ដកដំណែងប្រធានសាលាដំបូងតាកែវ ក្រោយដោះលែងទណ្ឌិតជាប់ទោសពីបទឃាតកម្ម

នៅថ្ងៃទី២០ ខែកុម្ភៈ ឆ្នាំ២០២៥ ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម បានចេញសេចក្តីប្រកាសព័ត៌មានស្តីពីការដាក់ទណ្ឌកម្មលើលោកស្រី ពេជ ម៉ារ៉ែន ប្រធានសាលាដំបូងតាកែវ ក្រោយដោះលែងទណ្ឌិតជាប់ទោសពីបទឃាតកម្ម។

លោកស្រី ម៉ារ៉ែន បានសម្រេច ដោះលែងទណ្ឌិត មានទោសដាក់ពន្ធនាគារកំណត់១១ឆ្នាំ ពីបទឃាតកម្ម ប្រភេទបទឧក្រិដ្ឋ ឱ្យមានសេរីភាពឡើយវិញ ខណៈទណ្ឌិតទើបអនុវត្តទោស ក្នុងពន្ធនាគារបាន៥ឆ្នាំ ១ខែ និង ២ថ្ងៃ ប៉ុណ្ណោះ។

ពាក់ព័ន្ធនឹងករណីនេះ ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម សម្រេចជាឯកឆន្ទដាក់ទណ្ឌកម្ម ថ្នាក់ទី២ ត្រង់ចំណុច “ក” និង “គ” នៃមាត្រា៥៥ នៃច្បាប់ស្តីពីលក្ខន្តិកៈនៃចៅក្រមនិងព្រះរាជអាជ្ញា ក្រោមរូបភាពផ្លាស់ដោយបង្ខំ ទៅជាអនុប្រធានសាលាដំបូងខេត្តណាមួយ ចំពោះសាមីចៅក្រមដែល បានប្រព្រឹត្តកំហុសធ្ងន់ធ្ងរនេះ។

គួរបញ្ជាក់ថា ជនដែលត្រូវបានដោះលែងដោយលោកស្រី ម៉ារ៉ែន ជាទណ្ឌិតដែលកំពុងអនុវត្តទោសឧក្រិដ្ឋ ពីបទ ឃាតកម្ម តាមអំណាចសាលដីកាស្ថាពររបស់តុលាការ។

ក្នុងករណីចាំបាច់នៃការដោះលែង តុលាការគ្មានសិទ្ធនោះទេ ក៏ប៉ុន្តែជាបុព្វសិទ្ធិរបស់ប្រមុខរាជរដ្ឋាភិបាល ក្នុងការធ្វើសំណើថ្វាយព្រះមហាក្សត្រ៕