ក្រោយផ្តល់ឱកាសមកថតជាថ្មី នាយព្រែក ទូន្មាន ក្តិប កុំឱ្យធ្វើអត្តចរិតឆ្មើងឆ្មៃជាមួយអ្នកគាំទ្រ

ដូចមហាជនមួយចំនួនជ្រាបមកហើយថា នាយព្រែក បានផ្តល់ឱកាសឱ្យ ក្តិប បានថតកំប្លែងម្តងទៀតបន្ទាប់ពីខកខានជិតមួយ១ឆ្នាំដោយប្រកាន់ច្រើនដោយតែ ក្តិប នៅក្មេង។ បន្ទាប់ពីទទួលបានឱកាសវិលមកថតជាថ្មីនេះ នាយព្រែក ក៏បានទូន្មាន ក្តិប កុំឱ្យប្រកាន់ភ្ជាប់អត្តចរិតឆ្មើងឆ្មៃជាមួយនឹងអ្នកគាំទ្រ។

ថ្មីៗនេះ នាយព្រែក បានបង្ហោះវីដេអូជាង១នាទីដោយឱ្យ ក្តិប ជម្រាបសួរ ទីកូ និងតារាសម្តែងលោក ទេព រិនដារ៉ូ ដោយបង្ហាញថា ក្តិប ចាប់ផ្តើមថតជាមួយក្រុមលោកវិញហើយដោយ នាយព្រែក ឱ្យ ក្តិប សូមទោស លោក ទេព រិនដារ៉ូ ប្រសិនបើកន្លងមកនេះមានអ្វីខុសឆ្គងពាក្យពេចន៍លើសលួស។ ក្នុងវីដេអូនេះ នាយព្រែក បាននិយាយថាលោកបានឃើញខម្មិនក្នុងវីដេអូ អ្នកមួយចំនួនខម្មិនថា ពេលជួបនៅក្រៅ ក្តិប រាងខ្មឺត រឹក លោកមិនដឹងថាជាការពិតឬអត់ទេ។

នាយព្រែក ក៏បាននិយាយបន្ថែមថាបើសិនជានៅក្រៅ ក្តិប ហៅមិនឮមិនបានងាកឬមួយធ្វើទឹកមុខមិនសូវសប្បាយចិត្តកុំប្រកាន់ដោយមិនភ្លេចណែនាំ ក្តិប កែប្រែចំណុចខ្វះខាតទាំងនេះបើសិនជានៅក្រៅមានគេសុំថតឬគេលេងនិយាយជាមួយទៅរួសរាយរាក់ទាក់ជាមួយគេ។ នាយព្រែក ថាខ្លួនមិនចង់ឱ្យមានពាក្យគេថា សមាជិកក្រុមរបស់ខ្លួននៅក្រៅមានចរិតនៅក្រៅអ៊ីចេះអ៊ីចុះ ខ្មឺត ។

ជុំវិញការទូន្មាននេះ នាយព្រែក ក៏បានលើកជាឧទាហរណ៍ជាក់ស្តែងមកកាន់តារាសម្តែងជើងចាស់លោក ទេព រិនដារ៉ូ ដែលមានភាពល្បីល្បាញរាប់ឆ្នាំនៅតែមិនសាបដោយសារតែអត្តចរិតរបស់លោក ទេព រិនដារ៉ូ មិនចេះឆ្មើងឆ្មៃដាក់អ្នកគាំទ្រ។

គួរឱ្យដឹងថា ការផ្តល់ឱកាសឱ្យ ក្តិប វិលមកសម្តែងកំប្លែងខ្លីសាជាថ្មីបន្ទាប់ពីខកខានជិត១ឆ្នាំ នាយព្រែក បានទម្លាយមូលហេតុខ្លះៗថាក្តិបមកថតប៉ុន្តែមកដេកដាស់មិនងើប និងចំណុចមួយចំនួនទៀត៕