ឥណ្ឌាស្តារទំនាក់ទំនងល្អជាមួយចិនឡើងវិញ​ក្រោយប្រទេសទាំងពីរ​បញ្ចប់ជម្លោះព្រំដែនដែលអូសបន្លាយពេលជាច្រើនឆ្នាំ

យោងតាមសេចក្តីថ្លែងការណ៍របស់ក្រសួងការបរទេសឥណ្ឌាឱ្យដឹងថា ឥណ្ឌានឹងស្តារទំនាក់ទំនងល្អជាមួយចិនជាច្រើនផ្នែក ដូចជា ៖ បើកការហោះហើរត្រង់រវាងប្រទេសទាំងពីរឡើងវិញ ជំរុញពាណិជ្ជកម្ម ការវិនិយោគ ជួញដូរនៅតំបន់ព្រំដែន៣កន្លែង និងផ្តល់ភាពងាយស្រួលក្នុងការស្នើសុំទិដ្ឋាការ ។ នេះបើតាមការផ្សព្វផ្សាយរបស់សារព័ត៌មានបរទេស នៅថ្ងៃទី២០ ខែសីហា ឆ្នាំ២០២៥ ។

សេចក្តីថ្លែងការណ៍របស់ក្រសួងការបរទេសឥណ្ឌាត្រូវបានចាត់ទុកថា គឺជាសញ្ញាវិជ្ជមានក្នុងការស្តារទំនាក់ទំនងរវាងប្រទេសទាំងពីរក្រោយពីបានប្រឈមមុខ និងប៉ះទង្គិចនៅព្រំដែនកាលពីឆ្នាំ២០២០ ខណៈជើងហោះហើរត្រង់រវាងឥណ្ឌា-ចិនត្រូវបានផ្អាកដោយសារការឆ្លងរាតត្បាតនៃជំងឺកូវីដ-១៩ ក្នុងឆ្នាំ២០២០នេះ ។

ការចេញសេចក្តីថ្លែងការណ៍របស់ក្រសួងការបរទេសឥណ្ឌា គឺក្រោយពីលោក វាំង អ៊ី រដ្ឋមន្ត្រីក្រសួងការបរទេសចិនបានធ្វើដំណើរទស្សនកិច្ចនៅទីក្រុងញូវដេលី ប្រទេសឥណ្ឌា ចំនួន២ថ្ងៃ ដើម្បីចរចាជាមួយលោក Ajit Doval ទីប្រឹក្សាសន្តិសុខជាតិរបស់ឥណ្ឌា ស្តីពីការបញ្ចប់ជម្លោះព្រំដែនដែលអូសបន្លាយពេលជាច្រើនឆ្នាំ ។

មន្ត្រីក្រសួងការបរទេសឥណ្ឌាបញ្ជាក់ថា ការចរចាបញ្ចប់ជម្លោះព្រំដែនបានលើកឡើងពីប្រធានបទជាច្រើនពាក់ព័ន្ធនឹងការដកថយកម្លាំងកងទ័ពទាំងពីរប្រទេសចេញពីតំបន់ជម្លោះនៅជួរភ្នំហិម៉ាឡៃ ការកំណត់ និងបោះបង្គោលព្រំដែន រួមទាំងពិភាក្សាពីកិច្ចការព្រំដែន ។

បើតាមសេចក្តីថ្លែងការណ៍របស់ក្រសួងការបរទេសចិនដែលផ្សព្វផ្សាយនៅថ្ងៃទី២០ ខែសីហា គឺចិន និងឥណ្ឌា បានព្រមព្រៀងគ្នាបង្កើតក្រុមការងារពិភាក្សា និងសម្របសម្រួលកិច្ចការព្រំដែន ក៏ដូចជាជំរុញការចរចាព្រំដែន ។ យន្តការនេះនឹងពង្រីកការចរចាពីតំបន់ព្រំដែនខាងកើត និងកណ្តាល ហើយប្រទេសទាំងពីរនឹងចរចាជាថ្មីពីព្រំដែនខាងលិច ដែលការចរចា គឺនៅចិន ក្នុងឆ្នាំ២០២៦ ។

នាយករដ្ឋមន្ត្រីឥណ្ឌា លោក Narendra Modi បានសរសេរក្នុងបណ្តាញសង្គម X ក្រោយពីជជែកជាមួយលោក វាំង អ៊ី រដ្ឋមន្ត្រីក្រសួងការបរទេសចិន ថា ទំនាក់ទំនងមានស្ថិរភាពរវាងឥណ្ឌា-ចិន នឹងមានសារៈសំខាន់សម្រាប់សន្តិភាព និងការរីកចម្រើនទាំងក្នុងតំបន់ ក៏ដូចជាពិភពលោក ។

គួរបញ្ជាក់ថា ការព្យាយាមពង្រឹងទំនាក់ទំនងរវាងប្រទេសទាំងពីរ គឺស្របពេលពុំអាចទាយទុកជាមុនពីគោលនយោបាយការបរទេសរបស់លោក Donald Trump ប្រធានាធិបតីអាមេរិក ។ ថ្មីៗនេះ ឥណ្ឌាប្រឈមនឹងការដំឡើងពន្ធទំនិញនាំចូលអាមេរិកខ្ពស់ ដោយសារឥណ្ឌាពុំបញ្ឈប់ទិញប្រេងឥន្ធនៈពីរុស្ស៊ី ៕