ខឹងចិត្តផលិតមិនស្តង់ដា Huang Zitao នឹងចូលទីផ្សារផលិតសំឡីអនាម័យនៅក្នុងប្រទេសចិន

Huang Zitao អតីតសមាជិកក្រុម EXO បានក្លាយជាប្រធានបទដ៏ក្តៅគគុកបន្ទាប់ពីប្រកាសថាលោកនឹងចូលទីផ្សារផលិតផលអនាម័យស្ត្រីនៅក្នុងប្រទេសចិន។ ការសម្រេចចិត្តរបស់តារារូបនេះ បានកើតឡើងបន្ទាប់ពីការផ្សាយដ៏គួរឱ្យភ្ញាក់ផ្អើលមួយបានលាតត្រដាងពីការអនុវត្តដ៏គួរឱ្យរន្ធត់នៃក្រុមហ៊ុនដែលលក់បន្តនូវសំឡីអនាម័យ និងក្រណាត់កន្ទបទារកពីម៉ាកល្បីៗមិនមានលក្ខណៈស្តង់ដាគ្រប់គ្រាន់គិតផលចំណេញច្រើនជាងសុខភាពមនុស្ស។

យោងតាមប្រព័ន្ធផ្សព្វផ្សាយចិន Huang Zitao បានបញ្ចេញមតិរបស់ខ្លួនទាក់ទងនឹងឧប្បត្តិហេតុ «ការប្រើបន្ទះសំឡីអនាម័យឡើងវិញ» ដ៏ចម្រូងចម្រាសនាពេលថ្មីៗនេះនៅក្នុងប្រទេសចិន។ កាលពីថ្ងៃទី ១៥ ខែមីនា ទូរទស្សន៍កណ្តាលចិន (CCTV) ដែលគ្រប់គ្រងដោយរដ្ឋនៃកម្មវិធីការពារសិទ្ធិអ្នកប្រើប្រាស់ពិសេស បានលាតត្រដាងការពិតនៃក្រុមហ៊ុនកែច្នៃកាកសំណល់ដែលវេចខ្ចប់ និងលក់បន្តនូវសំឡីអនាម័យ និងក្រណាត់កន្ទបទារកពីម៉ាកល្បីៗ។

នៅពេលនោះ ការផ្សាយបានធ្វើឱ្យមានការភ្ញាក់ផ្អើលជាខ្លាំង ខណៈដែលវាបានបង្ហាញនូវក្រណាត់កន្ទបទារក និងបន្ទះអនាម័យពាសពេញកម្រាលឥដ្ឋ ហើយក្រណាត់កន្ទបទារក និងក្រណាត់អនាម័យដែលរើសចេញពីគំនរសំរាមកំពុងត្រូវបានវេចខ្ចប់ឡើងវិញ។ កាកសំណល់ត្រូវបានលក់តាមរយៈផ្សារទំនើបអនឡាញ ហើយក្រុមហ៊ុនត្រូវបានគេរកឃើញថាបានកើបប្រាក់ចំណេញប្រហែល ៣០ ដងនៃតម្លៃដើម។ សកម្មភាពនេះ Huang Zitao បានរិះគន់យ៉ាងខ្លាំងនៅក្នុងការផ្សាយផ្ទាល់កាលពីថ្ងៃទី៦ មេសា ដោយនិយាយថា «វាមិនអាចទទួលយកបានទេសម្រាប់ក្រុមហ៊ុនដែលលះបង់សុខភាពស្ត្រីដើម្បីប្រាក់ចំណេញ»។

