សមាជិកបរាជ័យរបស់ ILLIT ត្រូវបានគេរំពឹងថានឹងបង្ហាញខ្លួននៅក្នុងក្រុមចម្រៀងស្រី ថ្មីរបស់ YG

ផលិតកម្ម YG Entertainment កំពុងតែធ្វើឱ្យមានការរំជើបរំជួល នៅពេលដែលខ្លួនបានទម្លាយគម្រោងការបង្ហាញខ្លួនក្រុមចម្រៀងស្រីថ្មីត្រឹមតែ១ ឆ្នាំបន្ទាប់ពី Baby Monster បានចាប់ផ្តើមសកម្មភាពរបស់ពួកគេ។

ផលិតករប្រតិបត្តិលោក Yang Hyun Suk បាននិយាយថា ក្រុមចម្រៀងស្រីដែលមានសមាជិកចំនួន ៤ នាក់ត្រូវបានកំណត់ ហើយនឹងណែនាំសមាជិកម្នាក់ៗទៅកាន់សាធារណៈជនម្តងមួយៗ។ សមាជិកដំបូងគេរំពឹងថានឹងប្រកាសនៅថ្ងៃទី ២៨ ឧសភា។

យោងតាមលោក Yang ក្រុមហ៊ុនកំពុងពិចារណាចេញបទចម្រៀងទោលសម្រាប់សមាជិកម្នាក់ៗនៃក្រុមចម្រៀងនារីនៅឆ្នាំក្រោយ។ លោកបានកត់សម្គាល់ថា ការសម្រេចចិត្តបង្កើតក្រុមដែលមានសមាជិកបួននាក់គឺផ្អែកលើភាពស៊ីចង្វាក់ដ៏អស្ចារ្យរបស់ពួកគេ។ ការប្រកាសនេះបានធ្វើឱ្យមនុស្សជាច្រើនភ្ញាក់ផ្អើល ដោយសារតែក្រុមចម្រៀងស្រី Baby Monster របស់ YG ទើបតែបង្ហាញខ្លួននៅឆ្នាំ ២០២៣ ប៉ុណ្ណោះ ខណៈ YG កម្របង្ហាញក្រុមលឿនយ៉ាងនេះណាស់ជាពិសេសក្រុមដែលមានភេទដូចគ្នា។
ក្រុមចម្រៀងស្រីដំបូងរបស់ YG គឺក្រុម 2NE1 ដែលបានបង្ហាញខ្លួនក្នុងឆ្នាំ ២០០៩ បន្ទាប់មកគឺក្រុម Blackpink ក្នុងឆ្នាំ ២០១៦ ហើយ ក្រុម Baby Monster ដែលបានបង្ហាញខ្លួនក្នុងខែវិច្ឆិកា ឆ្នាំ២០២៣ ។

ទោះជាយ៉ាងណាក៏ដោយផលិតករ Yang Hyun Suk បានពន្យល់ថា ថ្មីៗនេះ YG បានរៀបចំឡើងវិញនូវវិធីសាស្រ្តគ្រប់គ្រងរបស់ខ្លួន ដើម្បីឆ្លើយតបទៅនឹងការព្រួយបារម្ភរបស់អ្នកគាំទ្រ ដែលឆ្លុះបញ្ចាំងពី «សិល្បករ YG ចេញអាល់ប៊ុមយឺតពេក» នៅក្នុងអាជីពរបស់ក្រុមនីមួយៗ។ជាមួយគ្នានេះ លោកបានបង្ហើបថា ពេលនេះ YG មានបំណងពន្លឿនការបង្ហាញខ្លួនក្រុមថ្មី និងអនុញ្ញាតឱ្យសិល្បករជាច្រើនផ្សព្វផ្សាយក្នុងពេលតែមួយ។

ពាក្យចចាមអារ៉ាមអំពីអត្តសញ្ញាណរបស់សមាជិកទាំងបួននាក់នៃក្រុមចម្រៀងស្រីថ្មីរបស់ YG ក៏មានការចាប់អារម្មណ៍ផងដែរ។ ឈ្មោះដ៏លេចធ្លោមួយដែលមានពាក្យចចាមអារ៉ាមក្នុងក្រុមគឺ Youngseo សមាជិកដែលបរាជ័យរបស់ ILLIT ។ Youngseo ត្រូវបានគេស្គាល់ពីដំបូងសម្រាប់តួនាទីជាបេក្ខនារីក្នុងកម្មវិធី «RU Next?» ដោយ JTBC និងសហការជាមួយ BELIFT LAB (ក្រោម HYBE Group) ។

Youngseo ទទួលបានចំណាត់ថ្នាក់លេខ ២ ហើយមានលក្ខណៈសម្បត្តិគ្រប់គ្រាន់ក្នុងការបង្ហាញខ្លួនជាលើកដំបូងជាសមាជិកក្រុមចម្រៀងស្រី ILLIT ។
ទោះជាយ៉ាងណាក៏ដោយ ប៉ុន្មានខែក្រោយមក ក្រុមហ៊ុនគ្រប់គ្រងបានប្រកាសថា នាងបានចាកចេញពីក្រុមបន្ទាប់ពីមានការព្រមព្រៀងគ្នាក្នុងការបញ្ចប់កិច្ចសន្យា។ មិនមានហេតុផលជាក់លាក់ណាមួយត្រូវបានផ្តល់ឱ្យសម្រាប់ការចាកចេញរបស់នាងទេ។
បន្ទាប់ពីនោះមក មានពាក្យចចាមអារ៉ាមថា បានចុះហត្ថលេខាជាមួយ The Black Label ដែលជាក្រុមហ៊ុនបុត្រសម្ព័ន្ធរបស់ YG ហើយទំនងជានឹងបង្ហាញខ្លួនក្នុងក្រុមចម្រៀងស្រី MEOVV ។

ទោះបីជា Youngseo មិនត្រូវបានបញ្ចេញឈ្មោះនៅក្នុងក្រុម MEOVV ក៏ដោយ ក៏នាងត្រូវបានគេនិយាយថាបានបង្ហាញខ្លួននៅជិតអគារ YG ហើយត្រូវបានអមដំណើរដោយសិក្ខាកាមស្រីជាច្រើនទៀត។ នេះបានបង្កឱ្យមានពាក្យចចាមអារ៉ាមថា Youngseo ជាសមាជិកម្នាក់ក្នុងចំណោមសមាជិកទាំងបួននៃក្រុមចម្រៀងស្រីថ្មីរបស់ YG៕