(ភ្នំពេញ)៖ ក្រុមការងារបច្ចេកទេសអគ្គនាយកអន្តោប្រវេសន៍ បានចុះធ្វើការត្រួតពិនិត្យ និងសិក្សាវា.យតម្លៃក្នុងការដាក់បំពាក់នូវកាមេរ៉ាសុវត្ថិភាពនៅតាមប៉ុស្តិ៍នគរបាលច្រកទ្វារអន្តរជាតិកម្ពុជា-ថៃ នៅទីតាំងមួយចំនួនក្នុងខេត្តបន្ទាយមានជ័យ។
យោងតាមការចុះផ្សាយរបស់អគ្គនាយកដ្ឋានអន្តោប្រវេសន៍ បានឱ្យដឹងថានៅថ្ងៃទី២៦ដល់ថ្ងៃទី២៨ ខែសីហា ឆ្នាំ២០២៥ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តម ឧត្តមសេនីយ៍ឯក សុខ វាសនា អគ្គនាយក នៃអគ្គនាយកដ្ឋានអន្តោប្រវេសន៍ ក្រុមការងារបច្ចេកទេសអគ្គនាយកអន្តោប្រវេសន៍ បានចុះត្រួតពិនិត្យ សិក្សាវាយតម្លៃទីតាំងបំពាក់កាមេរ៉ា សុវត្ថិភាព នៅប៉ុស្តិ៍នគរបាលច្រកទ្វារអន្តរជាតិប៉ោយប៉ែត ស្ទឹងបត់ ភ្នំដី និងប៉ុស្តិ៍នគរបាលច្រកទ្វារអន្តរជាតិព្រំដោយមានការចូលរួមពីនាយប៉ុស្តិ៍ នាយរងប៉ុស្តិ៍ និងមន្រ្តីប៉ុស្តិ៍មួយចំនួន។
គួរជម្រាបថា ការបំពាក់កាមេរ៉ាសុវត្ថិភាពនៅតាមច្រកព្រំដែននេះ ត្រូវបានគេមើលឃើញថាគឺជាជម្រើសដ៏ល្អមួយក្នុងការថែរក្សានូវសុខសុវត្ថិភាព សណ្ដាប់ធ្នាប់ ព្រមទាំងអាចផ្ដល់ងាយស្រួលដល់ការតាមដានសកម្មភាពចេញ-ចូលតាមច្រកព្រំដែនបានផងដែរ។
បើទោះបីជាច្រកទ្វាព្រំដែនរវាងកម្ពុជា-ថៃ នៅបន្តបិទ និងមានការកំណត់ម៉ោងធ្វើដំណើរឆ្លងកាត់យ៉ាងតឹងរឹងក្ដី ប៉ុន្តែភាគីទាំងពីរបានឯកភាពគ្នាថានឹងកែប្រែស្ថានភាពនេះ ដើម្បីឲ្យវិលទៅរកប្រក្រតីភាពឡើងវិញនៅពេលខាងមុខនេះ។ នេះបើតាមសេចក្ដីថ្លែងការណ៍របស់ក្រសួងការពារជាតិកម្ពុជា ចេញផ្សាយបន្ទាប់ពីកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) រវាងមេបញ្ជាការយោធភូមិភាគទី៤ កម្ពុជា និង មេបញ្ជាការកងទ័ពភូមិភាគទី២ ថៃ៕
