ពិធីបុណ្យចូលឆ្នាំចិននឹងឈានចូលមកដល់នាថ្ងៃទី ២៨ ដល់ថ្ងៃទី ៣១ ខែមករា ឆ្នាំ២០២៥នេះ ដោយសង្កេតឃើញថាប្រជាពលរដ្ឋដែលជាប់ខ្សែស្រឡាយចិនមួយចំនួនបានសម្រុងទៅធ្វើពិធីកាត់ឆុងជាបណ្តើរៗហើយ មុននឹងថ្ងៃចូលឆ្នាំចិនមកដល់។
សម្រាប់អ្នកដែលរស់នៅរាជធានីភ្នំពេញភាគច្រើនតែងទៅធ្វើពិធីសែនកាត់ឆុងនៅឯវិហារអ្នកតាព្រះចៅ វត្តភ្នំ ដោយនាំយកនូវសំណែនពិសេស២យ៉ាង ដូចជា ស៊ុតឆៅ ៣គ្រាប់ និងសាច់ជ្រូក ៣ ជាន់មួយដុំទៅដាក់ក្នុងមាត់ទេវតាខ្លាទីនោះ។ បន្ថែមពីនេះ ក៏មានភ្ជាប់មកជាមួយនឹងក្រដាសសែន ផ្លែឈើ ទាន ធូបជាដើម ដើម្បីធ្វើជាដង្វាយ ព្រមជាមួយនឹងការបន់ស្រន់ផ្សេងៗ។
ពួកគេមានជំនឿថា ការកាត់ឆុង គឺធ្វើឡើងក្នុងគោលបំណងកាត់គ្រោះចង្រៃចេញឲ្យអស់ និងនាំមកវិញនូវលាភសំណាង។ ការកាត់ឆុងនេះ អ្នកខ្លះក៏បានធ្វើឡើងតាំងពីចុងឆ្នាំចាស់ (មុននឹងឈានចូលឆ្នាំថ្មី) ហើយអ្នកខ្លះទៀតធ្វើឡើងនូវកៀកថ្ងៃចូលឆ្នាំចូលចិន ឬក្រោយចូលឆ្នាំចិនហើយ គឺអាស្រ័យលើពេលវេលាទំនេររបស់បុគ្គលម្នាក់ៗ ក៏ដូចជាស្របតាមក្បួនចិនសែរបស់ពួកគេ។
សូមជម្រាបថា ទាំងនេះគឺជាអបិយជំនឿរបស់ជនជាតិចិននិងខ្សែស្រឡាយកាត់ចិន តែទោះជាយ៉ាងណា អ្នកកាន់ប្រពៃណីចិនមួយចំនួនទៀត ក៏មិនបានជឿលើជំនឿនេះទេ បើស្របតាមសម័យបច្ចេកវិទ្យា៕
