ក្នុងពេលលាលែងតំណែងរបស់ខ្លួនជា Mister Friendship International 2023 លាវ វេងហួរ បាននិយាយឈ្មោះមិត្តស្រីរបស់ខ្លួនគឺកញ្ញា រឿន ណាត នៅឆាកអន្តរជាតិតែម្តង។ គូស្នេហ៍ជិតដល់ថ្ងៃមង្គលនៃពិធីភ្ជាប់ពាក្យនេះបានធ្វើឱ្យអ្នកគាំទ្រជាច្រើនច្រណែនពីភាពផ្អែមល្អែមអ្នកទាំងពីរ ខណៈ រឿន ណាត ថាតំណែងពិសេសដែល វេងហួរ មិនអាចលាលែងបានគឺជាម្ចាស់បេះដូងនាង។
កាលពីរាត្រីថ្ងៃទី៨ ខែធ្នូ ឆ្នាំ២០២៤ លាវ វេងហួរ Mister Friendship International 2023 បានថ្លែងសុន្ទរកថានៃការលាលែងតំណែងរបស់ខ្លួនបន្ទាប់ពីរយៈពេល១ឆ្នាំនៃការកាន់តំណែងនេះមុននឹងប្រគល់ទៅកាន់ម្ចាស់ជ័យលាភីថ្មី។ រយៈពេលជិត៥នាទី លាវ វេងហួរ បានលើកឡើងពីបទពិសោធន៍ជាច្រើនពីប្រទេសផ្សេងៗក្នុងនាមជាម្ចាស់ជ័យលាភី នឹងបាននាំឈ្មោះប្រទេសកម្ពុជា វប្បធម៌របស់ខ្លួនឱ្យពិភពលោកកាន់តែស្គាល់ច្រើនតាមរយៈឱកាសមួយនេះ។ 
លាវ វេងហួរ ក៏បានកោតសរសើរសម្រាប់បេក្ខភាពដែលចូលរួមទាំងអស់ក្នុងតំណាងប្រទេសរបស់ខ្លួននីមួយៗ។ ជាចុងក្រោយ លាវ វេងហួរ ក៏បានអរគុណទៅកាន់ហ្វេនៗនៅប្រទេសកម្ពុជា និងហ្វេនៗក្រៅប្រទេស គ្រួសារ មិត្តភក្តិ និងបានមេនសិនម្ចាស់បេះដូងគឺ កញ្ញា រឿន ណាត ដែលកំពុងទស្សនាផងដែរដែលបង្ហាញពីការស្រលាញ់គាំទ្រមកកាន់លោក។
ទង្វើរបស់ លាវ វេងហួរ បានលើកឡើងអំពីមិត្តស្រីបានធ្វើឱ្យអ្នកគាំទ្រជាច្រើនច្រណែនពីស្នេហាអ្នកទាំងពីរមិនថាពេលណា ទីកន្លែងណា ពួកគេតែងតែបណ្តុះពន្លកស្នេហាផ្អែមល្អែមឱ្យគ្នា។
ឃើញគូស្នេហ៍ពោលឈ្មោះរបស់ខ្លួននៅលើវេទិកាអន្តរជាតិនេះ រឿន ណាត បាននិយាយថា លាវ វេងហួរ ជាបុរសដ៏អស្ចារ្យហើយតំណែងពិសេសមួយដែលមិនអាចលាលែងបានគឺជាម្ចាស់បេះដូងនាង។ រឿន ណាត បានសរសេរថា «បងដឹងទេបងពិតជាអស្ចារ្យណាស់ អូនពិតជាមានមោទនភាពលើបងណាស់ ហើយអូនពិតជាសំណាងដែលមានបងជាគូដណ្ដឹងរបស់អូន។ ជារាត្រីដែលបងត្រូវផ្ទេរតំណែងពី Mister Friendship Internationalក៏ពិតមែន តែបងនៅតែមានតំណែងពិសេសមួយទៀតដែរមិនអាចលាលែងបាននោះគឺម្ចាស់បេះដូងអូន»។ នៅក្នុងខម្មិន វេងហួរ ក៏បានបញ្ជាក់ថា តំណែងមួយនេះលោកមិនលាលែងឡើយ។
គួរបញ្ជាក់ថា លាវ វេងហួរ និង រឿន ណាត នឹងដឹកដៃគ្នារៀបចំពិធីមង្គលភ្ជាប់ពាក្យនាថ្ងៃទី២០ ខែធ្នូ ឆ្នាំ២០២៤ ខាងមុខបន្ទាប់ពីមានពិធីស្នើសុំរៀបការកាលពីថ្ងៃទី១២ ខែតុលា និងបានដឹកដៃគ្នាថតរូប Pre Wedding ផងដែរ៕
