ថ្មីៗនេះ មហាជនទាំងខ្មែរនិងបរទេសហាក់មានការហាក់ចាប់អារម្មណ៍ខ្លាំងទៅលើរូបថតមួយសន្លឹក ដែលបានដាក់បង្ហោះនៅលើបណ្តាញសង្គម បង្ហាញពីក្មេងប្រុសកម្ពុជាមួយរូប ស្ពាយកាបូបដែលដេរដោយផ្ទាល់ដៃរបស់ឪពុកខ្លួន។
ក្មេងប្រុសរូបនេះត្រូវបានស្គាល់ថាឈ្មោះ នី កេង ដែលទទួលបាននូវភាពល្បីល្បាញកាលពីអំឡុងឆ្នាំ ២០១៩ តាមរយៈក្រុមគ្រួសារដ៏គួរឲ្យកោតស្ញប់ស្ញែង ឆ្លុះបញ្ចាំងពីការលើកទឹកចិត្តឲ្យកូនប្រុស ខិតខំសិក្សារៀនសូត្រ ជម្នះនូវភាពក្រីក្រ។ កាលគ្រានោះ លោកឪពុករបស់នី កេង បានចំណាយពេល១ យប់ ក្នុងការច្នៃកាតាបមួយឲ្យរូបគេ ព្រោះតែគ្មានថវិកាគ្រប់គ្រាន់ដើម្បីទិញកាតាបថ្មីឲ្យកូន។ កាតាបនោះត្រូវបានធ្វើឡើងពីខ្សែដេរបាវ ពណ៌ទឹកប៊ិច តែក៏រំលេចនូវភាពស្រស់ស្អាត។ 
សូមជម្រាបថា រឿងរ៉ាវនេះ បានកាលកើតឡើងតាំងពី ៦ ឆ្នាំមុន អំឡុងឆ្នាំ ២០១៩ នៅឯសាលាបឋមសិក្សាលំផាត់ ក្នុងខេត្តបាត់ដំបង ដោយអ្នកគ្រូបង្រៀន Sophous Suon បានដាក់បង្ហោះរូបភាព ខណៈក៏ល្បីល្បាញខ្លាំងរហូតប្រភពអន្តរជាតិចុះផ្សាយព្រោងព្រាត។
យ៉ាងណា នាថ្ងៃទី ១៩ ខែមករា ឆ្នាំ ២០២៥ ថ្មីៗនេះ គេហទំព័របរទេស Project Nightfall បានចែករំលែករឿងរ៉ាវក្មេងប្រុសរូបនេះម្តងទៀត ដោយភ្ជាប់ជាមួយនឹងសំណេរកោតស្ញប់ស្ញែងរបស់ទឹកចិត្តជាឪពុក ដោយសង្កត់ធ្ងន់ជាមួយនឹងន័យមួយឃ្លាថា«ជួនកាល អំណោយដ៏ស្រស់ស្អាតបំផុតមិនអាចសុទ្ធតែត្រូវរកទិញបានទេ តែគឺជាការបង្កើតវាឡើងដោយក្តីស្រលាញ់»។ បន្ទាប់ពីមានការដាក់បង្ហោះ រូបភាពនេះក៏ត្រូវបានល្បីល្បាញសារជាថ្មី និងមានការចែករំលែកពីអ្នកលេងបណ្តាញសង្គមទាំងជនជាតិខ្មែរ និងជនបរទេសផងដែរ៕
