លោក រស់ រាជ្ជសាល ស្វាមីបច្ចុប្បន្នរបស់ថៅកែពេជ្រ ទ្រី ដាណា បានបង្ហោះសារលើកទឹកចិត្តភរិយារបស់ខ្លួនបន្ទាប់ពីរងការខកចិត្តយ៉ាងធ្ងន់ធ្ងរដោយការស្រលាញ់និងជួយខុសមនុស្ស។ លើសពីនេះទៅទៀតអតីតអ្នកសិល្បៈរូបនេះបានកោតសរសើរទឹកចិត្តល្អរបស់ភរិយា ខ្លួនដែលតែងតែមានក្តីស្រលាញ់ចំពោះអ្នកដទៃ។
កាលពីថ្ងៃទី២៨ ខែវិច្ឆិកា លោក រស់ រាជ្ជសាល បានបង្ហោះរូបជាមួយលោកស្រី ទ្រី ដាណា អមដោយពាក្យពេចន៍លើកទឹកចិត្តថា «ជូនចំពោះប្រពន្ធសម្លាញ់ អូនល្អពេកហើយ ។ ការជួយមនុស្សខុស មិនមែនមានន័យថាអូនល្ងង់នោះទេ តែវាបញ្ជាក់ថាបេះដូងអូនធំទូលាយ និងបរិសុទ្ធប៉ុណ្ណា។ កុំឱ្យទង្វើអាក្រក់របស់គេ មកបំផ្លាញទឹកចិត្តដ៏ល្អរបស់អូនណា៎។ បងនៅក្បែរអូនជានិច្ច ។ ធ្វើបុណ្យជាមួយមនុស្សខុស គឺបានត្រឹមតែការខកចិត្ត តែយ៉ាងហោចណាស់យើងបានធ្វើហើយដោយចិត្តស្មោះ។ កុំស្តាយក្រោយអី អូនធ្វើបានល្អបំផុតហើយ ប្រពន្ធសម្លាញ់។
លោក បន្តទៀតថា «អ្នកឱ្យ តែងតែដេកលក់ស្កប់ស្កល់ជាងអ្នកទទួលដែលមិនដឹងគុណ។ចាត់ទុកថាជាការសន្សំបុណ្យទៅចុះណា៎។ ប្តីនៅក្បែរប្រពន្ធគ្រប់ពេល»។ លោក រស់ រាជ្ជសាល បានបន្ថែមក្នុងខម្មិនទៀតថា «បងជាប្តីអូន បងដឹងច្បាស់ពីទំហំក្តីស្រឡាញ់អូនចំពោះអ្នកដទៃដែលមិនចង់បានការតបស្នងមកវិញគ្រាន់តែចង់ឃើញគេជោគជ័យគឺក្តីសុខណាស់ហើយ»។
គួរឱ្យដឹងរយៈពេលចុងក្រោយនេះអ្នកលេងបណ្តាញសង្គមមានការចាប់អារម្មណ៍ច្រើនទាក់ទងនឹងរឿងរបស់លោកស្រី ទ្រី ដាណា និងស្រ្តីម្នាក់ដែលថៅកែអនឡាញរូបនេះជួយពីដើមទីប៉ុន្តែពេលនេះរងការចោទប្រកាន់ថាទៅប្រម៉ូតផលិតផលឱ្យក្រុមហ៊ុនសត្រូវរបស់លោកស្រី ទ្រី ដាណា។ បន្ទាប់ពីបង្ហាញការខកចិត្តធ្ងន់ធ្ងររបស់ខ្លួន អ្នកនាង ទ្រិញ ផល្លា រួមទាំងគីម យ៉ាយ៉ា បានចេញវីដេអូទម្លាយពីអត្តចរិតរបស់លោកស្រី ទ្រី ដាណា ព្រោះអ្នកទាំងពីរធ្លាប់ធ្វើការឱ្យអ្នកជំនួញរូបនេះ៕
