ប្រទេសវៀតណាម ៖ កាលពីថ្ងៃទី១៤ ខែកុម្ភៈ ឆ្នាំ២០២៥ សារព័ត៌មានវៀតណាមរាយការណ៍ថា តម្លៃគ្រាប់កាហ្វេវៀតណាម និងពិភពលោកបានកើនឡើងខ្ពស់លើសកម្រិតអ្នកជំនាញរំពឹងទុក ហើយធ្វើឱ្យកសិករដាំកាហ្វេស្តុកកាហ្វេទុកដើម្បីកើបប្រាក់ចំណេញ ។ តម្លៃកាហ្វេនៅតំបន់ខ្ពង់រាបកណ្តាលរបស់វៀតណាម បានកើនឡើងរហូតដល់៥ដុល្លារអាមេរិកក្នុង១គីឡូក្រាម នៅសប្តាហ៍ទី២ ខែកុម្ភៈ នេះ ។
បើទោះជាតម្លៃគ្រាប់កាហ្វេនៅវៀតណាម និងទីផ្សារពិភពលោកកើនឡើងខ្លាំង ប៉ុន្តែកសិករដាំកាហ្វេនៅប្រទេសវៀតណាមនៅតែប្រុងប្រយ័ត្នក្នុងការលក់កាហ្វេរបស់ពួកគេនៅលើទីផ្សារ ដោយសារតម្លៃកាហ្វេប្រែប្រួលធ្វើឱ្យកសិករជាច្រើនពុំប្រាកដចិត្តថា តើពួកគេគួរតែលក់កាហ្វេពេលណា ទើបទទួលបានប្រាក់ចំណេញច្រើន ។
អ្នកស្រី ង្វៀន ធិឈៀន ជាកសិករដាំកាហ្វេនៅខេត្តកនទូម ប្រទេសវៀតណាម និយាយថា ក្រុមគ្រួសាររបស់អ្នកស្រីបានលក់កាហ្វេត្រឹមតែ១តោនប៉ុណ្ណោះ ក្នុងតម្លៃ៤ដុល្លារអាមេរិកក្នុង១គីឡូក្រាម ។ អ្នកស្រីបានប្រមូលកាហ្វេស្តុកទុករង់ចាំឱ្យតម្លៃកើនឡើងថែមទៀត ទើបអ្នកស្រីលក់ចេញ ។.png)
អ្នកជំនាញសន្និដ្ឋានថា តម្លៃគ្រាប់កាហ្វេវៀតណាមនឹងកើនឡើងខ្ពស់រហូតដល់ខែកក្កដា ឆ្នាំ២០២៥ តម្លៃកាហ្វេកើនឡើងនាពេលបច្ចុប្បន្ន អាចប៉ះពាល់ដល់អតិថិជន ។ អ្នកជំនាញបានដាស់តឿនកសិករកុំឱ្យចង់បានប្រាក់ចំណេញខ្លាំងពេកពីការលក់កាហ្វេ ដើម្បីចៀសវាងហានិភ័យហិរញ្ញវត្ថុ ។
ចំណែកតម្លៃគ្រាប់កាហ្វេលើទីផ្សារពិភពលោក ក៏បានកើនឡើងដែរ ដូចជា ៖ តម្លៃកាហ្វេ Robusta នៅទីក្រុងឡុងដ៍ ប្រទេសអង់គ្លេស គឺស្មើចាប់ពី៥,៥៧៣ដុល្លារ ទៅ៥,៦៩៦ដុល្លារអាមេរិកក្នុង១តោន ខណៈតម្លៃកាហ្វេ Arabica នៅទីក្រុងញូវយ៉ក សហរដ្ឋអាមេរិក បានកើនឡើងលើសនេះ ប្រមាណ៥៤០ដុល្លារអាមេរិក ។ អ្នកជំនាញសន្និដ្ឋានថា តម្លៃគ្រាប់កាហ្វេលើទីផ្សារពិភពលោក នឹងកើនឡើងដល់៩,៤៦០ដុល្លារអាមេរិកក្នុង១តោន នៅខែមីនា ឆ្នាំ២០២៥ ៕
