តិចអត់ដឹង! អ្នកពូកែនិយាយនឹងមានអាយុវែងជាងមនុស្សទូទៅរហូតដល់៩ឆ្នាំ

កាលពីថ្ងៃទី២០ ខែមីនា ឆ្នាំ២០២៥ លោក សុរ៉ាត់ តាន់ប្រាវេត គ្រូពេទ្យឯកទេសខួរក្បាល និងប្រព័ន្ធប្រសាទនៅសាកលវិទ្យាល័យវេជ្ជសាស្ត្រខេត្តឈៀងម៉ៃ ប្រទេសថៃ បានចែកចាយព័ត៌មានគួរឱ្យចាប់អារម្មណ៍មួយក្នុងហ្វេសប៊ុក ដោយលោកបានដកស្រង់ការស្រាវជ្រាវរបស់ Berlin Aging Study បង្ហាញថា ៖ «សមត្ថភាពការនិយាយយ៉ាងស្ទាត់ជំនាញ បង្ហាញថា នឹងមានអាយុវែង» ។

លោក សុរ៉ាត់ ឱ្យដឹងថា អ្នកពូកែនិយាយ ឬនិយាយយ៉ាងស្ទាត់ជំនាញនឹងមានអាយុវែង ពីព្រោះការនិយាយត្រូវប្រើប្រាស់ខួរក្បាលជាច្រើនផ្នែក ។ ពេលមានវ័យចាស់ អាយុច្រើន ខួរក្បាលពុំសូវចងចាំ គឺយើងនឹងពុំអាចនិយាយស្ទាត់ជំនាញដូចមុនទេ ពុំអាចនិយាយពាក្យខ្លះ ហើយនេះបង្ហាញពីអាយុរបស់យើងយូរប៉ុនណា ។ តើការនិយាយជួយឱ្យយើងមានអាយុវែងដូចម្តេច? តើសមត្ថភាពការនិយាយអាចដឹងពីអាយុជីវិតដោយរបៀបណា?

តាមការស្រាវជ្រាវរបស់ Berlin Aging Study បង្ហាញថា សមត្ថភាពការនិយាយដោយបង្កើតពាក្យពេចន៍យ៉ាងឆាប់រហ័ស គឺពាក់ព័ន្ធដោយផ្ទាល់នឹងអាយុជីវិតពេលវ័យជរា ។ ការស្រាវជ្រាវបានប្រមូលទិន្នន័យសមត្ថភាពនិយាយរបស់អ្នកចូលរួមចំនួន៨ដំណាក់កាល ក្នុងរយៈពេល១៨ឆ្នាំ ហើយអ្នកចូលរួមម្នាក់ៗបានសាកល្បងកម្រិតការយល់ដឹង, ការចងចាំហេតុការណ៍, សមត្ថភាពនិយាយ និងចំណេះដឹងការនិយាយ ។ ក្រោយការសាកល្បងបង្ហាញថា អ្នកពូកែនិយាយនឹងមានអាយុវែងជាងមនុស្សទូទៅ រហូតដល់៩ឆ្នាំ ។

ការស្រាវជ្រាវនេះបានផ្សព្វផ្សាយក្នុងទស្សនាវដ្តី «Psychological Science» ដែលបានវិភាគទិន្នន័យរបស់អ្នកចូលរួមចំនួន៥១៦នាក់ ដែលមានអាយុជាមធ្យម៨៥ឆ្នាំ ហើយបានតាមដានពួកគេរយៈពេល១៨ឆ្នាំ ។ លទ្ធផលការស្រាវជ្រាវបង្ហាញថា អ្នកពូកែនិយាយនឹងមានអាយុវែងជាងមនុស្សទូទៅរហូតដល់៩ឆ្នាំ ខណៈការដំណើរការរបស់ខួរក្បាល ដូចជា ៖ ការចងចាំហេតុការណ៍ និងល្បឿនការយល់ឃើញ គឺពុំពាក់ព័ន្ធនឹងអត្រាការស្លាប់ ។

ហេតុអ្វីសមត្ថភាពការនិយាយពាក់ព័ន្ធនឹងអាយុរបស់មនុស្ស? ការស្រាវជ្រាវបង្ហាញថា សមត្ថភាពនិយាយពាក់ព័ន្ធដោយផ្ទាល់នឹងខួរក្បាលនៅផ្នែកខាងមុខ ដែលខួរក្បាលមានតួនាទីសម្រេចចិត្ត ដោះស្រាយបញ្ហា និងនិយាយភាសា ។ ខួរក្បាលផ្នែកនេះនឹងចុះខ្សោយការចងចាំពេលអាយុកាន់តែច្រើន ប្រឈមនឹងជំងឺប្រព័ន្ធប្រសាទ ហើយការធ្លាក់ចុះសមត្ថភាពនិយាយបង្ហាញពីការអន់ខួរក្បាល ដែលធ្វើឱ្យវាក្លាយជាកត្តាកំណត់អាយុ ។

លោកគ្រូពេទ្យបានណែនាំវិធីមួយចំនួនដើម្បីឱ្យក្លាយជាមនុស្សពូកែនិយាយ និងអាយុវែង រួមមាន ៖
-អានសៀវភៅ និងអាននិទានរឿងឱ្យខ្លាំងៗ
-រៀនសូត្រភាសាបរទេស ពីព្រោះការនិយាយច្រើនភាសាបានជួយពង្រឹងសមត្ថភាពខួរក្បាល និងកាត់បន្ថយការចុះខ្សោយខួរក្បាល
-ចូលរួមជាមួយសង្គមជានិច្ច ពីព្រោះការសន្ទនាជាមួយមិត្តភក្តិ និងគ្រួសារអាចជួយឱ្យខួរក្បាលនឹកឃើញពាក្យពេចន៍យ៉ាងឆាប់រហ័ស ។

ការនិយាយស្តី គឺជាអាយុជីវិត ពីព្រោះការនិយាយមានសារៈសំខាន់ដល់ខួរក្បាល និងការបញ្ជារបស់ខួរក្បាល ខណៈការហាត់និយាយ គឺជាការហ្វឹកហាត់ខួរក្បាល ។ សមត្ថភាពការនិយាយបានបង្ហាញពីសុខភាពខួរក្បាល និងដឹងពីអាយុជីវិតរបស់ខ្លួន ។ សមត្ថភាពនិយាយអាចជាគន្លឹះសំខាន់ធ្វើឱ្យយើងមានសុខភាពរឹងមាំពេលអាយុច្រើន ។ ដូច្នេះ លោកអ្នកគួរសន្ទនាជាមួយមនុស្សជាស្រឡាញ់ ពីព្រោះការនិយាយមិនត្រឹមតែធ្វើឱ្យរីករាយប៉ុណ្ណោះទេ ប៉ុន្តែវានឹងជួយឱ្យមនុស្សជាទីស្រឡាញ់អាយុវែង ។ លោក សុរ៉ាត់ និយាយថា ៖ «បើស្រឡាញ់អ្នកណាម្នាក់ ចូរនិយាយជាមួយអ្នកនោះឱ្យបានច្រើន» ៕