អ្នកគាំទ្រ Ding Yuxi ទទួលបានភាគលាភពីភាពយន្តគំនូរជីវចលចិន Ne Zha 2 ដែលបានបំបែកឯតទគ្គកម្ម

បើនិយាយថាភាពយន្តគំនូរជីវចល(Animation ) បែបអភិនិហារបស់ចិន Ne Zha 2 គឺជាភាពយន្តទទួលបានជោគជ័យដ៏ធំមួយដោយរកចំណូលបាន ៨.៤ ពាន់លានយន់ប្រមាណ១.៤ពាន់លានដុល្លារនៅ Box Office បន្ទាប់ពីចេញផ្សាយនៅថ្ងៃទី២៩ មករា។ វាបានក្លាយជាភាពយន្តដែលរកចំណូលបានខ្ពស់បំផុតគ្រប់ពេលវេលារបស់ប្រទេសចិនខណៈបានចំណាយដើមទុនផលិត៨០លានដុល្លារ។

ពេលនេះ Ne Zha 2 ក៏ជាភាពយន្តមួយក្នុងចំណោមភាពយន្តដែលរកចំណូលបានច្រើនជាងគេបំផុតទាំង ៣០ នៅលើពិភពលោក ហើយជាភាពយន្តមិនមែនហូលីវូដតែមួយគត់នៅក្នុងបញ្ជី។ ខណៈផលិតកម្មទាំង៥ដែលរួមគ្នាផលិតរឿងនេះក៏ឃើញមានការឡើងថ្លៃភាគហ៊ុននិងចំណូលដែរ។ ក្រុមហ៊ុនមួយក្នុងចំនោមក្រុមហ៊ុននោះគឺមាន Beijing Enlight Media ដែលជាទីភ្នាក់ងារគ្រប់គ្រងតារាសម្តែង Ding Yuxi បានឃើញអ្នកវិនិយោគរបស់ខ្លួនទទួលបានអត្ថប្រយោជន៍ពីភាពជោគជ័យរបស់ពួកគេសម្រាប់ហេតុផលដែលមិននឹកស្មានដល់មួយ។

ជ្រកក្នុងទ្រនំនេះ Ding Yuxi បានធ្វើឱ្យមហាជនស្គាល់ស្នាដៃការសម្តែងរបស់លោកជាច្រើន ហើយដើម្បីបង្ហាញការគាំទ្រដល់តារារបស់ពួកគេ អ្នកគាំទ្ររបស់ Ding Yuxi បានទិញភាគហ៊ុនក្នុងក្រុមហ៊ុនខាងលើនេះ។ ជាមួយនឹងភាពជោគជ័យរបស់ Ne Zha 2 អ្នកគាំទ្រទាំងនេះបានរកប្រាក់ចំណេញយ៉ាងច្រើន។

ភាគហ៊ុនរបស់ក្រុមហ៊ុនបានកើនឡើង ១៣៩.០៣ ភាគរយត្រឹមតែ៦ថ្ងៃបន្ទាប់ពី Ne Zha 2 ចាក់បញ្ចាំងលើកដំបូង។ តម្លៃទីផ្សាររបស់ក្រុមហ៊ុនត្រូវបានគេរាយការណ៍ថាមានចំនួន ៥៥ពាន់លានយន់។ អ្នកគាំទ្រសំណាងទាំងនេះបាននាំគ្នាចូលបណ្ដាញសង្គមដើម្បីចែករំលែកភាពសប្បាយរីករាយ ដោយអ្នកខ្លះនិយាយថាពួកគេគ្រាន់តែទិញភាគហ៊ុនដើម្បីគាំទ្រ Ding Yuxi ដោយមិនបានរំពឹងថានឹងទទួលបានភាគលាភណាមួយសម្រាប់ការគាំទ្រតារាដែលពួកគេចូលចិត្តនោះទេ៕