ថ្មីៗនេះ ហ្វីយ៉ាតា បេក្ខភាពបវរកញ្ញាចក្រវាលកម្ពុជាឆ្នាំ២០២៥ បាននិយាយពីទង្វើរបស់ Anne Thongprasom និងតារាពីររូបផ្សេងទៀតដែលបង្ហាញសកម្មភាពមិនគប្បី អមនុស្សធម៌។ ទោះយ៉ាងណាវីដេអូដែល ហ្វីយ៉ាតា តតាំងទៅកាន់តារាថៃស្រាប់តែទទួលបានការព្រមានពីក្រុមហ៊ុនទិកតុក ខណៈនេះមិនមែនជាលើកទី១នោះទេដែល ហ្វីយ៉ាតា ចេញមុខតតាំងជាមួយតារាថៃពោលគឺនាងបានចេញតតាំងម្តងកាលពីឆ្នាំ២០១៥រហូតដល់មានការសូមទោសមកប្រជាជនកម្ពុជា។
កាលពីយប់ថ្ងៃទី៥ សីហា ហ្វីយ៉ាតា បានចេញវីដេអូមួយដោយភ្ជាប់មកជាមួយនឹងចំណងជើងថា «ស្ទាវស្រលាញ់ជាតិសេរីចាស់ណា មិនមែនទើបតែពេលនេះទេ…»។ នៅក្នុងវីដេអូ បេក្ខភាពបវរកញ្ញារូបនេះបាននិយាយថា វីដេអូទិកតុករបស់នាងនិយាយអំពី Anne Thongprasom ត្រូវបាន Report ហើយមិនដឹងទទួលបានមកវិញឬអត់ទេ។ ជាមួយគ្នានេះ ហ្វីយ៉ាតា បានរម្លឹកកាលពីឆ្នាំ២០១៥ ពេលដែលនាងចេញតតាំងជាមួយនឹងតារាថៃ។
.png)
កាលពីឆ្នាំ២០១៥ តារាថៃបានរៀបចំកម្មវិធីខួបកំណើតដោយអ្នកចូលរួមគឺមានការតែងខ្លួនបែបបវរកញ្ញា។ តារាដែលចូលរួមគឺបានស្លៀកពាក់ស្អាតជាបវរកញ្ញានៅប្រទេសផ្សេងៗ ប៉ុន្តែមានប្អូនស្រីរបស់តារាថៃម្នាក់តែងខ្លួនជាបវរកញ្ញាខ្មែរ ប៉ុន្តែមិនមែនតែងខ្លួនឱ្យស្អាតដូចគេផ្សេងទេ គឺតែងខ្លួនបែបខ្មោច ព្រាយបិសាច ពាក់ក្រចកវែងៗ បង្ហាញថាជា Miss Cambodia។
ហ្វីយ៉ាតា បានបន្ថែមទៀតថា អំឡុងពេលនោះមានបងប្អូនជាច្រើនផ្ញើសារជូនដំណឹងឱ្យនាងខណៈពេលនោះនាងក៏កំពុងសិក្សាក្នុងទីក្រុងបាងកក ហើយក៏បានឈ្លោះតតាំងជាមួយនឹងជនជាតិគេ។ ហ្វីយ៉ាតា បានឱ្យដឹងទៀតថានាងបានយក IG របស់នាង ហើយពេលនោះមិនមានអ្នកតាមដានច្រើនដូចពេលនេះទេ ហើយបានផុសតតាំងជាមួយតារាស្រីនោះ ហើយបានដល់តារាស្រីរូបនោះ។ បេក្ខភាពបវរកញ្ញាចក្រវាលកម្ពុជាឆ្នាំ២០២៥ បានបន្ថែមទៀតថា ការផុសរបស់នាងគឺមានបងប្អូនជាច្រើនចូលទៅគាំទ្រ ខម្មិន ហើយនេះជាអ្វីដែលនាងស្រលាញ់គឺខ្មែរសាមគ្គីគ្នា ខណៈដែលមិនដល់២៤ម៉ោងផងតារាស្រីនោះបានចេញមកសូមទោសប្រជាជនកម្ពុជាតែម្តង។
ហ្វីយ៉ាតា បានឱ្យដឹងទៀតថា បន្ទាប់ពីទទួលបានការសូមទោសពីតារាស្រីរូបនោះអ្នកគាំទ្រកម្ពុជាក៏ព្រមបញ្ចប់ មិនដាក់ទោសអូសដំណើរឡើយ។ ហ្វីយ៉ាតា បានសង្កត់ធ្ងន់ថា បេះដូងខ្មែរយើងគឺបែបនេះ បើសិនជាគេមិនមកប៉ះពាល់មុនទេ មិនទៅប៉ះពាល់គេឡើយ ហើយបើសិនជាគេប៉ះពាល់ផ្លូវចិត្ត ប៉ះពាល់ផ្លូវកាយហើយគ្រាន់តែគេសម្រួល គឺសម្រួលជាមួយគេ ពោលគឺមានចិត្តធម៌។
គួរបញ្ជាក់ផងដែរថា តារាសម្តែង Anne Thongprasom តារា GL និងគ្នីគ្នាម្នាក់ទៀតបានធ្វើឱ្យមានភាពចម្រូងចម្រាសនៅលើបណ្តាញសង្គមនិងទទួលបានការរិះគន់ពីអ្នកលេងបណ្តាញសង្គមកម្ពុជាគឺដោយសារតែមានវីដេអូមួយដែលអ្នកទាំង៣យករឿងទុក្ខសោករបស់អ្នកដទៃមកធ្វើជារឿងលេងសើច៕
