ប្រជាប្រិយភាពរបស់ Trump ធ្លាក់ចុះមុនពេលកាន់តំណែងជាប្រធានាធិបតីអាមេរិកបាន១០០ថ្ងៃ

សហរដ្ឋអាមេរិក ៖ លោក Trump បានកាន់តំណែងជាប្រធានាធិបតីអាមេរិកម្តងទៀតក្រោយទទួលសំឡេងឆ្នោតច្រើនបំផុត ប៉ុន្តែតាមលទ្ធផលការស្ទង់មតិពលរដ្ឋអាមេរិកចំនួន១,៦៧៨នាក់ ចាប់ពីថ្ងៃទី១៧ ដល់ថ្ងៃទី២៤ ខែមេសា ឆ្នាំ២០២៥ ដោយ CNN សម្ភាសន៍តាមអនឡាញ និងទូរស័ព្ទបង្ហាញថា ប្រជាប្រិយភាពរបស់លោក Trump ធ្លាក់ចុះមុនកាន់តំណែងអាណត្តិទី២ បាន១០០ថ្ងៃ ។ លើសពីនេះ ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗដែលកើតឡើងនៅអាមេរិក ។

ការស្ទង់មតិរបស់ CNN ដែលធ្វើឡើងដោយអង្គការស្រាវជ្រាវ SSRS បានចុះផ្សាយកាលពីថ្ងៃទី២៧ ខែមេសា ឆ្នាំ២០២៥ គឺពលរដ្ឋអាមេរិកទទួលស្គាល់លទ្ធផលការងាររបស់លោក Trump ស្មើត្រឹម៤១% ប៉ុណ្ណោះ ។ វាជាអត្រាទាបបំផុតសម្រាប់ប្រធានាធិបតីអាមេរិកដែលទើបឈ្នះឆ្នោត និងកាន់តំណែងមិនដល់១០០ថ្ងៃ បើគិតចាប់ពីការកាន់តំណែងរបស់ប្រធានាធិបតីអាមេរិក លោក Dwight D. Eisenhower កាលពីជាង៧០ឆ្នាំមុន ។

ការទទួលស្គាល់លទ្ធផលការងាររបស់លោក Trump បានធ្លាក់ចុះ៤% ចាប់ពីខែមីនា ដល់ចុងខែមេសា ឆ្នាំ២០២៥ និងធ្លាក់ចុះ៧% បើគិតចាប់ពីចុងខែកុម្ភៈ កន្លងមក ។ ពលរដ្ឋស្មើត្រឹម២២% ប៉ុណ្ណោះ ដែលទទួលស្គាល់លទ្ធផលការងាររបស់លោក ដែលនេះជាអត្រាទាបបំផុត ខណៈពលរដ្ឋ៤៥% មិនទទួលស្គាល់លទ្ធផលការងារលោក ។

ពលរដ្ឋបានផ្តល់ពិន្ទុទាបសម្រាប់ការដោះស្រាយបញ្ហាផ្សេងៗរបស់លោក Trump ហើយទំនុកចិត្តរបស់ពលរដ្ឋទៅលើសមត្ថភាព និងការដោះស្រាយវិបត្តិសេដ្ឋកិច្ចរបស់លោកក៏ធ្លាក់ចុះដែរ ។ វិធានការដំឡើងពន្ធទំនិញរបស់លោកបណ្តាលឱ្យមានការលក់ចេញក្នុងទីផ្សារភាគហ៊ុន ហើយពលរដ្ឋបារម្ភពីតម្លៃទំនិញកើនឡើង ខណៈពលរដ្ឋត្រឹម៣៥% ទទួលស្គាល់ការដោះស្រាយអតិផរណា ធ្លាក់ចុះ៩% រីឯការទទួលស្គាល់វិធានការពន្ធធ្លាក់ចុះ៤% ។

