ថ្ងៃចុងសប្តាហ៍ចង់សម្រាកលំហែកម្សាន្តនៅជិតក្រុងមែនទេ? អាចមកទស្សានា «រមណីយដ្ឋានទំនប់ម្លេច» បាន ដែលមានទីតាំងស្ថិតនៅភូមិត្រពាំងឈើទាល ឃុំច្រេះ ស្រុកជុំគិរី ខេត្តកំពត មានចម្ងាយប្រមាណ ១០០ គីឡូម៉ែត្រប៉ុណ្ណោះពីរាជធានីភ្នំពេញ។ ដើម្បីទៅដល់គោលដៅដ៏សែនមនោរម្យនេះ ភ្ញៀវទេសចរត្រូវធ្វើដំណើរតាមផ្លូវជាតិលេខ ៣ ហើយទៅហួសចំណុចព្រំប្រទល់ខេត្តតាកែវ និងខេត្តកំពតបន្តិច នឹងបានឃើញផ្លូវបត់ស្ដាំ រួចបន្តដំណើរប្រមាណ ៥ គីឡូម៉ែត្រទៀត នោះភ្ញៀវទេសចរនឹងបានទៅដល់គោលដៅហើយ។ 
រមណីយដ្ឋានទំនប់ម្លេច កាលពីមុនគឺជាតំបន់សមរភូមិដ៏ក្ដៅមួយរវាងកងទ័ពរដ្ឋាភិបាល និងកងទ័ពខ្មែរក្រហម ប៉ុន្តែបច្ចុប្បន្នទីដ៏មានសក្ដានុពលនេះបានប្រែក្លាយជាគោលដៅទេសចរណ៍ដ៏ទាក់ទាញបំផុតប្រចាំខេត្តកំពត។ ទំនប់ម្លេចជាទំនប់ស្ទាក់ទឹកទុកបានយ៉ាងច្រើនបង្កើតបានជាបឹងដ៏ធំមួយ អមដោយជួរភ្នំព័ទ្ធជុំវិញប្រកបដោយសោភ័ណភាពស្រស់ត្រកាល និងមានទឹកបឹងថ្លាឈ្វង់គួរជាទីចាប់អារម្មណ៍។ នៅទីនេះមានទីធ្លាធំទូលាយ បរិយាកាសល្អ ខ្យល់អាកាសត្រជាក់បរិសុទ្ធ រំលេចបានជាទស្សនីយភាពយ៉ាងច្រើនអនេកតាមរដូវកាល ដែលភ្ញៀវទេសចរតែងតែទៅដកយកបទពិសោធន៍នៅទីនោះដោយមិនចេះជិនណាយ។ 
បើនិយាយពីសេវាកម្មទេសចរណ៍នៅរមណីយដ្ឋាន Mlech Adventure វិញមានដូចជា ការជិះម៉ូតូកង់បួនជុំវិញបឹង ជិះទូកកាណូតកម្សាន្តនៅលើបឹង ជិះទូកកៃយ៉ាក់នៅជិតៗតូបខ្ចុះ មានទីលានបាញ់ធ្នូកម្សាន្ត មានខ្ចុះសម្រាប់អង្គុយសម្រាកលំហែកាយ ហើយម្ហូបអាហារសុទ្ធតែមានបញ្ជីតម្លៃត្រឹមត្រូវ មិនថ្លៃពេក មិនថោកពេក សមរម្យសក្តិសមសម្រាប់ភ្ញៀវទេសចរទៅទស្សនាដោយសប្បាយរីករាយ។ 
លើសពីនេះក៏មានស្ពានបណ្ដែតទឹកដើរលេងកម្សាន្ត ទីលានបោះតង់ជិតមាត់ទឹកបរិយាកាសស្រស់ស្រាយ និងមានភោជនីយដ្ឋានបម្រើសេវាកម្មម្ហូបអាហារ ភេសជ្ជៈផងដែរ។ ក្រៅពីនេះក៏មានសេវាកម្មរៀបចំការកម្សាន្តលក្ខណៈជាក្រុម ដែលភ្ញៀវជាក្រុមរបស់ក្រុមហ៊ុន សាលារៀន ឬអង្គភាពផ្សេងៗអាចកក់ឱ្យរៀបចំជូនបាន ខណៈទីតាំងគឺធំទូលាយ និងជាបណ្ដុំសេវាកម្មទេសចរណ៍ដ៏សម្បូរបែប៕
