តារាចម្រៀង ខេមរៈ សិរីមន្ត ដែលមានងារជាឧកញ៉ា ជារឿយៗតែងតែទទួលបានមតិរិះគន់ ពីអ្នកលេងបណ្តាញសង្គម។ ជាក់ស្តែងថ្មីៗនេះលោកក៏ទទួលបាននូវការបញ្ចេញមតិថា «មិនដឹងជាចម្រៀងស្អី» បន្ទាប់ពីចេញបទប្រភេទរ៉េប។ តារាចម្រៀងប្រឡូកក្នុងអាជីពចម្រៀងជាង២០ឆ្នាំរូបនេះបានឆ្លើយតបវិញយ៉ាងសុភាពចំពោះមតិរិះគន់ផងដែរ។.png)
កាលពីពេលថ្មីៗនេះ តារាចម្រៀងឧកញ៉ា ខេមរៈ សិរីមន្ត បានបង្ហើបបទថ្មីរបស់ខ្លួនដែលត្រៀមត្រឡប់មកវិញ ដោយបានដាក់ចំណងជើងថា «KSM come back ហើយត្រៀមណាបាទ»។ ទោះជាយ៉ាងនេះក្តីតាមរយៈបទថ្មីរបស់ខ្លួនតារាចម្រៀងឧកញ៉ា ខេមរៈ សិរីមន្ត ទទួលបានមតិជាច្រើនពីអ្នកគាំទ្រជំរុញឱ្យលោកចេញបទប្រភេទមនោសញ្ចេតនាវិញ។
ក្នុងការបញ្ចេញមតិជាច្រើន ក៏មានការរិះគន់ចំពោះឧកញ៉ា ខេមរៈ សិរីមន្ត ដោយមានគណនីមួយបានសរសេរថា « មិនដឹងចម្រៀងស្តីផងចេញម៉ាម៉ាត់ៗចឹងមិនដែលស្តាប់ទេស»។ ប្រយោគដែលថាបទចម្រៀងរបស់ខ្លួនមិនដឹងជាស្អីនេះ ឧកញ៉ា ខេមរៈ សិរីមន្ត បានឆ្លើយតបថា «ខ្ញុំនឹងធ្វើហើយនឹងច្នៃម្ហូបជាច្រើនមុខជូនបងប្អូនញុំាបើខ្ញុំជាចុងភៅអាជីព ខ្ញុំ នឹងធ្វើចម្រៀងឱ្យបានច្រើនចង្វាក់ ឱ្យបងប្អូនស្តាប់ព្រោះខ្ញុំជាអ្នកចម្រៀង អាជីព បងប្អូនស្រឡាញ់មួយណា ស្តាប់មួយនោះចុះដោយក្តីគោរព»។
Call Me PAPA ជាបទចម្រៀងដ៏ជោគជ័យជាងគេសម្រាប់ឧកញ៉ា ខេមរៈ សិរីមន្ត ក្នុងទ្រនំហ្គាឡាក់ស៊ី ដែលមានការស្តាប់ជាង៣០លានដងហើយក្នុងរយៈពេលជាង៨ខែ។
គួរបញ្ជាក់ផងដែរថា តារាចម្រៀងឧកញ៉ា ខេមរៈ សិរីមន្ត បានប្រកាសកាលពីកន្លងមកនេះថារូបលោកនឹងតំណាងសិល្បករកម្ពុជាផ្នែកសម័យសម្តែងនៅលើទឹកដីសហរដ្ឋអាម៉េរិកជាចុងខែកញ្ញា ឆ្នាំ២០២៤ ខាងមុខនេះក្នុងទីក្រុង សាន់ហ្រ្វាន់ស៊ីស្កូ។ តារាចម្រៀងមានងារជាឧកញ៉ារូបនេះបានលើកទឹកចិត្តប្រជាជនខ្មែររស់នៅទីនោះចូលរួមទស្សនាឱ្យបានច្រើនកុះករខណៈកម្មវិធីមានសារៈសំខាន់ដើម្បីផ្សព្វផ្សាយវប្បធម៌អរិយធម៌ និងផលិតផលខ្មែរទៅកាន់ពិភពលោក៕
