ម្ចាស់ផលិតកម្មរបស់តារាចម្រៀងឧកញ៉ា ព្រាប សុវត្ថិ និងកញ្ញា តន់ ចន្ទសីម៉ា សម្រេចចិត្តលុបបទចម្រៀង សែកមន្ត ដើម្បីបញ្ឈប់ការវែកញែកតទៅទៀត។ វីដេអូនៃបទចម្រៀងនេះអាចទម្លាក់វិញបានលុះត្រាតែដកប្លង់តុក្កតាឡាប៊ូប៊ូចេញទើបអាចផុសបានជាថ្មី។
អ្នកឧកញ៉ា ឡេង ណាវ៉ាត្រា បានសរសេរនៅលើបណ្តាញសង្គមនាយប់ថ្ងៃទី៥ ធ្នូ ដើម្បីបញ្ចប់បញ្ហាបទ សែកមន្ត ក្រោមការដឹកនាំសម្តែងរបស់លោក Jonathan ដែលបានប្រើប្រាស់តុក្កតាឡាប៊ូប៊ូ លោកបានសម្រេចចិត្តឱ្យលុបវីដេអូ(MV)ចេញពី channel Cam Pop ទោះបីជាមានការទស្សនាជាង៤លានដងហើយក៏ដោយ។
ទោះយ៉ាងណា ម្ចាស់ផលិតកម្មរូបនេះថា ត្រូវកែសម្រួលកាត់ប្លង់តុក្កតាឡាប៊ូប៊ូចេញទាំងស្រុងទើបអាចផុសឡើងវិញបាន។ ចុងក្រោយអ្នកឧកញ៉ា បានបញ្ជាក់ថា ទស្សនិកជនដែលបានផ្តល់យោបល់កែតម្រូវ ប្រៀបដូចជាកញ្ចក់ដែលឆ្លុះបញ្ចាំងនូវចំណុចខ្វះខាត។.png)
ការចេញមកប្រកាសបែបនេះពីម្ចាស់ផលិតកម្មផ្ទាល់ដោយសារតែវីដេអូចម្រៀងរបស់ ឧកញ៉ា ព្រាប សុវត្ថិ និង តន់ ចន្ទសីម៉ា ទទួលបានមតិរិះគន់ដូចទឹកបាក់ទំនុកដោយសារតែមានរូបភាពចាប៉ីដងវែង លាយជាមួយនឹងរូបភាពមនុស្សពាក់ក្បាលតុក្កតាឡាប៊ូប៊ូ។ ភាពចម្រូងចម្រាសនេះកាន់តែរីកសាយភាយទ្វេដងនៅពេលមានការលើកឡើងប្រៀបធៀបជាមួយនឹងបទ Time To Rise របស់ វណ្ណដា និងលោកតា គង់ ណៃ លើកស្ទួយចាប៉ីដងវែងដូចគ្នាមួយមានការរិះគន់ មួយទៀតមិនមានការរិះគន់។
ការប្រៀបធៀបគ្នានេះបានធ្វើឱ្យទស្សនិកជនភាគច្រើនហួសចិត្តយ៉ាងខ្លាំង ហើយធ្វើឱ្យឃ្លាចម្រៀងរបស់ វណ្ណដា «បុរាណលាយសម័យ លាយឱ្យចូល» ផ្ទុះកក្រើកយ៉ាងខ្លាំងនៅលើបណ្តាញសង្គម៕
