នាថ្ងៃទី២៣ ខែតុលា ឆ្នាំ២០២៤ ក្នុងពិធីដាក់សម្ពោធឱ្យប្រើប្រាស់ជាផ្លូវការ “មជ្ឈមណ្ឌលប្រចាំបញ្ជាសង្គ្រោះអគ្គិភ័យ” នៃអគ្គស្នងការដ្ឋាននគរបាលជាតិ នាយឧត្តមសេនីយ៍ ស ថេត បានស្នើឱ្យប្រធាននាយដ្ឋានជំនាញ និងស្នងការដ្ឋាននគរបាលរាជធានី-ខេត្តទាំងអស់ ពិនិត្យមើលក្រុមស្ម័គ្រចិត្តពន្លត់អគ្គិភ័យ ដែលសកម្មជាមួយការងារកន្លងមក ត្រូវតែបញ្ចូលឈ្មោះទៅជាមន្ដ្រីនគរបាលជាតិ។
បើតាមនាយឧត្តមសេនីយ៍ ស ថេត បានថលើកឡើងថា៖”ក្រុមស្ម័គ្រចិត្តចូលរួមក្នុងការបង្ការ និងពន្លត់អគ្គិភ័យ មានការប្ដេជ្ញាចិត្តធំធេង ដោយពួកគាត់សុខចិត្តចូលរួម ដោយមិនទទួលបានអ្វីច្រើនលើសលប់ទេ ដូច្នេះខ្ញុំគិតថា នៅតាមអង្គភាពដែលមានមន្ដ្រីកិច្ចសន្យា ដែលមិនទាន់មានក្របខ័ណ្ឌនគរបាលជាតិ អ្នកដែលសកម្មល្អត្រូវរៀបចំជូន”។
នាយឧត្តមសេនីយ៍រូបនេះ ក៏បានគូសបញ្ជាក់ថា៖”ហេតុការណ៍គ្រោះថ្នាក់អគ្គិភ័យ បើហ៊ានតែធ្វេសប្រហែស ខ្វះការប្រុងប្រយ័ត្ន មិនត្រឹមតែបំផ្លិចបំផ្លាញទ្រព្យសម្បត្តិ ផ្ទះសម្បែងប៉ុណ្ណោះទេ ពេលខ្លះវាថែមទាំងអាចឆក់យកអាយុជីវិត ដែលធ្វើឱ្យប៉ះពាល់ដល់ជីវភាពរស់នៅ”៕