បន្ទាប់មកតារាប្រុសរូបនេះបានសម្រេចចិត្តសាងសង់រោងចក្រដើម្បីដោះស្រាយបញ្ហាទាំងនេះ ដោយសន្យាថានឹងធ្វើការផ្សាយបន្តផ្ទាល់ ២៤ម៉ោងក្នុងមួយថ្ងៃ។ លោកក៏បានប្រកាសផងដែរអំពីផែនការនៃដំណើរការទាំងមូល ចាប់ពីលទ្ធកម្មវត្ថុធាតុដើម រហូតដល់ការវេចខ្ចប់ រហូតដល់ការគ្រប់គ្រងសាធារណៈ។ ការលើកឡើងរបស់ Huang Zitao នេះបានជំរុញឱ្យអ្នកនិយមលេងអ៊ីនធឺណិតបានប្រតិកម្មខុសគ្នាថាតារាប្រុសរូបនេះនឹងចូលទីផ្សារផលិតផលសំឡីអនាម័យសម្រាប់ស្ត្រី។

ខណៈពេលដែលអ្នកនិយមលេងអ៊ីនធឺណិតមួយចំនួនបានគាំទ្រលោកយ៉ាងសកម្ម និងបានស្នើឱ្យលោក «ផលិតសំឡីប្រកបដោយសុវត្ថិភាព និងអនាម័យដល់អ្នកប្រើប្រាស់អាចប្រើប្រាស់ដោយភាពជឿជាក់» អ្នកផ្សេងទៀតបានរិះគន់ Huang Zitao ថាគ្រាន់តែប្រើភាពចម្រូងចម្រាសលើរឿងនេះដើម្បីធ្វើអាជីវកម្ម»។

Huang Zitao បានបដិសេធការចោទប្រកាន់នេះដោយនិយាយថា «ខ្ញុំបានចាប់ផ្តើមទាក់ទងអ្នកផ្គត់ផ្គង់ក្រដាសអនាម័យកាលពីប៉ុន្មានខែមុន»។ លោកក៏បានពន្យល់ផងដែរ ភរិយាលោកគឺ Xu Yiyang និងសមាជិកក្រុមស្ត្រីរបស់ពួកគេបានសាកល្បងផលិតផលនេះអស់រយៈពេល ៩០ ថ្ងៃ។

Zitao បានសង្កត់ធ្ងន់ថា «ខ្ញុំមិនអាចធានាបានថាផលិតផលគ្មានបញ្ហានោះទេ ប៉ុន្តែខ្ញុំអាចធានាចំពោះអ្នកថា សំឡីអនាម័យដែលខ្ញុំផលិតគឺពិតជាស្អាត និងមានសុវត្ថិភាព»។
អ្នកនិយមលេងអ៊ីនធឺណិតមួយចំនួនរំពឹងថាការផ្លាស់ប្តូរចុងក្រោយរបស់ Zitao នឹងមានឥទ្ធិពលវិជ្ជមានក្នុងការដាក់សម្ពាធលើក្រុមហ៊ុនដែលមានស្រាប់ឱ្យបង្កើនតម្លាភាពនៅក្នុងដំណើរការផលិតផលិតផលរបស់ពួកគេ។

ទីផ្សារផលិតផលអនាម័យរបស់ចិនត្រូវបានញាំញីដោយភាពចម្រូងចម្រាសជាច្រើនទាក់ទងនឹងបញ្ហាគុណភាពក្នុងប៉ុន្មានឆ្នាំថ្មីៗនេះ។ ជាពិសេសផលិតផលអនាម័យស្ត្រីមានទំនាក់ទំនងផ្ទាល់នឹងសុខភាព ដូច្នេះអ្នកប្រើប្រាស់មានការព្រួយបារម្ភយ៉ាងខ្លាំង។ មនុស្សជាច្រើនកំពុងយកចិត្តទុកដាក់លើការផ្លាស់ប្តូរអ្វីដែលជាបញ្ហាប្រឈមចុងក្រោយរបស់ Zitao នឹងនាំមកក្នុងឧស្សាហកម្មនេះ និងថាតើលោកអាចដឹងពីដំណើរការផលិតកម្មប្រកបដោយតម្លាភាពដែលលោកសន្យាដែរឬទេ៕