តារាសម្តែងកាចឆ្នាសដ៏ល្បីល្បាញ ស្វែង សុជាតា បានធ្វើឱ្យទស្សនិកជនភ្ញាក់ផ្អើលមិនតិចនោះទេបន្ទាប់ពីទម្លាយម្ចាស់ផលិតកម្មខ្លះមើលងាយសិល្បករ សិល្បការិនី។ អ្នកនាងពន្លះទៀតថាម្ចាស់ផលិតកម្មខ្លះមិនបើកលុយឱ្យហើយថែមទាំងប្រើពាក្យលួងលោមឱ្យទៅខ្ចីលុយអ្នកផ្សេងយកមកឱ្យទៀតនិងតោងអ្នកធំ អ្នកល្បីគេចវេសពីការពិត។
នៅយប់ថ្ងៃទី២៣ មករា តារាសម្តែង ស្វែង សុជាតា បានចេញវីដេអូរយៈពេល៩នាទីដោយបានដាក់ចំណងជើងថា «និយាយបន្តិចរឿងម្ចាស់ផលិតកម្មខ្លះដែលមើលងាយសិល្បករ សិល្បការិនីកម្ពុជា ជួយស៊ែរផងបងប្អូនអរគុណទុកជាមុន»។ ក្នុងការរៀបរាប់អ្នកនាង ស្វែង សុជាតា បានឱ្យដឹងថា ប៉ុន្មានថ្ងៃមកនេះផ្ទុះខ្លាំងរឿងម្ចាស់ផលិតកម្មមិនបើកលុយឱ្យតួសម្តែងមិនថាតួចាស់ឬតួក្មេងហើយខ្លួនអ្នកនាងក៏ធ្លាប់ជួបប្រទះរឿងនេះដូចគ្នារហូតត្រូវមានលក្ខខណ្ឌច្បាស់លាស់។
តារាសម្តែងជាតួអង្គកាចឆ្នាសរូបនេះថានៅពេលខ្លួនមានលក្ខខណ្ឌច្បាស់លាស់មិនឱ្យជំពាក់លុយយូរបំផុត២៤ម៉ោងលុយត្រូវចូលធនាគារម្ចាស់ផលិតកម្មបែរជានិយាយជាមួយនឹងម្ចាស់ Sponsor ថា ស្វែង សុជាតា ពិបាកធ្វើការជាមួយទាំងនោះជាកម្លាំងពលកម្មរបស់ខ្លួន។ តារាសម្តែងជើងចាស់រូបនេះ បន្ថែមទៀតថាបើលើសពី១២ម៉ោងត្រូវគិតចំនួន២ថ្ងៃ ឧទាហរណ៍បើថតរឿងធម្មតាមួយថ្ងៃ៣០០ដុល្លារ មានការទទូចសុំ១០០ ឬ ២០០ ប៉ុន្តែមានការកម្ម៉ង់ជាច្រើនទាំងសំលៀកបំពាក់ គ្រឿងអលង្ការលើសពីតម្លៃឱ្យថ្លៃខ្លួនទៅទៀត។ 
អ្នកនាងថា ហេតុអ្វីម្ចាស់ផលិតកម្មចោលមាយាទជិត២០ឆ្នាំមុនពី Sponsor គឺសំលៀកបំពាក់តារាបើអត់ពេកហេតុអ្វីមិនទៅទិញខោអាវជជុះទាំងផលិតកម្មមួយៗមានការទទួលខុសត្រូវផ្សេងៗទាំងសំលៀកបំពាក់ គ្រឿងអលង្ការ ហេតុអ្វីក៏យកកម្លាំងពលកម្មអ្នកដែលជាតារាសម្តែង។
ជួបប្រទះរឿងច្រើនពេក អ្នកនាង ស្វែង សុជាតា ស្ទើរតែលេងចង់ថតរឿងចង់ទៅរកស៊ីវិញមិនចង់ប្រាប់មហាជនថាខ្លួនអ្នកនាងជួបទុក្ខលំបាកយ៉ាងមិចខ្លះព្រោះអ្នកនាងចូលថតកុនតាំងពីឆ្នាំ១៩៩៩ រហូតបានពានរង្វាន់យ៉ាងច្រើន។ ការសម្តែងនីមួយៗអ្នកនាងថាគឺយកបេះដូងមកធ្វើប៉ុន្តែពេលខ្លះគេមិនបានយល់នោះទេហើយអ្នកខ្លះទៀតយកតួទៅអង្គុយចាំថតរាប់ម៉ោងទម្រាំចូលថតគ្មានរៀបចំផែនការច្បាស់លាស់។
តារាសម្តែងរូបនេះថា មានអ្នកខ្លះសុំឱ្យខ្លួនជួប តែមានផ្ទះគ្រប់កន្លែង ឡានទំនើបជិះ មានគ្រប់យ៉ាង ចំណែកឯអ្នកជួយវិញសល់បំណុលព្រោះតែការមិនគោរពសន្យាជួយគេរហូតភ្លេចជួយខ្លួនឯង។ មិនទាន់អស់នោះទេអ្នកនាង ស្វែង សុជាតា ក៏បានទម្លាយទៀតថាមានអ្នកខ្លះទៀតហៅតួមកថតហើយមិនបើកលុយឱ្យតួហើយប្រើល្បិចឱ្យតួហ្នឹងទៅខ្ចីលុយចងការពីអ្នកដទៃដើម្បីឱ្យខ្លួនទៀត ដល់ពេលគេចាប់ផ្តើមផុសចាប់ផ្តើមប្តឹងអត់ខ្វល់អត់រង្គើតែទៅតោងអ្នកធំម្នាក់ ទៅតោងបុគ្គលល្បីម្នាក់ទៀតដើម្បីគេចវេសពីការពិត៕
