បវរកញ្ញា ឆន ស្រីណេត បានចេញវីដេអូមួយបន្ទាប់ពីឃើញមានការកើនឡើងនៃការនិយមរាំបែកស្លុយល្បីសុះសាយនៅលើបណ្តាញសង្គម។ ជាមួយនឹងការព្រួយបារម្ភ ស្រីណេត បានបញ្ចេញទស្សនៈផ្ទាល់ខ្លួនទៅលើចំណុចដែលកំពុងក្តៅគគុកនេះ។
នៅថ្ងៃទី១ ខែធ្នូ ឆន ស្រីណេត បានបង្ហោះវីដេអូភ្ជាប់មកជាមួយនឹងចំណងជើងថា «ពួកយើងគ្រប់គ្នាមានតួនាទីការពារព្រលឹងដូនតាជាតិខ្មែរទាំងអស់គ្នា»។ ក្នុងវីដេអូនេះ ស្រីណេត បាននិយាយថា មួយរយៈមកនេះនាងឃើញវប្បធម៌បែកស្លុយឡើងខ្ពស់ខ្លាំងចំណែកឯវប្បធម៌ខ្មែរមានការធ្លាក់ចុះ។ ការនិយាយនេះ ស្រីណេត ថាមិនមែនជាការរិះគន់ព្រោះនេះជាសិទ្ធិរបស់បុគ្គលម្នាក់ៗតែអ្វីដែលធ្វើឱ្យមានការព្រួយបារម្ភគឺខ្លាចមានការកើតឡើងនៅពេលអនាគត។ ក្នុងនោះ ស្រីណេត បានរំលេចថាចង្វាក់បែកស្លុយយុវជនឆាប់ចាប់បានលឿនខ្លាំងចំណែកឯចង្វាក់ប្រពៃណីខ្មែរមិនសូវឃើញមានច្រើនឡើយ។
បវរកញ្ញាមានដើមកំណើតមកពីខ្មែរកម្ពុជាក្រោមរូបនេះបានបន្តទៀតថានាងមិនបានប្រៀបធៀបអ្វីនោះទេប៉ុន្តែក្មេងៗនៅកម្ពុជាក្រោមទាំងក្មេងទាំងចាស់ស្រលាញ់ចូលចិត្តនូវចង្វាក់ប្រពៃណីខ្មែរហើយចេះសឹងតែគ្រប់គ្នា និងថែរក្សាវប្បធម៌បានល្អ។ ការស្រលាញ់និងឱ្យតម្លៃអ្វីដែលខ្មែរកំពុងតែមាននៃវប្បធម៌ខ្មែរដែលមានព្រលឹងដូនតាស្ថិតនៅ នោះជាអ្វីដែលយើងត្រូវការថែរក្សា។
ឆន ស្រីណេត បានលើកឡើងទៀតថាប្រសិនជានៅទឹកដីមួយភ្លេចវប្បធម៌ប្រពៃណី នោះព្រលឹងជាតិក៏បាត់ដូចគ្នាហើយការនិយាយនេះមិនមែនមានន័យថាខ្មែរក្រោមល្អជាងខ្មែរកណ្តាល ខ្មែរលើអ្វីនោះទេ ជាខ្មែរតែមួយត្រូវថែរក្សាទាំងអស់គ្នា។ TOP5 Miss Universe Cambodia 2024 បាននិយាយថាទំពាំងឥឡូវចាប់ផ្តើមវង្វេង ឆាប់ចាប់បានអ្វីដែលអាក្រក់ៗហើយមិនសូវឱ្យតម្លៃអ្វីដែលកំពុងមាន។
ជាមួយនឹងការព្រួយបារម្ភវប្បធម៌ខ្មែរមានការធ្លាក់ចុះ ស្រីណេត ក៏បានលើកឧទាហរណ៍ពីប្រទេសជិតខាងខំលួចចម្លងវប្បធម៌របស់ខ្មែរក៏ព្រោះគេឱ្យតម្លៃ ខណៈដែលយើងមានហើយបែរជាមិនសូវឱ្យតម្លៃទៅវិញ។ ការបញ្ចេញទស្សនៈនេះ ឆន ស្រីណេត សង្ឃឹមថាវប្បធម៌បែកស្លុយនឹងមានការកាត់បន្ថយហើយលើកតម្កើនអ្វីៗដែលល្អនៃវប្បធម៌ខ្មែរដូចជាចង្វាក់ប្រពៃណី ភាសានិយាយ។ បវរកញ្ញារូបនេះបានលើកឡើងទៀតថាមនុស្សប្រៀបដូចជាកោសិកា កាលណាដែលកោសិកាខូច១ហើយនឹងឆ្លងម្តងបន្តិចៗទៅកោសិកាផ្សេងទៀត ប៉ុន្តែបើរួមដៃគ្នាជុសជុលកែលម្អឡើងវិញវានឹងប្រសើរឡើង៕
