អ្នកនាំពាក្យអង្គការសុខភាពពិភពលោក (WHO) បានប្រកាសអាសន្នពីជំងឺអាសន្នរោគឆ្លងរាតត្បាតខ្លាំងលើពិភពលោក កាលពីសប្តាហ៍ទី៤ ខែធ្នូ ឆ្នាំ២០២៤ ហើយអំពាវនាវឱ្យប្រទេសនានាចាត់វិធានការការពារជំងឺនេះជាបន្ទាន់ ដូចជា ៖ ការចាក់វ៉ាក់សាំង ការកែលម្អប្រព័ន្ធទឹកស្អាត និងរក្សាអនាម័យបន្ទប់ទឹក ។
ចំនួនអ្នកឆ្លងជំងឺអាសន្នរោគបានកើនឡើងជាថ្មីម្តងទៀត បើទោះជាប្រទេសនានាការពារជំងឺនេះអស់រយៈពេលជាច្រើនឆ្នាំក្តី ។ ពលរដ្ឋរស់នៅប្រទេសមួយចំនួនដែលពុំធ្លាប់កើតជំងឺអាសន្នរោគ បែរជាកើតជំងឺនេះយ៉ាងច្រើននៅចុងឆ្នាំ២០២៤ ។ នេះបើតាមការលើកឡើងរបស់លោកស្រី Margaret Harris អ្នកនាំពាក្យអង្គការសុខភាពពិភពលោក ។
លោកស្រី Harris បន្តថា ការចាក់វ៉ាក់សាំងអាចជួយការពារការឆ្លងរាតត្បាតជំងឺអាសន្នរោគបាន ប៉ុន្តែនៅពុំទាន់គ្រប់គ្រាន់ទេ គឺប្រទេសនានាគួរកែលម្អប្រព័ន្ធទឹកស្អាត និងអប់រំពលរដ្ឋឱ្យរស់នៅមានអនាម័យ ដើម្បីបញ្ឈប់ការឆ្លងជំងឺនេះ ។
តាមទិន្នន័យរបស់អង្គការសុខភាពពិភពលោក បង្ហាញថា កាលពីឆ្នាំ២០២២ ប្រទេសចំនួន៤៤ បានរាយការណ៍ពីការឆ្លងជំងឺអាសន្នរោគកើនឡើងស្មើនឹង២៥% ខណៈនៅឆ្នាំ២០២១ មានតែ៣៥ប្រទេសប៉ុណ្ណោះកើតជំងឺនេះ ។ មនុស្សស្លាប់ដោយសារជំងឺអាសន្នរោគក្នុងឆ្នាំ២០២៤ គឺច្រើនបំផុត បើធៀបនឹង១០ឆ្នាំមុន ជាពិសេស ជំងឺនេះបានឆ្លងខ្លាំងនៅប្រទេសសូដង់ខាងត្បូង ដោយសារខ្វះខាតឧបករណ៍ពេទ្យ និងប្រើប្រាស់ទឹកកខ្វក់ ។
រដ្ឋាភិបាលសូដង់ខាងត្បូងបានព្យាយាមទប់ស្កាត់ការឆ្លងជំងឺអាសន្នរោគ ដោយបង្កើនការចាក់វ៉ាក់សាំងឱ្យពលរដ្ឋ ។ អាសន្នរោគ គឺជាជំងឺឆ្លងតាមម្ហូបអាហារ និងទឹកកខ្វក់ ហើយបើពុំព្យាបាលទាន់ពេលវេលាទេ អ្នកជំងឺនឹងស្លាប់យ៉ាងឆាប់រហ័ស ។ យើងអាចការពារជំងឺនេះបានតាមរយៈការបរិភោគអាហារមានអនាម័យ សុវត្ថិភាព និងថែទាំខ្លួនតាមការណែនាំរបស់គ្រូពេទ្យ ។
ប្រទេសមួយចំនួននៅតំបន់អាស៊ីអាគ្នេយ៍ ដូចជា ៖ មីយ៉ាន់ម៉ា មានពលរដ្ឋឆ្លងជំងឺនេះច្រើន ហើយធ្វើឱ្យថៃចាត់វិធានការការពារជំងឺនៅតាមព្រំដែនជាប់មីយ៉ាន់ម៉ា ដោយការបញ្ជូនថ្នាំ វ៉ាក់សាំង និងឧបករណ៍វេជ្ជសាស្ត្រទៅកាន់មន្ទីរពេទ្យខេត្តតាក ៕
