បន្ទាប់ពីតស៊ូជាមួយនឹងជំងឺមហារីកអស់រយៈពេលជាង១ឆ្នាំពេលនេះកុមារ ពន្លឺ វីរ:បុត្រ ហៅ ឆលី បានលាចាកលោកលែងទទួលរងការឈឺចាប់ទៀតហើយ។ ដំណឹងដ៏ក្រៀមក្រំនេះបានធ្វើឱ្យបុគ្គល្បីឈ្មោះនិងអ្នកសិល្បៈជាច្រើនរូបបង្ហាញការសោកស្តាយជាខ្លាំង។
នៅថ្ងៃទី២ ខែវិច្ឆិកា ឆ្នាំ២០២៥ កុមារ ឆលី បានលាចាកលោកក្នុងអាយុ៥ឆ្នាំដោយសារតែជំងឺមហារីកខួរក្បាលដំណាក់ទី៤។ ឆលី បានធ្លាក់ខ្លួនក្នុងស្ថានភាពជំងឺនេះកាលពីចុងឆ្នាំ២០២៣ ដោយមានអាការៈក្អួតរហូតដល់ខែកុម្ភៈ ឆ្នាំ២០២៤ ទើបដឹងលទ្ធផលថាមានដុំសាច់ដុះចំនៅស្នូលខួរក្បាល។ មុននឹងលាចាកលោក កុមារដ៏កម្សត់នេះបានស៊ូទ្រាំព្យាបាលជំងឺយ៉ាងខ្លាំងដោយសម្រាកព្យាបាលនៅប្រទេសថៃរួមទាំងប្រទេសម៉ាឡេស៊ី។
ដំណឹងដ៏សែនក្រៀមក្រំនេះបានធ្វើឱ្យមហាជននិងអ្នកក្នុងចង្កោមសិល្បៈជាច្រើនរូបបានសម្តែងការអាណិតអាសូរនិងសោកស្តាយយ៉ាងខ្លាំងចំពោះការចាកចេញរបស់ ឆលី។ ប៉ីប៉ី ឌី បានបង្ហោះសារថា «ដំណឹងដ៏សែនក្រៀមក្រំ Charlie ក្មេងដ៏រឹងមាំ អូនឈប់ឈឺទៀតហើយ Fly high Charlie។ តារាចម្រៀង ពេជ្រ សូលីកា បានចូលរួមរំលែកទុក្ខថា «កូនអើយ មីងសូមឱ្យជាតិក្រោយ នឹង គ្រប់ៗជាតិខាងមុខរបស់ក្មួយ ឱ្យក្មួយជួបតែរឿងល្អៗ មានសុខភាពល្អពេញមួយជីវិតក្មួយ អាចធ្វើអីដែលក្មួយចង់ធ្វើ សូមឱ្យក្មួយអាយុវែងគ្រប់ៗជាតិ ណាក្មេងពូកែ ក្មួយពូកែខ្លាំងណាស់ ក្មួយដឹងទេ»។
ស្រីស្អាត ឡូរីន បានបង្ហោះថា «I’m crying ជាតិក្រោយសូមឱ្យអូនសុខភាពល្អ អាយុវែងណា Rest well oun»។ អ្នកនាង គង់ ចាន់ស្រីមុំ បានចូលរួមរំលែកទុក្ខដោយក្តីសោកស្តាយថា «ពេលទទួលទូរសព្ទពីប៉ាម៉ាក់ឆលី ពិតជាស្ទើរតែមិនជឿ លឿនពេកហើយក្មួយ ពិបាកទទួលយកណាស់ សូមចូលរួមរំលែកទុក្ខផងបងទាំងពីរ គ្រប់គ្នាខំអស់ពីលទ្ធភាពហើយ យ៉ាងណាក៏គាត់ទៅបានសុខហើយ ក្មួយឈប់ពិបាកទៀហើយ»។
មិនត្រឹមតែសិល្បករ សិល្បការិនី ដែលបានរៀបរាប់ខាងលើនេះប៉ុណ្ណោះទេ ដែលបង្ហាញអារម្មណ៍សោកសៅចំពោះ ឆលី នៅមានមហាជននិងអ្នកក្នុងចង្កោមសិល្បៈជាច្រើនរូបទៀតបានបង្ហាញការអាណិតអាសូរយ៉ាងខ្លាំងចំពោះកុមារ ឆលី៕
