អ្នកលេងបណ្តាញសង្គមជាច្រើនបានបញ្ចេញមតិរិះគន់ទៅកាន់តារាសម្តែងជួរមុខ ស៊ីន យូប៊ីន ជុំវិញរឿងថៃឈ្លានពានទឹកដីខ្មែរដោយសកម្មភាពរបស់នាងពុំបានធ្វើមហាជនពេញចិត្តឡើយ។ ជាមួយនឹងមតិរិះគន់ទៅកាន់តារាស្រីរូបនេះអ្នកនាង ចន ច័ន្ទលក្ខណា បានលើកឡើងថាទង្វើរបស់ ស៊ីន យូប៊ីន មហាជនរិះគន់មិនខុសនោះទេ។
តាមរយៈគណនីមួយបានបង្ហោះនៅលើបណ្តាញសង្គមថា «ឈប់តាមជាន់បង Yubin ទៅមិនមែនគាត់មិនចង់និយាយទេ តែមកពីមាត់គាត់វៀច យល់ !»។ ពាក្យសម្តីនេះអ្នកនាង ចន ច័ន្ទលក្ខណា ដែលជាអតីតប្រធានសមាគមសិល្បករខ្មែរបានចែករំលែកបន្តភ្ជាប់មកជាមួយនឹងពាក្យពេចន៍ថា«ដំបូងខ្ញុំជឿថាផេកគាត់ខូចមែន ហើយខែមុនខ្ញុំឃើញគាត់បង្ហោះរូបស្លៀកឈុតរៀបការនៅកោះមួយ ខ្ញុំគិតថាផេកគាត់ដំណើរការវិញហើយ បន្ទាប់មកពេលសង្គ្រាមកើតឡើងម្តងទៀតផេកគាត់ក៏ស្ងាត់ម្តងទៀតដែរ មហាជនក៏ចេញរិះគន់គាត់ទៀត ហើយក៏ឃើញផេកគាត់លុបរូបនៅលើកោះចោលវិញ ទង្វើបែបនេះមហាជនរិះគន់អត់ខុសទេ»។ 
គួរឱ្យដឹងថា តារាស្រី ស៊ីន យូប៊ីន បានរងប្រតិកម្មពីមហាជនជុំវិញសង្គ្រាមខ្មែរថៃដោយចោទប្រកាន់ថានាងពុំហ៊ាននិយាយពីការឈ្លានពានរបស់ថៃមកលើកម្ពុជាឡើយ។ ស៊ីន យូប៊ីន ធ្លាប់បានបញ្ជាក់ថាហ្វេកប៊ុករបស់នាងខូចដោយបច្ចុប្បន្ននាងបង្ហោះនៅលើតែទិកតុកនិង IG ។ ក្នុងពេលថៃឈ្លានពានកម្ពុជាជាលើកទី២នេះ ស៊ីន យូប៊ីន បានបង្ហាញវីដេអូដែលកុមាររត់ចេញពីសាលារៀន ប្រាសាទបំផ្លាញ និងសុំភាពយុត្តិធម៌។ យ៉ាងណាសំណេររបស់ ស៊ីន យូប៊ីន ត្រូវបានគេចង្អុលបង្ហាញថាពុំបាននិយាយចំៗពីថៃឈ្លានពានខ្មែរនោះទេ។ ក្រៅពីចេញវីដេអូនៅលើ iG ស៊ីន យូប៊ីន បានចេញវីដេអូមួយទៀតដោយបួងសួងឱ្យកងទ័ពជួរមុខសុខសុវត្ថិភាពនិងសម្តែងការដឹងគុណដល់កងទ័ពជួរមុខ។ 
ជាមួយនឹងស្ថានភាពរសើបអ្នកលេងអ៊ីនធឺណិតបានជីកកាយការបង្ហោះតារាសម្តែងថៃម្នាក់កាលពីឆ្នាំ២០១៩ ដែលនិយាយថា ស៊ីន យូប៊ីន គឺជាកូនកាត់ ថៃ វៀតណាម និងកម្ពុជា។ នេះទើបជំរុញឱ្យមតិសាធារណៈកាន់តែរិះគន់នាងកាន់តែខ្លាំងដោយយល់ថានេះជាមូលហេតុនាងដែលនាងមិននិយាយពីការឈ្លានពានរបស់ថៃ។ ទោះយ៉ាងណា នេះគ្រាន់តែជាការសន្និដ្ឋាននិងសង្ស័យរបស់អ្នកលេងបណ្តាញសង្គមប៉ុន្តែការពិតនៅពីក្រោយយ៉ាងណានោះពុំទាន់មានអ្នកណាដឹងច្បាស់ឡើយ៕
