ថ្មីៗនេះប្រិយមិត្តអ្នកលេងបណ្តាញសង្គមមានការចាប់អារម្មណ៍យ៉ាងខ្លាំងបន្ទាប់ពី ប៉ីប៉ីឌី បានសម្តីធំទៅកាន់ភ្ញៀវដែលមកហាងកាហ្វេរបស់ខ្លួនពាក់ស្បែកជើងជាន់លើសាឡុង ស្រាប់តែរឿងកាន់តែឡើងកម្តៅបន្ទាប់ពី ប៊ុន ផាក ចេញមកបង្ហោះសំណេរ ថែមទាំងពោលពាក្យស្រីមិនចំស្រីប្រុសមិនចំប្រុស ខណៈ ប៉ីប៉ីឌី មិនឱ្យចាញ់ផ្លែផ្កាវិញថាលក់សៀវភៅជោគជ័យតែជីវិតពិតបរាជ័យ មិនមែនជាភេទទី៣តែជាជនទី៣។
ផ្ទុះរឿងរសើបជុំវិញអ្នកលួចតុក្កតានិងពាក់ស្បែកជើងជាន់សាឡុងក្នុងហាងរបស់ ប៉ីប៉ីឌី បានក្លាយជាប្រធានបទពីមួយទៅមួយហើយជាពិសេសគឺពេល ប៊ុន ផាក ចេញមកបង្ហោះសំណេរថា «ភ្ញៀវជួយគាំទ្រយើង យើងគួរតែអរគុណភ្ញៀវ មិនអាចខឹងគាត់ទេ ទោះមានរឿងអ្វីក៏ដោយ»។ ប្រយោគនេះបានជំរុញឱ្យ ប៉ីប៉ីឌី ចែករំលែកខ្លឹមសារនេះជាមួយនឹងសម្តីថា «ទ្រឹស្តីល្អ តែបើសាងល្អ គឺកាន់តែល្អ»។
មិនទាន់ចប់នោះទេអ្នកទាំងពីរកាន់តែផ្លោងពាក្យសម្តីផ្លែផ្កាឱ្យគ្នាទៅវិញទៅមក ដោយ ប៉ីប៉ីឌី បានបង្ហោះសារទៀតថា «បោកលុយមនុស្សស្រី តែនិយាយដូចអ្នកចេះដឹង ជាបាឡាំងកាស…» , ប៉ីប៉ីឌី បន្ថែមទៀតថា «ខ្លួនពូកែជេ មាត់អាក្រក់ តែ អត់ដែលមានប្រវត្តិបោកលុយទេ ជំពាក់លុយគេទេ ខ្ទើយតែប្រើសមត្ថភាពខ្លួនឯង មិនមែនប្រើខ្លួន..ជាអាជីវកម្មដូចអាពពួកប្រុសសុទ្ធមួយចំនួនទេ ខ្លួនចេះគោរព មានសីលធម៌ចំពោះមនុស្សដែលគួរគោរពអ្នកណាក៏ដោយកុំប្រឹងតាំងខ្លួនត្រឹមត្រូវខុសផ្លូវជាមួយលោក»។
បន្ទាប់ពីសំណេរ ប៉ីប៉ីឌី ក៏បានចេញវីដេអូខ្លីមួយទៀតនៅលើបណ្តាញសង្គម ខណៈ ប៊ុន ផាក វិញ បានបង្ហោះថា «សម្តីអាក្រក់បន្តិច ហើយប្រុសមិនចំប្រុស ស្រីមិនចំស្រី»។ លោកក៏បន្តជាមួយសំណេរមួយទៀតថា «ខ្ញុំទទួលខុសត្រូវនូវអ្វីដែលខ្ញុំនិយាយ តែមិនទទួលខុសត្រូវលើអ្វីដែលអ្នកគិតទេ»។
ប៊ុក ផាក បានបង្ហោះទ្រឹស្តីទៀតថា «៥ យ៉ាងបញ្ជាក់ថាអ្នកជាមនុស្សមានផ្លូវចិត្តទន់ខ្សោយ ១- និយាយច្រើនពេក មិនចេះទប់សម្តីខ្លួនឯង ២- ប្រតិកម្មខ្លាំងៗចំពោះរឿង ឬទស្សនៈដែលផ្ទុយពីការយល់ឃើញរបស់ខ្លួន ៣- ចូលចិត្តប្រើពាក្យអសុរស គ្រោតគ្រៀត ៤- គ្មានគោលការណ៍ខ្លួនឯង គេនិយាយអ្វីក៏ត្រូវ ៥- មិនហ៊ានបញ្ចេញទស្សនៈរបស់ខ្លួន»។
ប៉ីប៉ីឌី ក៏បង្ហោះបន្តគ្នាជាហូរហែថា «ស្លុតចិត្តណាស់លោកអើយ 69លាក់មុខ និងមានប្រវត្តិបោកលុយស្រី បានដៀលភេទទី3ដ៏គួរឱ្យស្រលាញ់ម្នាក់»។ ប៉ីប៉ី ឌី បង្ហោះទៀតថា «5 យ៉ាងបញ្ជាក់ថាអ្នកជាមនុស្សមានផ្លូវចិត្តរឹងមាំ ១- ទ្រឹស្តី100 តែមាយាទ0២- មិនខ្វល់ពីបុណ្យបាប បោកបានគឺបោក ៣- មិនមែនភេទទី3 តែជាជនទី3 ៤- មិនចូលចិត្តប្រើពាក្យអសុរស តែផ្អែមរលួយដើម្បីលុយ ៥- លក់សៀវភៅជោគជ័យ តែជីវិតពិតបរាជ័យ»។ សារមួយទៀតរបស់ ប៊ុន ផាក គឺបានលើកឡើងថា «គោលការណ៍របស់ខ្ញុំគឺចែករំលែកចំណេះដឹង មិនបំពុលសង្គមទេ តែយុវជនភាគច្រើន វ៉ល់តាមការបំពុលរបស់អ្នកដទៃ»។
មិនទាន់បញ្ចប់ទេ ប៉ីប៉ីឌី ក៏បានបង្ហើបប្រាប់អ្នកគាំទ្ររបស់ខ្លួនទៀតថានឹងមានឃ្លីបថ្មីព្រោះបានត្រៀមរាងកាយដ៏រឹងមាំបានត្រៀមខ្លួនរួចជាស្រេច៕
