Mai Davika បង្ហាញគន្លឹះថែរក្សាសម្រស់សាមញ្ញៗ និងងាយស្រួល

ការសម្អាតស្បែកគឺជាជំហានដ៏សំខាន់មួយដើម្បីជួយឱ្យតារាសម្តែងថៃជួរមុខ Mai Davika មានសម្រស់ស្រស់ស្អាត និងរាងស៊ិចស៊ី។ Mai Davika គឺជាតារាសម្តែងដ៏មានឥទ្ធិពលម្នាក់នៅក្នុងប្រទេសថៃ និងជាតំណាងឱ្យម៉ាកល្បីៗជាច្រើនទៀតនៅលើពិភពលោក។ ក្រៅពីស្ទីលដ៏ទាក់ទាញរបស់នាង ក៏ត្រូវបានគេសរសើរថាមានរូបរាងស្អាតនិងស៊ិចស៊ីផងដែរ ។ ជាពិសេសដើម្បីបានស្បែកស និងរាងស្អាតដូចទេវតា Mai Davika តែងតែអនុវត្តគន្លឹះថែសម្រស់ដូចខាងក្រោម៖

១.លាងសម្អាតស្បែកជាមួយអំបិល៖ ដើម្បីបានស្បែកសភ្លឺរលោង តារាវ័យ ៣២ ឆ្នាំរូបនេះតែងដាក់អំបិលបន្តិចចូលទៅក្នុងទឹកដើម្បីកម្ចាត់ស្បែកងាប់ និងធ្វើឱ្យស្បែកមានភាពក្មេងជាងវ័យ។ បន្ទាប់ពីងូតទឹករួច តារាសម្តែងស្រីរូបនេះក៏លាបក្រែមផ្តល់សំណើមដើម្បីធ្វើឱ្យស្បែករបស់នាងសល្អឥតខ្ចោះផងដែរ។

២.សម្អាតមុខដោយប្រើទឹកកក៖ ជារៀងរាល់ថ្ងៃ Mai Davika តែងតែលាងសម្អាតមុខរបស់នាងដោយទឹកកក ដើម្បីធ្វើឱ្យស្បែកមុខតឹងណែន កាត់បន្ថយការហើម និងក្រហម។

៣.ញ៉ាំអាហារបំប៉នសុខភាព៖ ជារឿយៗតារាថៃជួរមុខចាប់ផ្តើមទទួលទានទឹកក្រឡុកដើម្បីបន្សាបជាតិពុលក្នុងរាងកាយ ក៏ដូចជាផ្លែឈើស្រស់ៗជាច្រើនមុខទៀត និងញ៉ាំស៊ុបជើងមាន់ដែលសម្បូរទៅដោយជាតិខូឡាជែន ដើម្បីឱ្យរាងកាយរឹងមាំ ស្បែករលោង ស និងក្មេងជាងវ័យ។

៤.ធ្វើលំហាត់ប្រាណឱ្យបានទៀងទាត់៖ ទោះរវល់យ៉ាងណា Mai Davika ក៏មិនភ្លេចធ្វើលំហាត់ប្រាណដែរ ព្រោះនាងយល់ថា ការហាត់ប្រាណនាំមកនូវអត្ថប្រយោជន៍រាប់មិនអស់បន្ថែមពីលើរាងកាយដែលមានទម្ងន់។ ការចូលរួមក្នុងសកម្មភាពរាងកាយដូចជាការហាត់ប្រាណ មិនត្រឹមតែធ្វើឱ្យឈាមរត់បានប្រសើរឡើងប៉ុណ្ណោះទេ ថែមទាំងធ្វើឱ្យអារម្មណ៍ល្អផងដែរ៕