អ្នកគាំទ្រទាមទារយុត្តិធម៌សម្រាប់ Lisa

ថ្មីៗនេះ សហគមន៍អ្នកគាំទ្រ Blackpink ទូទាំងពិភពលោកមានការភ្ញាក់ផ្អើលនៅពេលដែលYG បានចេញផ្សាយ Trailer ផ្លូវការដែលផ្សព្វផ្សាយដំណើរទេសចរណ៍ពិភពលោក «Deadline» របស់ Blackpink ។ យ៉ាងណាមិញវីដេអូខ្លីនេះក៏ជំរុញឱ្យមានមតិចម្រូងចម្រាសដោយសារតែអ្នកគាំទ្រទាមទារយុត្តិធម៌របស់ Lisa ព្រោះក្រុមហ៊ុនបញ្ចេញរូបភាពនាងតិចនាទីជាងសមាជិកផ្សេងទៀត។

ឈុតខ្លីៗដែលមានរយៈពេល ២៧ វិនាទីចាប់ផ្តើមដោយ Rosé ធ្វើការហៅទូរសព្ទ អមដោយវីដេអូរបស់សមាជិកនីមួយៗតាមលំដាប់លំដោយ។
ថ្វីដ្បិតតែសមាជិកម្នាក់ៗមានម៉ោងលើអេក្រង់រៀងៗខ្លួនក៏ដោយ ប៉ុន្តែមនុស្សជាច្រើនបានកត់សម្គាល់ថា Lisa មានពេលត្រឹមតែ ២ វិនាទីប៉ុណ្ណោះ ហើយមិនមានចលនាគួរឱ្យកត់សម្គាល់ ឬថតធំទូលាយដូចសមាជិកដទៃទៀតនោះទេ។

យោងតាមគេហទំព័រ Vogue Thailand ក្នុងវីដេអូនេះ Lisa ស្ទើរតែគ្មានតួនាទីអ្វីលេចធ្លោទេ បើធៀបនឹងសមាជិក ៣ នាក់ផ្សេងទៀតក្នុងក្រុម។
នេះបានប៉ះពាល់ដល់អារម្មណ៍របស់អ្នកគាំទ្រ ជាច្រើន ដែលមើលឃើញវីដេអូនេះជាការឆ្លុះបញ្ចាំងពីភាពលំអៀង ឬវិសមភាពនៅក្នុងការគ្រប់គ្រងការផ្សព្វផ្សាយរបស់ក្រុម។
«បច្ចេកទេសកាត់តឱ្យ Lisa បង្ហាញមុខក្នុងឈុតខ្លីៗដោយគ្មានបរិបទច្បាស់លាស់ បើប្រៀបធៀបទៅនឹង Jennie ដើរចូលកាមេរ៉ា Jisoo បង្ហាញមុខយ៉ាងច្បាស់ ហើយ Rosé បើកសាច់រឿងជាមួយការសន្ទនា។ រឿងនេះបានធ្វើឱ្យអ្នកគាំទ្រមួយចំនួនមានអារម្មណ៍ថា Lisa កំពុងត្រូវបានប្រព្រឹត្តដោយអយុត្តិធម៌ ឬកាត់ចេញ»។ នេះបើតាមការវិភាគ Vogue Thailand ។ នេះមិនមែនជាលើកទីមួយទេ ដែលអ្នកគាំទ្រមិនសប្បាយចិត្ត ហើយបាននិយាយថា Lisa មិនសូវបង្ហាញមុខជាងសមាជិកដទៃទៀត។

Vogue Thailand បន្ថែមថា ការកាត់តវីដេអូមិនត្រឹមតែប៉ះពាល់ដល់អារម្មណ៍អ្នកគាំទ្រប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីភាពវៃឆ្លាតក្នុងការបង្កើតខ្លឹមសារសម្រាប់សិល្បករលំដាប់ពិភពលោក ដែលរាល់វិនាទីនៃការផ្សព្វផ្សាយ ឬការបង្ហាញត្រូវបានវិភាគ ហើយរាល់ការសម្រេចចិត្តតែងតែត្រូវបានចោទសួរដោយអ្នកទស្សនាទូទៅ និង Blinks ។

ក្នុងករណីរបស់ Blackpink ដែលសមាជិកនីមួយៗមានអ្នកគាំទ្រច្រើននៅទូទាំងពិភពលោក តុល្យភាពនៃពេលវេលាចាក់បញ្ចាំងគួរតែត្រូវបានពិចារណា មិនត្រឹមតែសម្រាប់ភាពយុត្តិធម៌របស់សិល្បករខ្លួនឯងប៉ុណ្ណោះទេ ប៉ុន្តែក៏សម្រាប់រូបភាពរបស់ក្រុមហ៊ុនគ្រប់គ្រងផងដែរ។

លើសពីនេះ មតិមួយចំនួនមើលទៅលើបញ្ហានេះពីទស្សនៈអព្យាក្រឹត ដោយនិយាយថា នេះគ្រាន់តែជាឈុតខ្លីដំបូងប៉ុណ្ណោះ ដែលជាផ្នែកនៃយុទ្ធនាការ ហើយទំនងជានឹងមានខ្លឹមសារផ្សេងទៀតផ្តោតលើ Lisa នាពេលអនាគត។

ទោះជាយ៉ាងណាក៏ដោយអ្នកគាំទ្រមានអារម្មណ៍ថា រឿងនេះបានកើតឡើងជាច្រើនដង ធ្វើឱ្យលេសមិនត្រឹមត្រូវ ក្រុមហ៊ុនគ្រប់គ្រងគួរតែប្រុងប្រយ័ត្នបន្ថែមទៀតក្នុងការបង្ហាញរូបភាពសមាជិកម្នាក់ៗឱ្យស្មើគ្នា។

Vogue Thailand បានសន្និដ្ឋានថា ការរិះគន់របស់អ្នកគាំទ្រ Lisa មិនមែនវិលជុំវិញការណែនាំប៉ុន្មានវិនាទីនោះទេ ប៉ុន្តែជាការប្រមូលអារម្មណ៍អ្នកគាំទ្រចំពោះក្រុមហ៊ុនគ្រប់គ្រង YG ហើយសង្ឃឹមថាសិល្បករដែលពួកគេចូលចិត្តនឹងទទួលបានភាពយុត្តិធម៌ជាមួយសមាជិកដទៃទៀតនៃក្រុម។

ប្រសិនបើបញ្ហានេះមិនត្រូវបានដោះស្រាយ ឬបញ្ជាក់ដោយក្រុមហ៊ុនទេ វាអាចប៉ះពាល់ដល់មុខមាត់របស់ពួកគេក្នុងរយៈពេលយូរ។ ប្រហែលជាក្រុមហ៊ុនត្រូវដោះស្រាយយ៉ាងហ្មត់ចត់ចំពោះភាពចម្រូងចម្រាសដែលបានកើតឡើងជាច្រើនឆ្នាំមកហើយ៕