អនុវត្តតាមវិធីងាយៗទាំងនេះដើម្បីបំបាត់ការងងុយគេងដោយពុំចាំបាច់ផឹកកាហ្វេ

ការងងុយគេងជាមូលហេតុមួយដែលមិនអាចផ្តោតអារម្មណ៍លើការងារ ទើបមនុស្សជាច្រើនផឹកកាហ្វេដើម្បីបំបាត់ងងុយគេងពេលថ្ងៃ ប៉ុន្តែសម្រាប់អ្នកមិនផឹកកាហ្វេវិញអាចអនុវត្តតាមវិធីងាយៗទាំងនេះដើម្បីកុំឱ្យងងុយគេង ហើយវាថែមទាំងជួយឱ្យមានអារម្មណ៍ស្រស់ស្រាយទៀតផង ។

ខាងក្រោមនេះជាវិធីដើម្បីបំបាត់ការងងុយគេងដោយពុំចាំបាច់ផឹកកាហ្វេ ៖

១-សម្រាកភ្នែករៀងរាល់២០នាទីម្តង ៖ ចូរសម្លឹងទៅកាន់ទីឆ្ងាយៗ ប្រមាណពី២០វិនាទី ទៅ៣០វិនាទី ដែលវិធីនេះអាចជួយបន្ធូរសាច់ដុំភ្នែក និងបំបាត់ការអស់កម្លាំង ។

២-ពត់ដៃ-ជើង ៖ ប្រសិនបើអង្គុយធ្វើការរយៈពេលយូរម៉ោងរហូតដល់ងងុយគេង និងគ្មានកម្លាំងក្នុងខ្លួន ចូរសាកល្បងក្រោកឈរឡើង និងបម្លាស់ទីរាងកាយថ្នមៗ ដើម្បីជាការពត់ដៃ-ជើង, បំបាត់ការអស់កម្លាំងរាងកាយ និងមានអារម្មណ៍ស្វាហាប់ជាងមុន ។

៣-ដើរ ៖ យើងអាចដើរប្រមាណ២០នាទី ដើម្បីជួយពង្រឹងមុខងាររាងកាយ និងកាត់បន្ថយការនឿយហត់អស់កម្លាំង ។

៤-ស្តាប់ចម្រៀង ៖ ការស្តាប់ចម្រៀងក្នុងពេលកំពុងបំពេញការងារ នឹងជួយឱ្យយើងមានអារម្មណ៍ស្វាងពីងងុយ ព្រមទាំងអាចផ្តោតលើការងារ ។

៥-បរិភោគអាហារសម្រន់ ៖ យើងអាចបរិភោគអាហារសម្រន់នៅពេលថ្ងៃ ដូចជា ៖ នំ និងផ្លែឈើរសជាតិជូរ ប៉ុន្តែត្រូវបរិភោគបាយឱ្យតិចជាងមុន បើមិនដូច្នោះទេ អាចប្រឈមនឹងជំងឺធាត់ ។

៦-ផឹកទឹក ៖ ប្រសិនបើរាងកាយទទួលបានទឹកគ្រប់គ្រាន់ គឺកម្រិតអុកស៊ីសែនក្នុងខ្លួននឹងកើនឡើង ព្រមទាំងជួយឱ្យខួរក្បាលស្រឡះល្អ បង្កើនប្រសិទ្ធភាពការងារ ។

ក្រៅពីនេះ ការហាត់ប្រាណបន្តិចពេលព្រឹក, បរិភោគអាហារមានប្រូតេអ៊ីនខ្ពស់, ទទួលពន្លឺថ្ងៃតាមធម្មជាតិ និងលុបលាងមុខ ក៏ជាវិធីបំបាត់ការងងុយគេងផងដែរ ។ ការងងុយគេងពេលថ្ងៃបណ្តាលមកពីកត្តាជាច្រើន រួមមាន ៖ ចូលគេងយប់ជ្រៅ ឬគេងតិចតួច, បញ្ហាសុខភាពផ្លូវចិត្ត, អាកាសធាតុ និងបរិស្ថានជុំវិញ, ធ្វើការច្រើន, គេងមិនទៀងទាត់ពេលវេលា, មានជំងឺប្រចាំកាយ និងផលប៉ះពាល់បណ្តាលមកពីថ្នាំពេទ្យ ៕