នាយកដ្ឋានសិល្បៈទស្សនីយភាព នៃក្រសួងវប្បធម៌និងវិចិត្រសិល្បៈ បានរៀបចំការសម្តែងល្ខោនបាមោជ្ជទ័យ រឿង”កុលាបប៉ៃលិន” ជូនទស្សនិកជនទស្សនារយៈពេល៤ថ្ងៃគឺ ចាប់ពីថ្ងៃទី២៣ ដល់ ថ្ងៃទី២៦ ខែមករា ឆ្នាំ២០២៥ វេលាម៉ោង ៥:៣០ នាទីល្ងាច នៅសាលសន្និសីទចតុម្មុខ មានទីតំាងស្ថិតតាមបណ្តោយមហាវិថីព្រះស៊ីសុវត្ថិ សង្កាត់ចតុមុខ ខណ្ឌដូនពេញ រាជធានីភ្នំពេញ។
ល្ខោនបាមោជ្ជទ័យ គឺជាទម្រង់ល្ខោនច្រៀងបែបទំនើបមួយដែលបានកើតឡើងក្នុងប្រទេសកម្ពុជានៅដើមសតវត្សទី២០ គឺក្នុងចន្លោះឆ្នាំ ១៩១៤-១៩១៨ ក្រោយសង្គ្រាមលោកលើកទី១។
ពាក្យថា បាមោជ្ជទ័យ គេតែងហៅដល់ឈ្មោះបីស្រដៀងគ្នា ៖
១. បាមោទ័យ (បាមោទ័យ)
២. បាមោជ្ជទ័យ (បាមោជជៈទ័យ)
៣. ប្រាមោទ្យទ័យ (ប្រាមោទ្យទ័យ)
ពាក្យថាបាមោជ្ជទ័យ គឺជាភាសាបាលី រីឯពាក្យប្រាមោទ្យទ័យ ជាភាសាសំស្ក្រឹតពាក្យទាំងពីរមានន័យដូចគ្នា សេចក្តីរីករាយ សេចក្តីពេញចិត្តខ្លាំង រំជួលចិត្ត ឧទាហរណ៍. មានបីតិបាមោជ្ជពន់ពេក (មានបីតិរីករាយពន់ពេក)។ ល្ខោនបាមោជ្ជទ័យ ឬល្ខោនកម្សាន្តចិត្តនេះ គឺពិតជាបានកើតឡើងនៅកម្ពុជាដោយយកលំនាំពីល្ខោនច្រៀងបច្ចឹមប្រទេសអូប៉េរ៉េត (OPERETTE) ពិសេសប្រទេសបារាំងដែលជាប្រទេសធ្វើអាណានិគមលើប្រទេសកម្ពុជាតែម្តង។
សូមជម្រាបថា ទន្ទឹមនឹងការសម្តែងសិល្បៈទស្សនីយភាពល្ខោនបាមោជ្ជទ័យនៅសាលសន្និសីទចតុម្មុខ ក៏រួមមានការពិព័រណ៍សិប្បកម្មខ្មែរនៅទីនោះផងដែរ។ ដូច្នេះហើយ ពុកម៉ែបងប្អូនទាំងអស់ សូមអញ្ជើញទៅចូលរួមទស្សនាឲ្យបានច្រើនកុះករ សម្រាប់ព័ត៌មានលម្អិតអាចទំនាក់ទំនងទៅកាន់គេហទំព័រ នាយកដ្ឋានសិល្បៈទស្សនីយភាព – Department of Performing Arts៕
