្សាត្រូវបង់ប្រាក់ ចំនួន១ពាន់លានដុល្លារ បើចង់ក្លាយជាសមាជិកអចិន្ត្រៃយ៍រយៈពេលជាង៣ឆ្នាំ ។

លក្ខខណ្ឌនេះធ្វើឱ្យមេដឹកនាំប្រទេសជាច្រើនលើពិភពលោក ស្ទាក់ស្ទើរក្នុងការចូលរួមជាសមាជិកក្រុមប្រឹក្សាសន្តិភាព និងបារម្ភពីការបង្កើតក្រុមប្រឹក្សាសន្តិភាពរបស់លោកប្រធានាធិបតី Trump អាចធ្វើឱ្យប៉ះពាល់ដល់ដំណើរការអង្គការសហប្រជាជាតិ (UN) ។ លោកប្រធានាធិបតី Trump និយាយកាលពីថ្ងៃទី១៩ ខែមករា ថា បានផ្ញើលិខិតអញ្ជើញប្រធានាធិបតីរុស្ស៊ី លោក Vladimir Putin ឱ្យចូលរួមជាសមាជិកក្រុមប្រឹក្សាសន្តិភាពផងដែរ ។

គួរបញ្ជាក់ថា រហូតមកដល់ថ្ងៃទី២០ ខែមករា ឆ្នាំ២០២៦នេះ មានប្រទេសចំនួន៦ហើយ ដែលយល់ព្រមចូលរួមជាសមាជិកក្រុមប្រឹក្សាសន្តិភាព រួមមាន ៖ វៀតណាម កាហ្សាក់ស្ថាន ហុងគ្រី អាហ្សង់ទីន ម៉ារ៉ុក និងបេឡារុស ។ ក្រុមប្រឹក្សាសន្តិភាព គឺជាអង្គការអន្តរជាតិមានបំណងស្វែងរកការលើកកម្ពស់ស្ថិរភាព ស្តារអភិបាលកិច្ចអាចទុកចិត្តបាន និងស្របច្បាប់ ជាពិសេស ធានាបាននូវសន្តិភាពយូរអង្វែងក្នុងតំបន់រងផលប៉ះពាល់ ឬគំរាមកំហែងដោយជម្លោះ ៕