ភាពចម្រូងចម្រាស់ទាក់ទងនឹងតម្លៃស្រូវអង្ករក្នុងប្រទេសកម្ពុជាកំពុងតែមានឡើងកម្តៅខ្លាំង ខណៈដែលរដូវច្រូតកាត់ប្រមូលផលបានមកដល់ហើយ តែបែរជាគ្មានទីផ្សារ ប្រជាកសិករខ្មែរនាំគ្នាត្អូញត្អែរអំពីទុក្ខលំបាក។
យ៉ាងណា ថ្មីៗនេះ ដើម្បីសម្រួលដល់ទុក្ខលំបាកប្រជាកសិករមួយផ្នែក ក្រោមពាក្យស្លោក «ខ្មែរជួយខ្មែរ ខ្មែរស្រលាញ់ខ្មែរ» ក៏បានលេចវត្តមានឱកញ៉ា លោកជំទាវ កំពូលតារាចម្រៀងល្បីៗជាច្រើនរូប ប្រកាសទិញស្រូវពីកសិករខ្មែរ ម្នាក់ៗរាប់សិបតោនឯណ្ណោះ ដើម្បីចែកជូនជាពិសេសដល់អ្នកដែលខ្វះខាត។ ខណៈមហាជនជាច្រើនក៏សម្តែងនូវការកោតសរសើរចំពោះទឹកចិត្តដ៏ប្រពៃរបស់ពួកគាត់ផងដែរ។
១. អ្នកឱកញ៉ា ឡេង ណាវ៉ាត្រា បានប្រកាសនៅថ្ងៃទី១៥ ខែមករានេះថា នឹងជួយទិញស្រូវពីកសិករខ្មែរ ចំនួន ១ ០០០តោន ដើម្បីយកមកចែកជូនដល់អតិថិជនរបស់បុរីឡេងណាវ៉ាត្រា គម្រោង6A ទាំងអស់ ដែលមានការខ្វះខាត និងសំណង់យឺតយ៉ាវ ដែលទុកហូបរយៈពេល ១ឆ្នាំ ដោយឥតគិតថ្លៃ។
២.កំពូលតារាចម្រៀង ឧកញ៉ាព្រាប សុវត្ថិ និងភរិយា រូមចំណែកទិញស្រូវ ៥០ តោនពីកសិករ ដើម្បីផ្តល់ជូនអ៊ំពូមីង ដែលខ្វះខាត។
៣. កំពូលតារាចម្រៀង ឧកញ៉ាខេមរៈ សិរីមន្ត និងភរិយា ប្រកាសទិញស្រូវ ៥០តោន ចែកជូនប្រជាពលរដ្ឋដែលខ្វះខាត។
៤. លោកជំទាវ សុខ រស្មី បានចុះទិញស្រូវចំនួន ៣០ តោនប្រជាកសិករខេត្តបាត់ដំបង ដើម្បីយកទៅកិន ត្រៀមចែកជូនបងប្អូនទីទាល់ក្រ និងចាស់ជរាដែលខ្វះខាត។ នេះបើយោងតាមការដាក់បង្ហោះរបស់លោកជំទាវ នាព្រឹកថ្ងៃទី ១៦ ខែមករា។
៥. កំពូលតារាចម្រៀងខាត់ ជេមស៍ ប្រកាសទិញស្រូវ ២០ តោន ពីកសិករនៅគ្រាលំបាក។
បន្ថែមពីនេះ ក្រុមហ៊ុននាំចេញអង្ករ Amru Rice Cambodia បានប្រកាសនាថ្ងៃទី ១៥ ខែមករានេះថា នឹងប្រមូលទិញស្រូវOM ពីកសិករ ក្នុងរង្វង់តម្លៃ៨៨០រៀលក្នុង១គីឡូក្រាម ក្រុមហ៊ុនគ្រោងនឹងទិញស្រូវស្តុកទុកខ្ទង់១២,០០០តោនផងដែរ៕
