ឯកឧត្តម សៅ សុខា បញ្ជាឲ្យបើកការស៊ើបអង្កេតលើមេអាវុធហត្ថខេត្តក្រចេះជុំវិញអំពើពុករលួ.យ

រាជធានីភ្នំពេញ៖ នាយឧត្ដមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស បានបញ្ជាឲ្យមានការបង្កើតក្រុមការងារចំពោះកិច្ចមួយ ដើម្បីធ្វើការស៊ើបអង្កេតលើការបំពេញតួនាទី-ភារកិច្ចរបស់មេបញ្ជាការកងរាជអាវុធហត្ថខេត្ដក្រចេះ ជុំវិញអំពើពុករលួយជាពិសេសពាក់ព័ន្ធនឹងបទល្មើសព្រៃឈើ ។

ក្រោយសេចក្ដីសម្រេចរបស់ នាយឧត្ដមសេនីយ៍ សៅ សុខា នៅថ្ងៃទី២៧ ខែវិច្ឆិកា ឆ្នាំ២០២៥នេះ ក្រុមការងារចំពោះកិច្ចមួយត្រូវបានបង្កើតឡើង ដើម្បីធ្វើអធិការកិច្ចនិងត្រួតពិនិត្យនូវសកម្មភាពមិនប្រក្រតី នៃការប្រតិបត្ដិតួនាទី-ភារកិច្ចរបស់មេបញ្ជាការកងរាជអាវុធហត្ថខេត្ដក្រចេះ ក្រោយមានការផ្សព្វផ្សាយថា មេអាវុធហត្ថរូបនេះ មានជាប់ជំពាក់នឹងរឿងពុករលួ.យ ។

ការផ្សព្វផ្សាយនោះ គឺត្រូវបានចែកចាយតាមរយៈការបង្ហោះវីដេអូឃ្លីបរបស់ប្រធានសមាគមយុវជនស្រឡាញ់ធម្មជាតិ លោក តាន់ គីមសួរ នៅលើបណ្ដាញសង្គមហ្វេសប៊ុកកាលពីថ្ងៃទី២៦ ខែវិច្ឆិកា ឆ្នាំ២០២៥ នៅពេលដែលោកបានតាមទាន់ករណីរថយន្ដដឹកឈើខុសច្បាប់ រួចលោករាយការណ៍ទៅអាជ្ញាធរមានសមត្ថកិច្ច ប៉ុន្ដែបែរជាត្រូវលោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ ឱ្យកូនចៅមកសួរនាំរកលិខិតបេសកកម្ម និងចង់ហៅរូបលោកទៅសាកសួរទៅវិញ។

បើតាមលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស ក្រុមការងារចំពោះកិច្ចនេះ មានភារកិច្ចត្រួតពិនិត្យនូវសកម្មភាព មិនប្រក្រតី នៃការប្រតិបត្តិតួនាទី ភារកិច្ច របស់មេបញ្ជាការកងរាជអាវុធហត្ថខេត្តក្រចេះ។ ក្នុងសេចក្ដីសម្រេចបង្កើតក្រុមការងារចំពោះកិច្ចនេះ លោក សៅ សុខា បានសង្កត់ធ្ងន់ថា៖ «ក្រុមការងារ មានសិទ្ធិជួបពិភាក្សា ជាមួយអាជ្ញាធរ ស្ថាប័ន និងអង្គភាព ដែលមានការពាក់ព័ន្ធ និងចេញលិខិតអញ្ជើញនាយទាហាន នាយទាហានរង និងពលទាហាន នៃកងរាជអាវុធហត្ថ ព្រមទាំងអ្នកដែលមានការពាក់ព័ន្ធមកសាកសួរ បំភ្លឺ ដើម្បីស្រាវជ្រាវរកឱ្យឃើញការពិតជាក់ស្ដែង»។

បើតាមលោក តាន់ គីមសួ ដដែលបានបង្ហើបថា កាលពីខែឧសភាកន្លងទៅ លោកបានដាក់លិខិតប្ដឹងទៅអង្គភាពប្រឆាំងអំពើពុករលួយ(ACU) ស្នើសុំបើកការស៊ើបអង្កេតទៅលើលោកឧត្តមសេនីយ៍ត្រី សាក់ សារ៉ាង ម្ដងរួចមកហើយ ដោយបញ្ជាក់ថា លោកឧត្តមសេនីយ៍ត្រីរូបនេះ មានទំនាក់ទំនងជាមួយមេឈ្មួញឈើដ៏ល្បីឈ្មោះម្នាក់ឈ្មោះ ហាច ស្ថិតនៅឃុំហានជ័យ ស្រុកឆ្លូង ខេត្ដក្រចេះ ក្នុងការចរាចរផលអនុផលព្រៃឈើខុសច្បាប់។

តែទោះជាយ៉ាងណា ជុំវិញសំណុំរឿងនេះ ACU មិនអាចផ្ដល់ព័ត៌មានលម្អិតពីដំណើរការស៊ើបអង្កេតបានឡើយ ព្រោះកំពុងស្ថិតក្នុងនីតិវិធី។ នេះបើតាម ការបញ្ជាក់របស់លោក សយ ច័ន្ទវិចិត្ត អ្នកនាំពាក្យ ACU ប្រាប់សារព័ត៌មានឌីជីថលថ្មីៗ នៅរសៀលថ្ងៃទី២៧ ខែវិច្ឆិកានេះ៕