អូនផ្កាយ ជាអតីតតារាសម្តែងនិងជោគជ័យលើរបររកស៊ីលក់បាញ់ត្រាងបានធ្វើឱ្យមហាជនសង្ស័យថាទំនាក់ទំនងប្តីប្រពន្ធរបស់នាងកំពុងប្រឈមនឹងរឿងប្រេះឆាកមានបញ្ហានឹងគ្នា។ ការសង្ស័យនេះដោយសារតែទស្សនិកជនបានឃើញថារូបនាងបង្ហាញភាពក្រៀមក្រំឈឺចាប់ស្រក់ទឹកភ្នែកនិងពាក្យពេចន៍មួយចំនួនទៀត។
រយៈពេលថ្មីៗចុងក្រោយនេះ អូនផ្កាយ បានធ្វើឱ្យមហាជនចាប់អារម្មណ៍ថារូបនាងមានភាពក្រៀមក្រំខុសពីធម្មតាជាមនុស្សដែលកំពុងខូចចិត្ត។ នៅលើបណ្តាញសង្គមនាថ្ងៃទី១១ ឧសភា អូនផ្កាយ បានបង្ហោះសំណេរខ្លីមួយថា «បើបន្ដទៅមុនមិនបានទេ យើងបញ្ចប់ក៏ល្អដែរ»។ ក្រោយមកអតីតតារាស្រីស៊ិចស៊ីរូបនេះបានបង្ហោះរូបភាពមួយសន្លឹកជារូបភាពគ្រួសារប៉ុន្តែបានបាំងមុខប្តីរបស់ខ្លួន ព្រមទាំងភ្ជាប់មកជាមួយនឹងចំណងជើងថា «អរគុណរាល់ការចងចាំ អរគុណសម្រាប់ពេលវេលាកន្លងមកដែលពួកយើងបានសាងវាដោយក្ដីស្រលាញ់ តែបើពួកយើងបញ្ចប់ក៏សុំត្រឹមតែការចងចាំល្អៗបានហើយ»។
ការបង្ហោះនេះបានធ្វើឱ្យមនុស្សជាច្រើនសង្ស័យថានាងនិងប្តីរបស់ខ្លួនកំពុងឈ្លោះប្រកែកមានបញ្ហានឹងគ្នា។ យ៉ាងណាមានអ្នកគាំទ្រជាច្រើនដែលតាមដានអ្នកទាំងពីរបានលើកទឹកចិត្តដោយឱ្យពួកគេគិតសាជាថ្មីកុំអាលសម្រេចចិត្តនៅពេលដែលកំពុងមានកំហឹងនៅក្នុងខ្លួន គួរនឹកទៅដល់ការតស៊ូជាមួយគ្នាកន្លងមក។
ភាពសោកសៅរបស់ អូនផ្កាយ បានលាតត្រដាងជាបន្តទៀតជានឹងការបង្ហោះវីដេអូមួយនាថ្ងៃទី១២ ជាមួយនឹងចំណងជើងថា «សុខចិត្តឈឺខ្លាំងប្រសើរជាងឈឺរាល់ថ្ងៃ»។ ក្នុងវីដេអូរយៈពេលជិត១នាទី អូនផ្កាយ បាននិយាយយ៉ាងកម្សត់ថា ក្នុងការចាកចេញរបស់មនុស្សម្នាក់ៗមិនមែនសុទ្ធតែការឈឺចាប់ទាំងអស់នោះទេ ដោះលែងគេឱ្យគេមានសេរីភាពមានក្តីសុខប្រសើរជាងបៀមទុក្ខឱ្យគេនៅជាមួយយើង ហើយមិនសមហេតុផលដែលឃាត់មនុស្សដែលចង់ទៅ…។
នៅលើផ្នែក Story វិញ អូនផ្កាយ ក៏ហាក់ចង់បញ្ជាក់ថានាងមិនបានសម្តែងនោះទេ។ នាងបានសរសេរថា «កុំលេងសើចជាមួយខ្ញុំច្រើន កុំធ្វើឱ្យគេយល់ច្រឡំថាខ្ញុំសម្តែង»។ ទោះយ៉ាងណា ងាកទៅកាន់លោក ឡាយ ដេវិដស្មីត ជាប្តីរបស់អូនផ្កាយវិញហាក់មិនបង្ហាញអ្វីនៅលើបណ្តាញសង្គមនោះឡើយ។
អូនផ្កាយ និង លោក ឡាយ ដេវិដស្មីត បានសាងស្នេហាចំពោះគ្នាជាច្រើនឆ្នាំមកហើយដោយអ្នកទាំងពីរមានកូនពីរនាក់ជាចំណងដៃ។ ទស្សនិកជនបានកត់សម្គាល់ឃើញថាអ្នកទាំងពីរមានភាពផ្អែមល្ហែមចំពោះគ្នាជាពិសេសគឺការតស៊ូលើមុខរបរហើយបានធ្វើឱ្យរបរបាញ់ត្រាងផ្អើលពេញប្រទេសកាលពីមួយរយៈមុន។ ទស្សនិកជនមួយផ្នែកថាប្រសិនជាអ្នកទាំងពីរបែកគ្នាមែនពួកគេមានភាពសោកស្តាយព្រោះឃើញតស៊ូជាមួយគ្នាជាយូរមកហើយ៕
