តារាសម្តែង វ៉ាង ស្រីណូ បានសម្តែងការកោតសរសើរយ៉ាងខ្លាំងទៅកាន់ទឹកចិត្តដ៏ល្អនិងសប្បុរសរបស់ ម៉ាដាម ដា ដែលហ៊ានយកកិត្តិយសក្រេដីតរបស់ខ្លួនទៅកម្ចីចិនឱ្យគេពិតជាមិនធម្មតានោះទេ។ អ្នកនាងថា ម៉ាដាម ដា ល្អខ្លាំង ចំណែកឯខ្លួននាងវិញមិនចិត្តល្អបែបនេះទេ។
តាមរយៈវីដេអូខ្លីមួយចែករំលែកនៅលើបណ្តាញសង្គមនាពេលថ្មីៗនេះ តារាសម្តែង វ៉ាង ស្រីណូ បានឆ្លើយតបទៅកាន់ការខម្មិនមួយថា «ចង់យកម៉ែទៅធានាកម្ចីចិន» ។ អ្នកនាង វ៉ាង ស្រីណូ ថារូបខ្លួនមិនមែនជាម៉ាដាម ដា ទេដែលទៅកម្ចីចិនឱ្យគេតែខ្ចីខ្លួនឯងមិនហ៊ានផងមិនបានចិត្តល្អដូចម៉ាដាម ដា ទេ។ វ៉ាង ស្រីណូ បន្តទៀតថា ម៉ាដាម ដា គាត់គិតល្អ ធានាកម្ចីឱ្យគេ ដោយដេញឱ្យអ្នកខម្មិនទៅរកម៉ាដាម ដា ទៅក្រែងគាត់ជួយម្នាក់ទៀត ចំពោះនាងមិននោះទេ។
តារាសម្តែងរូបនេះ បានពោលសរសើរទៅកាន់ទឹកចិត្តម៉ាដាម ដា ធានាកម្ចីឱ្យគេបើខូចឈ្មោះ ខូចឈ្មោះយើង។ វ៉ាង ស្រីណូ ថាម៉ាដាម ដាគាត់ល្អខ្លាំង ដល់ថ្នាក់ហ៊ានយកកិត្តិយស កេរ្តិ៍ឈ្មោះរបស់ខ្លួនប៉ុន ម៉ាដាម ដា មួយទាំងមូលជារឿងមិនធម្មតា សុខចិត្តយកកិត្តិយសដ៏ធំរបស់គាត់ទៅធានាឱ្យគេ ទៅរកគាត់ទៅខ្លួនមិនហ៊ានទេ។ តារាស្រីរូបនេះថា ខ្លួនជួយខ្លួនឯងពេលខ្លះជួយមិនចង់រួចផងកុំថាដល់ជួយអ្នកដទៃ មានតែម៉ាដាម ដា មានចិត្តបុណ្យ ចិត្តសប្បុរស។
គួរបញ្ជាក់ផងដែរថា នាបំណាច់ឆ្នាំ២០២៤ ចូលដល់ដើមឆ្នាំ២០២៥ អ្នកលេងបណ្តាញសង្គមមានការភ្ញាក់ផ្អើលយ៉ាងខ្លាំងបន្ទាប់ពីមានការបង្ហោះថា ម៉ាដាម ដា បានខ្ចីលុយចំនួន២០ម៉ឺនដុល្លារ ប៉ុន្តែមិនបានសងតាមការកំណត់ដោយដេញឱ្យទៅអ្នកផ្សេងសង។ ក្រោយពីរឿងនេះល្បីខ្ចរខ្ចាយ ម៉ាដាម ដា និងគូស្នេហ៍ជាតារាសម្តែង ប៊ីរី បានធ្វើសន្និសីទសារព័ត៌មានដោយមានដៃគូរកស៊ីម្នាក់ទៀតបានចេញមកបញ្ជាក់ថា ម៉ាដាម ដា មិនបានខ្ចីកម្ចីចិននោះទេ គ្រាន់តែជាអ្នកឈរឈ្មោះឱ្យដៃគូរកស៊ីរបស់ខ្លួនប៉ុណ្ណោះ៕
