«វិមានឯករាជ្យ» ដែលមានទីតាំងស្ថិតនៅផ្លូវប្រសព្វគ្នារវាងមហាវិថីព្រះនរោត្តម និងមហាវិថីព្រះសីហនុ ចំកណ្តាលទីក្រុងភ្នំពេញ ដែលបានសាងសង់ឡើងដោយបិតាស្ថាបត្យករខ្មែរដ៏ល្បីល្បាញ គឺលោក វណ្ណ ម៉ូលីវណ្ណ ក្នុងកំឡុងឆ្នាំ ១៩៥៨។
វិមានឯករាជ្យ គឺជានិមិត្តរូបដែលបញ្ជាក់ថា ប្រទេសកម្ពុជាទទួលបានឯករាជ្យពេញលេញពីបារាំងនៅថ្ងៃទី០៩ ខែវិច្ឆិកា ឆ្នាំ១៩៥៣។ ចំណុចពិសេសមួយនៃសំណង់វិមានឯករាជ្យដែលត្រូវបានគេឲ្យដឹងថា ការរចនាម៉ូដចម្លងចេញពីព្រះប្រាង្គកណ្តាលនៃប្រាសាទបាគង ក្នុងខេត្តសៀមរាប។ ប្រាសាទបាគង សាងសង់នៅសតវត្សរ៍ទី៩ ដោយព្រះបាទជ័យវរ្ម័នទី១ ដើម្បីឧទ្ទិសថ្វាយព្រហ្មញ្ញសាសនា។
បើក្រឡេកទៅកាន់សំណង់វិមានឯករាជ្យ ទីក្រុងភ្នំពេញ មានកម្ពស់សរុប ២០ម៉ែត្រ មានចំនួន ៥ជាន់ ដោយយកលំនាំតាមរាងផ្កាឈូកក្រពុំ តាមគំរូរចនាបថរបស់អង្គរ លំអដោយក្បាលពស់នាគរាជចំនួន១០០ (១ជាន់មានក្បាលនាគរាជចំនួន ២០)។ ចំពោះក្បាលនាគចំនួន ១០០នេះ មានឯកសារខ្លះ បានពន្យល់ថា យកតាមចំនួនឆ្នាំ ដែលប្រទេសកម្ពុជា ស្ថិតនៅក្រោមអាណានិគមនិយមបារាំង ជិតមួយសតវត្សរ៍ (១សតវត្សរ៍ មាន ១០០ឆ្នាំ) គឺ ៩០ឆ្នាំ (១១ សីហា ១៨៦៣-៩ វិច្ឆិកា ១៩៥៣)។
បើតាមលោកសាស្ត្រាចារ្យ ភឿង សុភ័ណ្ឌ ដែលបានផ្តល់បទសម្ភាសន៍ជាមួយសារព័ត៌មានក្នុងស្រុកមួយនាពេលកន្លងទៅបានឲ្យដឹងថា ការសាងសង់វិមានឯករាជ្យ ជាការបូកបញ្ចូលនូវទស្សនៈធំៗទាំងអស់នេះ និងការបង្ហាញស្នាព្រះហស្តរបស់សម្តេចនរោត្តមសីហនុ ដែលទ្រង់បានយាងចុះតាមគ្រប់ខេត្ត ក្រុងទាំងអស់ ហើយចលនាឲ្យមានការបង្កើតកងកម្លាំង បង្កើតកាំភ្លើងឈើ ដើម្បីបង្ហាញកម្លាំងទាមទារឯករាជ្យ រហូតដល់បារាំងផ្តល់ឯករាជ្យភាពដល់កម្ពុជា អាចគ្រប់គ្រងដោយខ្លួនឯង។
យ៉ាងណាមិញ ដោយសារតែសំណង់វិមានឯករាជ្យមានរចនាបថយ៉ាងលេចធ្លោរបែបនេះហើយ ក៏ត្រូវបានគេយកលំនាំសាងសង់នៅតាមបណ្តាខេត្តនានាមួយចំនួនផងដែរ តួយ៉ាងដូចជាខេត្តតាកែវ ខេត្តកំពង់ស្ពឺ ខេត្តកែប ខេត្តឧត្តរមានជ័យ ខេត្តប៉ៃលិន ខេត្តព្រះសីហនុ ខេត្តកំពង់ឆ្នាំង ខេត្តព្រះវិហារ ខេត្តរតនគិរី ខេត្តមណ្ឌលគិរី ខេត្តក្រចេះ ខេត្តកំពង់ធំ ខេត្តស្វាយរៀង៕
