កុំបោះចោលឲ្យសោះ! ចេកទុំជោរខ្លាំងមានអត្ថប្រជោជន៍ជាច្រើនចំពោះសុខភាព

បើនិយាយពីផ្លែឈើដែលសម្បូរជីវជាតិ និងមានសារសំខាន់ចំពោះសុខភាព បន្ទាប់ពីផ្លែប៉ោម នោះគឺផ្លែចេក។ ចេក ពោរពេញទៅដោយសារធាតុចិញ្ចឹមដូចជាវីតាមីន ជាតិសរសៃ កាល់ស្យូម ជាតិដែក និងប៉ូតាស្យូម។ ប្រជាជនខ្មែរភាគច្រើនចូលចិត្តច្នៃវាទៅជាបង្អែម ឬនំ ដូចជា បង្អែមចេកខ្ទិះ ចេកចៀន ឬចេកឆាបជាដើម ចំណែកខ្លះយកចេកខ្ចីធ្វើជាថ្នាំ និងម្ជូរក៏មាន។

យ៉ាងណាមិញ នៅពេលដែលចេកទុំពេក សំបករបស់វាក្លាយជាពណ៌ខ្មៅ ឬពណ៌ត្នោត មនុស្សភាគច្រើនគិតថាវាខូច រលួយមិនហ៊ានញាំ រួចយកបោះចោល។ តែពួកគេមិនដឹងទេថា ចេកកាន់តែទុំជោរកាន់តែផ្តល់អត្ថប្រយោជន៍ជាច្រើនដល់រាងកាយ។ ពិតណាស់ ចេកទុំពេកមានផ្ទុកសារធាតុ tryptophan ច្រើន ដែលជួយកាត់បន្ថយភាពតានតឹង និងការថប់បារម្ភ។ ក្រៅពីនេះ ចេកទុំពេកក៏សម្បូរទៅដោយសារធាតុប្រឆាំងអុកស៊ីតកម្មដែលអាចជួយកម្ចាត់ជំងឺជាច្រើនផងដែរ។

ខាងក្រោមនេះជាហេតុផលដែលអ្នកមិនគួរបោះចេកទុំជោរចោល៖

១.ការពារកោសិកាពីការខូចខាត៖ ចេកទុំពេកសម្បូរទៅដោយសារធាតុប្រឆាំងអុកស៊ីតកម្ម។ នៅពេលអ្នកញ៉ាំវា នឹងជួយជំរុញភាពស៊ាំដែលការពារជំងឺជាច្រើន។ មិនត្រឹមតែប៉ុណ្ណោះ ចេកទុំជោរក៏ជួយការពារកោសិកាពីការខូចខាតផងដែរ។

២.មានប្រយោជន៍សម្រាប់សុខភាពបេះដូង៖ ចេកទុំពេកក៏មានប្រយោជន៍សម្រាប់សុខភាពបេះដូងផងដែរ! ពួកវាសម្បូរទៅដោយសារធាតុរ៉ែដូចជាប៉ូតាស្យូម និងម៉ាញ៉េស្យូម ដែលជួយក្នុងការគ្រប់គ្រងសម្ពាធឈាម។ បន្ថែមពីនេះ កូឡេស្តេរ៉ុលក៏ត្រូវបានកាត់បន្ថយដោយការញ៉ាំចេកទុំជោរ ហើយ ហានិភ័យនៃជំងឺបេះដូងក៏កាត់បន្ថយផងដែរ។។

៣.ងាយរំលាយ៖ ម្សៅដែលមាននៅក្នុងចេកទុំពេកត្រូវបានបំលែងទៅជាជាតិស្ករសេរី ដែលធ្វើឱ្យវាងាយរំលាយ។ ដោយការញ៉ាំវា រាងកាយក៏ទទួលបានថាមពលភ្លាមៗផងដែរ ជាពិសេសអ្នកដែលមានប្រព័ន្ធរំលាយអាហារខ្សោយគួរតែញ៉ាំចេកទុំច្រើន។

៤.បំបាត់អាការៈក្រហាយទ្រូង៖ បញ្ហាក្រហាយទ្រូងអាចត្រូវបានដោះស្រាយផងដែរ ដោយការញ៉ាំចេកទុំពេក។ តាមពិតទៅ ពួកវាដើរតួជាថ្នាំបន្សាបអាស៊ីត។ លក្ខណៈសម្បត្តិដែលមាននៅក្នុងចេកទុំពេក គឺការពារស្រទាប់ខាងក្នុងនៃក្រពះពីអាស៊ីតដែលបង្កគ្រោះថ្នាក់។

៥.ការពារជំងឺមហារីក៖ សារធាតុពិសេសមួយប្រភេទត្រូវបានបង្កើតឡើងនៅក្នុងសំបកចេកទុំពេក ដែលត្រូវបានគេហៅថា កត្តាធ្វើឲ្យកោសិកាមហារីកងាប់(tumour necrosis factor)។ វាដំណើរការដោយការពារការរីករាលដាលនៃជំងឺមហារីក និងកោសិកាមិនប្រក្រតីផ្សេងទៀតពីការលូតលាស់។ ទោះជាយ៉ាងណា ការអះអាងនេះមិនទាន់មានការគាំទ្រពីអ្ននវិទ្យាសាស្ត្រនៅឡើយទេ។

៦.បំបាត់ការឈឺចាប់សាច់ដុំ៖ ប្រសិនបើអ្នកមានបញ្ហាឈឺសាច់ដុំ អ្នកគួរតែទទួលទានចេកទុំឱ្យបានច្រើន ព្រោះវាសម្បូរទៅដោយប៉ូតាស្យូម ដែលជួយបំបាត់ការឈឺចាប់សាច់ដុំ និងរមួលក្រពើ៕