Baby Monster បង្ហាញពីការវិលត្រឡប់មកវិញរបស់ Rami

បន្ទាប់ពីសម្រាកពីសិល្បៈអស់រយៈពេល៧ ខែតារាចម្រៀង Rami ត្រូវបានគេរំពឹងថានឹងវិលត្រឡប់មកវិញជាមួយនឹងក្រុម Baby Monster ក្នុងពេលឆាប់ៗនេះ។ នៅថ្ងៃទី១៩ ខែធ្នូ ក្រុមចម្រៀងនារី Baby Monster បានចេញវីដេអូចម្រៀង «Supa Dupa Luv» ដែលជាបទចម្រៀងមួយបទពីអាល់ប៊ុមខ្នាតតូចទីពីររបស់ពួកគេដែលមានចំណងជើងថា «We Go Up»។

យោងតាមប្រព័ន្ធផ្សព្វផ្សាយកូរ៉េ នៅចុងបញ្ចប់នៃវីដេអូចម្រៀង នារីម្នាក់បានលេចចេញមក ហើយហាក់ដូចជាកំពុងមើលសមាជិកក្រុម Baby Monster តាមបង្អួចមួយ។ អ្នកគាំទ្រជាច្រើនបានបកស្រាយពីការបញ្ចប់ដែលមិននឹកស្មានដល់នេះថាជាសញ្ញាមួយដែលបង្ហាញថាសមាជិក Rami អាចនឹងវិលត្រឡប់មកសកម្មភាពជាមួយក្រុមវិញក្នុងពេលឆាប់ៗនេះ។

នៅក្នុងខែឧសភា ផលិតកម្ម YG Entertainment បានប្រកាសថា Rami នឹងឈប់សម្រាកពីសកម្មភាពទាំងអស់ដោយសារបញ្ហាសុខភាព។ សូម្បីតែមុនពេលនាងបង្ហាញខ្លួនលើកដំបូងក៏ដោយ Rami ត្រូវបានគេធ្វើរោគវិនិច្ឆ័យថាមានជំងឺស្ទះសួត។ ទោះបីជាមានការព្យាបាលជាប់លាប់ និងការត្រួតពិនិត្យយ៉ាងដិតដល់ពីអ្នកឯកទេសអស់រយៈពេលជាងមួយឆ្នាំក៏ដោយ ស្ថានភាពសុខភាពរបស់នាងហាក់ដូចជាកាន់តែអាក្រក់ទៅៗនៅដើមឆ្នាំនេះ។
ដោយសារតែការសម្រាកមួយរយៈ Rami បានអវត្តមានពីពាក់កណ្តាលទីពីរនៃដំណើរទេសចរណ៍ «Hello Monsters» របស់ក្រុមតន្រ្តី ដែលបានចាប់ផ្តើមនៅថ្ងៃទី ១៧ ខែឧសភា។

ក្រោយមក Rami ក៏មិនអាចចូលរួមក្នុងការវិលត្រឡប់មកវិញពីរលើករបស់ Baby Monster បានទេ៖ បទ «Hot Sauce »ដែលចេញក្នុងខែកក្កដា និងអាល់ប៊ុមខ្នាតតូច «We Go Up» ដែលចេញក្នុងខែតុលា។ អ្នកគាំទ្រកាន់តែមានការព្រួយបារម្ភកាន់តែខ្លាំង នៅពេលដែលក្រុម Baby Monster ទាំងមូលបានសម្តែង និងទទួលបានពានរង្វាន់នៅក្នុង ពិធីប្រគល់រង្វាន់ MAMA 2025 ដ៏សំខាន់ ប៉ុន្តែ Rami នៅតែបន្តអវត្តមាន។

នៅពេលដែល YG បានប្រកាសពីការផ្អាកការងាររបស់ Rami ក្នុងខែឧសភា មានពាក្យចចាមអារ៉ាមជាច្រើនបានផ្សព្វផ្សាយថា តារារូបនេះនឹង «លាក់ខ្លួន» ដើម្បីវះកាត់កែសម្ផស្ស។ ការស្មានទាំងនេះបានកើតចេញពីមតិយោបល់ពីមុនរបស់ Daisy ដែលជាអតីតសមាជិកក្រុម Momoland ដែលបង្ហាញថា តារាមួយចំនួនផ្អាកសកម្មភាពរបស់ពួកគេជាបណ្តោះអាសន្ន ដើម្បីវះកាត់កែសម្ផស្ស។ ដោយសារតែ Rami បានបាត់ខ្លួនអស់រយៈពេល ៧ ខែមកហើយ ហើយ YG កម្រនឹងធ្វើបច្ចុប្បន្នភាពអំពីស្ថានភាពរបស់តារាចម្រៀងរូបនេះណាស់ អ្នកគាំទ្រជាច្រើនមានការព្រួយបារម្ភថា Rami ប្រហែលជាបានចាកចេញពីក្រុមដោយស្ងាត់ៗ។

បច្ចុប្បន្ននេះ បន្ទាប់ពីវីដេអូចម្រៀង «Supa Dupa Luv» បានបញ្ចប់ដោយមិននឹកស្មានដល់ អ្នកគាំទ្រកំពុងរង់ចាំព័ត៌មានវិជ្ជមាននាពេលអនាគតដ៏ខ្លីខាងមុខនេះ៕