ពលរដ្ឋឆ្លើយតបការស្ទង់មតិ ស្មើ៥២% មានទំនុកចិត្តលើសមត្ថភាពដោះស្រាយបញ្ហាសេដ្ឋកិច្ចរបស់លោក Trump ដែលធ្លាក់ចុះរហូតដល់១៣% ពីការស្ទង់មតិរបស់ CNN កាលពីខែធ្នូ ឆ្នាំ២០២៤ ។ ការផ្តល់ពិន្ទុរបស់ពលរដ្ឋទៅលើការគ្រប់គ្រងរដ្ឋាភិបាល ធ្លាក់ចុះ៦% នៅសល់ត្រឹម៤២% តាំងពីខែមីនា ឆ្នាំ២០២៥ ដោយសារលោក Trump ព្យាយាមកាត់បន្ថយមន្ត្រីរាជការយ៉ាងច្រើន ។ អ្នកឆ្លើយតបការស្ទង់មតិ៤៣% យល់ថា លោក Trump បានបំពេញការងារសម្រាប់ការផ្លាស់ប្តូររដ្ឋាភិបាល ខណៈអ្នកឆ្លើយ៥៧% យល់ថា លោកពុំចាំបាច់ធ្វើទេ ពីព្រោះនាំឱ្យប្រទេសធ្លាក់ក្នុងវិបត្តិ ។

ចំណែកគោលនយោបាយការបរទេសរបស់លោក Trump ដូចជា៖ អាមេរិកធ្វើជាមិត្តជាមួយរុស្ស៊ីក្នុងការធ្វើសង្គ្រាមនៅអ៊ុយក្រែន, ការឈប់ផ្តល់ជំនួយក្រៅប្រទេស គឺពលរដ្ឋត្រឹម៣៩% ប៉ុណ្ណោះដែលគាំទ្រលោក ខណៈពលរដ្ឋ៦០% ពុំគាំទ្រ ហើយពលរដ្ឋមួយចំនួនតូចមានទំនុកចិត្តលើការដោះស្រាយបញ្ហាការបរទេស ។

ការដោះស្រាយបញ្ហាជនភៀសខ្លួនរបស់លោក Trump ក៏ទទួលការគាំទ្រតិចពីពលរដ្ឋដែរ គឺពលរដ្ឋត្រឹម៤៥% ប៉ុណ្ណោះដែលគាំទ្រលោកឱ្យបណ្តេញជនភៀសខ្លួន ធ្លាក់ចុះ៦% បើធៀបនឹងខែមីនា ឆ្នាំ២០២៥ ។ ប៉ុន្តែលោក Trump ទទួលបានពិន្ទុខ្ពស់ពីពលរដ្ឋ គឺការដោះស្រាយបញ្ហាយេនឌ័រ និងមនុស្សកែភេទ ដែលពលរដ្ឋ៥១% គាំទ្រចំណាត់ការរបស់លោក ។

ពលរដ្ឋយល់ថា លោក Trump បានប្រើប្រាស់អំណាចប្រធានាធិបតីគ្មានការទទួលខុសត្រូវ ពីព្រោះលោកចេញបទបញ្ជាច្រើនដើម្បីផ្លាស់ប្តូររដ្ឋាភិបាល និងប្រឈមជាមួយការប្តឹងក្នុងតុលាការ ។ ពលរដ្ឋជាង៥២% ជឿថា ការកាន់តំណែងអាណត្តិទី២ របស់លោក Trump នឹងធ្វើឱ្យអាមេរិកឈានទៅរកការផ្លាស់ប្តូរយូរអង្វែង ខណៈពលរដ្ឋ៣៦% ជឿថា ការផ្លាស់ប្តូរនានានឹងបញ្ចប់ក្រោយលោក Trump អស់អាណត្តិ ហើយពលរដ្ឋ១២% ជឿថា លោកដឹកនាំប្រទេសពុំរីកចម្រើន ៕