Jennie បានបង្កើតពេលវេលាដ៏កម្រមួយនៅក្នុងកម្មវិធីប្រគល់ពានរង្វាន់ GDA ឆ្នាំ២០២៦

ពិធីប្រគល់ពានរង្វាន់ Golden Disc Awards (GDA) លើកទី៤០ បានធ្វើឡើងនៅល្ងាចថ្ងៃទី ១០ ខែមករា នៅតៃវ៉ាន់ ដែលជាលើកទី ៧ ហើយដែលព្រឹត្តិការណ៍ដ៏មានកិត្យានុភាពនេះត្រូវបានធ្វើឡើងនៅក្រៅប្រទេស។ ពានរង្វាន់នេះគឺជាពានរង្វាន់ដែលផ្តល់កិត្តិយសដល់ការចេញផ្សាយតន្ត្រី K-pop ដែលពេញនិយមបំផុតប្រចាំឆ្នាំ ហើយត្រូវបានចាត់ទុកថាជាពានរង្វាន់ប្រចាំឆ្នាំដ៏មានកិត្យានុភាពបំផុតមួយនៅក្នុងឧស្សាហកម្មតន្ត្រីកូរ៉េ។

ពានរង្វាន់ធំ Daesang (Grand Prize) ឆ្នាំនេះបានទៅលើក្រុម Stray Kids G-Dragon និង Jennie ទទួលបានពានរង្វាន់ សិល្បករប្រចាំឆ្នាំ (Artist of the Year)។
ជាពិសេស Jennie មានពេលវេលាដ៏កម្រមួយ នៅពេលដែលឈ្មោះរបស់នាងត្រូវបានហៅឱ្យទទួលពានរង្វាន់ជាបន្តបន្ទាប់ ដោយទទួលបានពានរង្វាន់បុគ្គលចំនួន ៣ និងពានរង្វាន់សម្រាប់ Blackpink ចំនួន ១។ ដំបូងឡើយ Jennie គឺជាអ្នកឈ្នះម្នាក់ក្នុងចំណោមអ្នកឈ្នះក្នុងប្រភេទបទចម្រៀងឌីជីថលល្អបំផុត ដោយបានឈ្នះពានរង្វាន់ជាមួយបទចម្រៀងទោលរបស់នាង « Like Jennie »។

ដោយកាន់ពានរង្វាន់ដំបូងរបស់នាងនៅយប់នោះ Jennie បានបង្ហាញថា «វាជាយូរណាស់មកហើយចាប់តាំងពីខ្ញុំបានត្រឡប់មកកម្មវិធីប្រគល់ពានរង្វាន់ Golden Disc Awards ហើយការទទួលបានពានរង្វាន់នេះនៅតែធ្វើឱ្យខ្ញុំភ័យ។ ការជួបអ្នកគាំទ្ររបស់ខ្ញុំបន្ទាប់ពីរយៈពេលយូរបែបនេះធ្វើឱ្យខ្ញុំសប្បាយចិត្តខ្លាំងណាស់»។

ប៉ុន្តែភ្លាមៗនៅពេលដែលនាងចាកចេញពីឆាក ហើយត្រឡប់ទៅកន្លែងអង្គុយវិញ តារាចម្រៀងរូបនេះត្រូវបានហៅត្រឡប់មកវិញភ្លាមៗ ដើម្បីទទួលយកពានរង្វាន់ដដែលក្នុងនាមក្រុម Blackpink សម្រាប់បទចម្រៀង «Jump» របស់ពួកគេ។ នៅពេលឡើងទទួលពាន Jennie បានរម្លឹកពីសមាជិកក្រុមរបស់ខ្លួនរួមទាំងផលិតករ Teddy ។ការឈ្នះជាប់ៗគ្នារបស់ Jennie មិនបានឈប់ត្រឹមហ្នឹងទេ។ នាងបានត្រឡប់មកលើឆាកវិញជាលើកទីបីដើម្បីទទួលបានពានរង្វាន់ Global Influence មួយផ្សេងទៀត។ លើសពីនេះ Blackpink ត្រូវបានផ្តល់កិត្តិយសនៅក្នុងបញ្ជី «Golden Disc Powerhouse 40» ដែលទទួលស្គាល់សិល្បករចំនួន ៤០ នាក់ដែលមានឥទ្ធិពលយ៉ាងខ្លាំងទៅលើប្រវត្តិសាស្ត្រតន្ត្រីពេញនិយមរបស់កូរ៉េ។

បន្ទាប់ពីឈ្នះពានរង្វាន់បីជាប់ៗគ្នា Jennie បានសម្តែងយ៉ាងស្វាហាប់ជាមួយអ្នករាំស្លៀកពាក់ពណ៌ក្រហម។ នាងបានបង្ហាញខ្លួនក្នុងឈុតខ្មៅ ដោយសម្តែងបទចម្រៀងជាបន្តបន្ទាប់រួមមាន «Filter, Damn Right, និង Like Jennie» ដោយទទួលបានការទះដៃអបអរសាទរយ៉ាងខ្លាំងពីទស្សនិកជន។ នៅចុងបញ្ចប់នៃពិធីប្រគល់រង្វាន់ ឈុតឆាកគួរឱ្យកត់សម្គាល់មួយបានកើតឡើង។ ភ្លាមៗនោះ Jennie បានត្រឡប់ទៅកន្លែងអង្គុយរបស់នាងវិញ ហើយសម្រាកមួយសន្ទុះ នាងត្រូវបានប្រកាសថាជាអ្នកឈ្នះរង្វាន់ធំ «Artist of the Year»។

Jennie បានក្លាយជាសិល្បករទោលដំបូងគេដែលឈ្នះពានរង្វាន់ «Artist of the Year
» នៅឯពានរង្វាន់ Golden Disc Awards ដែលជាប្រភេទពានរង្វាន់ធំ (Daesang) ដែលទើបបង្កើតថ្មីនៅឆ្នាំនេះ។ នេះក៏ជាពានរង្វាន់ Daesang លើកទីពីររបស់នាងក្នុងអាជីពរបស់នាងផងដែរ៕