តារាសម្តែង Zhao Lusi ត្រូវបានគេទទួលស្គាល់ថាជាតារាស្រីដែលមានតម្លៃពាណិជ្ជកម្មខ្ពស់បំផុតក្នុងវិស័យកម្សាន្តនៅប្រទេសចិនលើសតារាស្រីរៀមច្បងមួយចំនួន។
ផ្អែកលើការស្ទង់មតិពីប្រព័ន្ធផ្សព្វផ្សាយចិន 163 ដែលពឹងផ្អែកលើការបោះឆ្នោតរបស់អ្នកប្រើប្រាស់ប្រព័ន្ធផ្សព្វផ្សាយសង្គម តារាសម្តែង Zhao Lusi ឡើងដល់កំពូលគឺមិននឹកស្មានដល់។ នាងបានវ៉ាដាច់តារាស្រីជាច្រើនដោយទទួលបានតំណែងកំពូលតាមរយៈកិច្ចសន្យាផ្សាយពាណិជ្ជកម្មដ៏សម្បូរបែប ការគាំទ្រម៉ាកយីហោ និងតួនាទីជាអ្នកនាំពាក្យ។ម៉ាកល្បី ៗ ដែលនាងតំណាងរួមមាន Versace, Bulgari និង Guerlain ។
រប្រព័ន្ធផ្សព្វផ្សាយចិនពណ៌នាថា Zhao Lusi មានរូបរាងស្រស់ស្អាត នៅអាយុ ២៧ ឆ្នាំ រូបនាងទទួលបានការបានចាប់អារម្មណ៍តាមរយៈការសម្ដែងក្នុងរឿង «The Romance of Tiger and Rose» «Dating in the Kitchen» និង «Love Like the Galaxy»។ ជាមួយនឹងភាពល្បីល្បាញរបស់នាង Zhao Lusi បានទាក់ទាញភាពជាដៃគូម៉ាកកាន់តែច្រើន។ នៅឆ្នាំ ២០២៤ នាងបានទទួលកិច្ចសន្យាជាង ២០ ជាមួយនឹងម៉ាកផ្សេងៗ ដែលនាំមុខទាំងបរិមាណ និងគុណភាព ខណៈតារាស្រី Yang Mi ជាប់ចំណាត់ថ្នាក់លេខ ២ ។ ចំណែកឯក្នុងបញ្ជីបន្តដោយ Dilraba Dilmurat, Liu Shishi, Liu Yifei, Yang Zi, Guan Xiaotong, Zhao Liying, Bai Lu និង Esther Yu ក្នុងចំណាត់ថ្នាក់ជាបន្តបន្ទាប់។
ទោះបីជា Zhao Lusi ជាប់កុងត្រាច្រើនក៏ដោយ ក៏អ្នករិះគន់ខ្លះប្រកែកថានាងមិនទាន់ទទួលបានចំណាត់ថ្នាក់កំពូលនៅឡើយ ដោយបានចង្អុលបង្ហាញពីការខ្វះខាតរបស់នាងក្នុងការផ្សាយពាណិជ្ជកម្មក្នុងវិស័យទូរស័ព្ទ និងរថយន្តដែលគួរឱ្យគោរព ដែលឆ្លុះបញ្ចាំងពីឋានៈ និងឥទ្ធិពលរបស់តារាស្រីរូបនេះ។
ដ្បិតថាជាតារាស្រីលេចធ្លោម្នាក់នៅប្រទេសចិនក្តី ប៉ុន្តែ Zhao Lusi តែងតែមានរឿងចម្រូងចម្រាសលើប្រព័ន្ធអនឡាញ ខណៈតារាស្រីរូបនេះក៏រងនូវសម្ពាធផ្លូវចិត្តរហូតមានជំងឺធ្លាក់ទឹកចិត្តជាប់ខ្លួន៕
