កំពូលតារាចម្រៀងដ៏មានឈ្មោះបោះសំឡេងប្រចាំប្រទេសអ្នកនាង ឱក សុគន្ធកញ្ញា បានលើកឡើងនៅលើបណ្តាញសង្គមផ្ទាល់ខ្លួនថាបេះដូងខ្មែរគឺពោរពេញទៅដោយសច្ចធម៌ គុណធម៌ ស្អាតស្អំ មិនភូតកុហក មិនចេះសម្តែង។ តារាចម្រៀងរូបនេះថាកម្ពុជាអង់អាចក្លាហាន ព្រោះបេះដូងយើងលោតក្នុងចង្វាក់តែមួយ។
ចាប់តាំងពីមានជម្លោះព្រំដែនក្តៅគគុករវាងប្រទេសកម្ពុជានិងថៃមករហូតមកទល់ពេលនេះមានស្ថានភាពធូរស្រាលបន្តិចក្តីប្រជាពលរដ្ឋខ្មែរនៅតែមានភាពសាមគ្គីជាធ្លុងមួយនៅតែបន្តជួយជាស្បៀងនិងសម្ភារៈផ្សេងៗទៅដល់ជនភៀសសឹកនិងកងទ័ពជួរមុខដដែល។ ការសាមគ្គីគ្នារបស់ប្រជាជនខ្មែរទាំងជួរមុខនិងជួរក្រោយស្រុះដៃគ្នានេះហើយទើបធ្វើឱ្យសត្រូវឈ្លានពានមិនស្រួលចិត្តខិតខំរកកលល្បិចគ្រប់សព្វបែបយ៉ាងណាដូចជារឿងល្ខោនជាពិសេសគឺការជាន់មីនដែលជាស្ទាយ៍ដដែលៗរបស់សត្រូវឈ្លានពាន។
ជាប្រទេសតូចមានបេះដូងស្លូតត្រង់ពោរពេញដោយភាពអង់អាចតារាចម្រៀង ឱក សុគន្ធកញ្ញា ក៏បានលើកឡើងថាបេះដូងខ្មែរគឺស្អាតស្អំមិនចេះសម្តែងនោះទេ។ អ្នកនាង បានរៀបរាប់ថា «បេះដូងខ្មែរ ឈាមខ្មែរ ពោរពេញទៅដោយសច្ចធម៌ គុណធម៌ ស្អាតស្អំ មិនកុហកភូតភរ មិនក្លែងបន្លំ មិនចេះសម្តែង។ ព្រោះគ្រប់យ៉ាង កូនខ្មែរ ប្រជាជនខ្មែរ ធ្វើចេញពីចិត្ត សាមគ្គីភាព ស្រឡាញ់ និងឱ្យតម្លៃគ្នា មិនថាក្នុងកាលៈទេសៈ បែបណា ពួកយើងបានខិតខំ លះបង់កម្លាំងកាយចិត្ត ទោះជាមើលទៅមិនអស្ចារ្យនៅក្នុងការគិតរបស់នរណាម្នាក់ក្នុងចំណោម ១៧.៨ លាននាក់ តែពួកយើងបានធ្វើវាចេញពីចិត្តដើម្បីជាចំណែកមួយក្នុងប្រទេសជាតិនាពេលនេះ»។ តារាចម្រៀងប្រចាំផលិតកម្មរស្មីហង្សមាសរូបនេះបានសង្កត់ធ្ងន់ថា «កម្ពុជាអង់អាចក្លាហាន ព្រោះបេះដូងយើងលោតក្នុងចង្វាក់តែមួយ»។
គួរបញ្ជាក់ផងដែរថា នៅពេលមានរឿងក្តៅគគុកតារាចម្រៀង ឱក សុគន្ធកញ្ញា កំពុងស្ថិតនៅប្រទេសអូស្ត្រាលី ហើយបានប្រើប្រាស់សំឡេងរបស់ខ្លួនជាមួយនឹងពលរដ្ឋខ្មែររស់នៅទីនោះបញ្ជាក់ទៅកាន់ពិភពលោកថាប្រទេសកម្ពុជាត្រូវការសន្តិភាពមិនត្រូវការសង្គ្រាមនោះទេ។ នៅពេលវិលត្រឡប់មកវិញតារាចម្រៀង ឱក សុគន្ធកញ្ញា ញាប់ដៃញាប់ជើងនាំយកស្បៀងជួយទៅដល់វីរកងទ័ពផងដែរ៕
