ប្រិយមិត្តមួយចំនួនជ្រាបមកហើយថាអ្នកចម្រៀងរ៉េប Goofy បានរងនូវរឿងអាស្រូវជំពាក់លុយមិនសងខណៈលោកក៏បានចេញមកសារភាពនិងសុំម្ចាស់បំណុលទុកពេលឱ្យខ្លួនដោយសន្យាថាមិនរត់គេចឡើយ។ ថ្មីៗនេះ Goofy ក៏បានផ្តល់បទសម្ភាសន៍ពីការខ្ចីលុយនិងបញ្ជាក់ពីទំនួលខុសត្រូវក្នុងនាមជាឪពុកនិងគ្រួសារតូចរបស់ខ្លួន។
ជុំវិញរឿងបំណុលក្នុងកម្មវិធី B TALENT Goofy បាននិយាយថាដោយសារតែលោករំពឹងបានលុយពីខាងនេះមកប៉ុន្តែមិនទាន់ដល់ថ្ងៃហើយក៏កៀកដល់ថ្ងៃសម្រាលកូនទើបមិនអាចចាំតទៅទៀតក៏បានរត់រកលុយគេយកមកទិញសម្ភារៈកូន។ ខុសពីអ្នកដទៃ Goofy បានឱ្យដឹងថារូបគេទិញសម្ភារៈសម្រាប់សម្រាលកូនមុនថ្ងៃកើតតែ១សប្តាហ៍ប៉ុណ្ណោះ ដោយក្តីរំពឹងថានឹងបានលុយពីនោះយកមកសងគេប៉ុន្តែទីបំផុតលុយនោះលោកមិនបានឡើយ។
ជាមួយនឹងបទសម្ភាសន៍នេះ Goofy បាននិយាយខ្លួនលោកមានអាយុ២៥ឆ្នាំហើយ ចង់ថាលោកក្មេងក៏បានប៉ុន្តែលោកមិនអាចធ្វើជាឪពុកចោលម្សៀតពេលនៅជាមួយគ្នា មានកូន ហើយប្រាប់គូស្នេហ៍ថាមិនទាន់ចង់បានកូននោះទេ ដូច្នេះលោកធ្វើជាប្តីគេត្រូវមានទំនួលខុសត្រូវ។ Goofy បន្តទៀតថាលោកបាននិយាយជាមួយនឹងគូស្នេហ៍ហើយទោះបីជាអ្នកទាំងពីរមិនទាន់បានរៀបការជាមួយគ្នាតែសំខាន់អាចរកលុយបានបង្កើតកូននោះជាសុភមង្គលពិត។ 
អ្នកចម្រៀងរ៉េបរូបនេះថា ខ្លួនអាចមានសមត្ថភាពរកលុយបង្កើតកូនបាន ទៅថ្ងៃខាងមុខក៏អាចមានសមត្ថភាពរៀបចំពិធីមង្គលការដូចគ្នា ជាក់ស្តែងខ្លួនមានសមត្ថភាពអាចកើតកូនក្នុងមន្ទីរពេទ្យប៉ុណ្ណេះនៅមានពាក្យរិះគន់ ចុះប្រសិនរៀបការវានៅតែមានមតិរិះគន់ថាមិនទាន់ដឹងអីផងការបាត់ទៅហើយ។ អតីតបេក្ខជនលេចធ្លោក្នុងកម្មវិធី The Rapper Cambodia រូបនេះបាននិយាយទៀតថា ទាំងលោកនិងគូស្នេហ៍មិនទាន់រៀបចំខ្លួនឱ្យស្រួលបួលនោះទេប៉ុន្តែកូនរបស់អ្នកទាំងពីរវិញគឺអាចរៀបចំឱ្យស្រួលបួលបាន៕
