ប្អូនស្រី ពេជ្រ សូលីកា មានឈ្មោះថា ម៉ីជីង បានធ្វើឱ្យសាធារណជនមានការចាប់អារម្មណ៍ នាពេលថ្មីៗនេះបន្ទាប់ពីរាំបទចម្រៀង K-Pop របស់តារាចម្រៀង Jennie លះខ្លាំងមិនធម្មតាដូចអ្នករាំអាជីព។ មិនត្រឹមតែប៉ុណ្ណោះយុវតីរូបនេះក៏បានប្រកាសឈ្មោះថ្មីសម្រាប់បម្រើក្នុងអាជីពសិល្បៈហើយនឹងមានអ្វីដែលពិសេសជូនទស្សនិកជន។
«Like Jennie» គឺជាបទចម្រៀងដ៏ល្បីល្បាញរបស់ Jennie ដែលមានការគាំទ្រទូទាំងពិភពលោកនិងមានការ Cover បទនេះជាច្រើន។ ថ្មីៗនេះមានការចែករំលែកនៅលើបណ្តាញសង្គមទិកតុកអំពីប្អូនស្រីរបស់ ពេជ្រ សូលីកា ដែលបង្ហាញសមត្ថភាពសិល្បៈនៅតាមផាប់មួយកន្លែងដែលយុវតីរូបនេះកំពុងដើរតាមគន្លងរបស់បងស្រី។ ម៉ីជីង បានរាំយ៉ាងស្វាហាប់ទៅលើបទចម្រៀងរបស់ Jennie ជាមួយនឹងក្រុមរាំរបស់បងស្រីខ្លួន ខណៈអ្នកលេងបណ្តាញសង្គមបានបញ្ចេញមតិថា នាងមានដុងរាំបានល្អ។
មិនត្រឹមតែប៉ុណ្ណោះនៅថ្ងៃទី១ ខែកញ្ញា ម៉ីជីង ស្រាប់តែបានប្រកាសពីឈ្មោះលើអាជីពសិល្បៈដែលមានឈ្មោះថា BELLAMY ព្រមទាំងបញ្ជាក់ថានឹងមានអ្វីភ្ញាក់ផ្អើលជូនទស្សនិកជន ជាហេតុធ្វើឱ្យអ្នកគាំទ្រជាច្រើនមានការចាប់អារម្មណ៍។
កាលពីកន្លងមកនេះ ម៉ីជីង បានចេញបទចម្រៀង «ផ្កាឈូកកម្សត់» ជាមួយបងស្រីហើយទទួលបានមតិវិជ្ជមានពីទស្សនិកជន។ ក្នុងអំឡុងពេល ពេជ្រ សូលីកា រៀបចំកម្មវិធីប្រគំតន្រ្តីផ្ទាល់ខ្លួន ម៉ីជីង ក៏បានបង្ហាញសមត្ថភាពរបស់ខ្លួនជូនអ្នកទស្សនាផងដែរ។ ម៉ីជីង ឬ BELLAMY ត្រូវបានទស្សនិកជនសរសើរថាមានមុខមាត់ស្រស់ស្អាត ខ្យូតគួរឱ្យស្រលាញ់ ចំណែកឯអាជីពសិល្បៈអាចថាល្បីល្បាញដូចជាបងស្រីក៏ថាបាន៕
