«ប្រាសាទភ្នំបាខែង» ជាប្រាសាទមួយស្ថិតនៅលើភ្នំធម្មជាតិ ដែលមានទីតាំងនៅចំកណ្តាលទីក្រុងយសោធរបុរៈ ឬអង្គរទី ១ ហើយស្ថិតនៅចន្លោះប្រាសាទអង្គរវត្ត និងក្រុងអង្គរធំ នៃខេត្តសៀមរាប។ ប្រាសាទនេះត្រូវបានកសាងឡើងនៅចុងសតវត្សរ៍ទី៩ និងដើមសតវត្សរ៍ទី១០ ក្នុងរាជកាលព្រះបាទយសោវរ្ម័នទី១ ដោយមាន ៧ ជាន់ គឺជាន់ក្រោម ថ្នាក់ទាំងប្រាំ និងជាន់លើ ដែលតំណាងឱ្យឋានសួគ៌ ៧ ជាន់របស់ព្រះឥន្ទនៅក្នុងទេវកថារបស់ព្រហ្មញ្ញសាសនា។ 
ដូច្នេះនៅពេលលោកអ្នកបានទៅដល់ខេត្តសៀមរាប ក្រៅពីទស្សនាប្រាសាទអង្គរវត្ត ប្រាសាទភ្នំបាខែង ក៏ជាគោលដៅទេសចរណ៍ដ៏ល្អឯកមួយដែលលោកអ្នកមិនគួររំលងនោះទេ។ ប្រាសាទភ្នំបាខែង មានតួប៉មប្រាំខ្វែងគ្នា និងមានប្រាំថ្នាក់ ស្ថិតនៅខាងឆ្វែងដៃពីប្រាសាទអង្គរវត្តទៅប្រាសាទបាយ័ន គឺជាកន្លែងដែលអាចទាក់ទាញភ្ញៀវទេសចរបានយ៉ាងច្រើនបំផុតនៅពេលថ្ងៃលិច។
ក្រៅពីទស្សនាថ្ងៃលិចដ៏ស្រស់ស្អាត លោកអ្នកក៏អាចស្វែងយល់ពីប្រវត្តិសាស្ត្រដ៏អស្ចារ្យនៃប្រាសាទ ក៏ដូចជាទស្សនានូវក្បាច់ចម្លាក់ដ៏ល្អវិចិត្រ ដើរជុំវិញប្រាសាទគយគន់ទេសភាពព្រៃភ្នំដ៏សម្បូរបែប ស្រូបយកខ្យល់អាកាសដ៏ត្រជាក់បរិសុទ្ធ ជាមួយទិដ្ឋដ៏សែនស្ងប់ស្ងាត់ រួមទាំងអាចមើលទេសភាពនៅតំបន់អង្គរស្ទើរតែទាំងមូលបានផងដែរ។ 
ប្រាសាទភ្នំបាខែងមានកំពូល ១០៩ និងមានកំពស់ ៤៥ ម៉ែត្រ ដោយជណ្តើរឡើងប្រាសាទនេះមានលក្ខណៈចោទខ្លាំង ហើយនៅតាមជណ្តើរនៃថ្នាក់ទាំង៥ គឺមានរូបសំណាក់តោឈយាមផ្លូវ។ ប្រាសាទភ្នំបាខែងមានឈ្មោះដើមថា «យសោធរគិរី» ដែលបច្ចុប្បន្នប្រាសាទនេះគឺមានប្រជាប្រិយភាពខ្លាំងណាស់ ដោយមានភ្ញៀវទេសចរគ្រប់ជាតិសាសន៍មកទស្សនាជាហូរហែ៕
