ភ្នំតាម៉ៅ ដែលមានទីតាំងស្ថិតនៅភូមិត្រពាំងសាប ឃុំត្រពាំងសាប ស្រុកបាទី ខេត្តតាកែវ គឺជារមណីយដ្ឋានចម្រុះមានព្រៃភ្នំធម្មជាតិដ៏សម្បូរបែប និងជាសួនសត្វដ៏ធំបំផុតមួយនៅក្នុងប្រទេសកម្ពុជា។ តំបន់សួនសត្វភ្នំតាម៉ៅគឺជាជម្រករបស់សត្វរាប់រយពាន់ក្បាលដែលមានសត្វគ្រប់ប្រភេទ ហើយសុទ្ធតែជាសត្វកម្រទៀតផង។ ជាពិសេសគឺអូនលំផាត់តែម្តង ដែលជាកូនដំរីញីដ៏កំសត់ព្រាត់ប្រាស់ម្តាយតាំងពីតូច កំពុងទទួលបានការចាប់អារម្មណ៍ខ្លាំងពេញបណ្តាញសង្គមនាពេលថ្មីនេះ។
អូនលំផាត់ទើបតែមានអាយុ ៥ ខែទេតែមានភាពឆ្លាតវៃ រហ័សរហួន និងគួរឱ្យស្រឡាញ់ខ្លាំងណាស់ បើបងប្អូនបានទៅលេងភ្នំតាម៉ៅហើយ សូមកុំភ្លេចនាំយកនំនេកតិចតួច និងទឹកដោះគោផ្ញើកូនដំរីតូច ក៏ដូចជាសត្វទាំងអស់នៅក្នុងភ្នំតាម៉ៅផង ដើម្បីជាចំណែកមួយក្នុងការជួយពួកគេឱ្យរួសរានមានជីវិត និងអាចបង្ហាញខ្លួនឱ្យកូនចៅជំនាន់ក្រោយបានស្គាល់ពួកគេផងដែរ។ កូនដំរីលំផាត់មានទម្ងន់ ១៣៨ គីឡូក្រាម មានរបួសនៅកជើងខាងមុខដោយសារជាប់អន្ទាក់ព្រានព្រៃ ប៉ុន្តែជាសំណាងល្អក្រុមអភិរក្សសត្វព្រៃក៏បានប្រទះឃើញនៅខេត្តរតនគីរី ហើយក៏បានជួយដោះលែង និងព្យាបាលរបួស ក៏ដូចជានាំវាទៅរស់នៅសួនសត្វភ្នំតាម៉ៅផងដែរ។
បច្ចុប្បន្នកូនដំរីដ៏មានប្រជាប្រិយភាពនេះរស់នៅជាមួយបងៗអ្នកមើលថែយ៉ាងកក់ក្តៅ ដោយបងប្អូនមិនចាំបាច់បារម្ភពីសុវត្ថិភាពរបស់លំផាត់ទៀតទេ។ គួរបញ្ជាក់ដែរថា តំបន់សួនសត្វភ្នំតាម៉ៅគឺជាជម្រករបស់សត្វជាង ១,២០០ ក្បាលដែលមានសត្វគ្រប់ប្រភេទ ដែលភាគច្រើនត្រូវបានប្រមូលទិញដោយក្រសួងកសិកម្ម និងចាប់បានពីជនល្មើសដែលរកស៊ីសត្វព្រៃខុសច្បាប់ទូទាំងប្រទេស។ ដូច្នេះភ្ញៀវទេសចរអាចមកលំហែកម្សាន្តទស្សនាបាននូវទិដ្ឋភាពធម្មជាតិ ព្រៃភ្នំយ៉ាងស្រស់បំព្រងរួមទាំងប្រាសាទបុរាណផងដែរ មានដូចជា ប្រាសាទតាម៉ៅ ដែលជាប្រាសាទបុរាណមួយត្រូវបានកសាងឡើងនៅក្នុងសតវត្សរ៍ទី ១១ ក្នុងរជ្ជកាលព្រះបាទសូរ្យវរ័ន្មទី ១ និងឧទយាទិត្យាវ័រ្មនទី ២ សម្រាប់ឧទ្ទិសដល់ព្រហ្មញ្ញសាសនាផងដែរ។
ភ្នំតាម៉ៅត្រូវបានបង្កើតឡើងក្នុងគោលបំណងផ្ដល់ការថែរក្សាសង្គ្រោះសត្វព្រៃ ព្យាបាល និងស្តារលទ្ធភាពសត្វព្រៃ, ការធ្វើវិបុលកម្មសត្វព្រៃ ប្រភេទសត្វ និងរុក្ខជាតិកម្រ ជិតផុតពូជ ក៏ដូចជាអភិវឌ្ឍន៍សួនភូតគាមសាស្រ្តដែលមានពូជឈើប្រណីត និងមានតម្លៃសេដ្ឋកិច្ចខ្ពស់, អភិវឌ្ឍន៍ទៅជាតំបន់គោលដៅទេសចរណ៍ធម្មជាតិ វប្បធម៌ និងប្រវត្តិសាស្ត្រផងដែរ៕
